1 Tutul Israél 17
17
Yóm Fasad Dwata ke Dabid
1Bè yóm deng khenek Dabid bè gónô bongen, yó udélen ebè Natan yóm tugod Dwata, monen mò du, “Ngem, fene nô bè nim tey gónô tilob nngom koyu sidar, okóm yóm Slungan Dwata fen nô bè yóm olo tolda.”
2Ne yó balà Natan ke Dabid, monen, “Yó ne, tódô nmoem ke tedu nô lem hendemem, yakà nóen béléem Dwata.”
3Okóm bè yóm kifu yó, wen udél Dwata ebè Natan, monen,
4“Lemwóti, wen htulónu kóm bè Dabid, yóm tóbóng lówóhu, monem mò du, ‘Ni se udél Dwata ebéléem. Là kô uu du yóm hemdà béléu gónô mò gónóhu nô. 5Nbuten bè yóm kdaw tehe kehewau yó kem tau Israél gu bè Idyip efet nim kmoen ni, là kóe nô bè gónô se dou. Són bè yóm gónô gel nwit le mógów gónóhu gel nô. 6Bè kdê yó kem benwu gónó le gel mili yó kem tau Israél, balù sulék ke denge tmalaw bè yó kem tmuha gel malak kul, yó kem tuha hesegyoku yó kem tauhu, ke tô monu mò kul, “Moen ke là hemdà ye béléu gónô nngom koyu sidar?” ’
7Duhen ni, tulónem ke Dabid yóm tau tóbóng lówóhu, monem mò du, ‘Ni se udél yóm Dwata laen dù là gbeken du. Deng tehe nwahu uu bè yóm gónóm gel semgyok ubihahem ne néléku uu mò malak yó kem dou tau Israél. 8Ket gónóhem e solu, elese tendo nô béléem, ne gotu genlau yóm kdê hohonem bè ket kesfatayem. Ne ni, angat htótólu boluyem bè klamangen benwu. 9Ne deng wen benwu blayu kul yó kem dou tau Israél mò gónó le hlós nô, ne laen dù bud hmala kul bè yó. Mò kul benwu yóm blayu kul yó, ne là bud hen-gnok le kul ne yó kem tau hono sidek nmò le lemwót bè dumu benwu, lómón yóm tehe deng gel nmò le bélê le 10lenwóten bè yóm kdaw tehe kkól le bè ni, bè yóm kdaw kwen kem tau kmukum néléku mò malak yó kem dou tau Israél. Heneku ne kebenwu le, laen dù bud hohon le mundug kul.
Ne ni wen tulónu kóm. Lómón ke wen gónô hdau béléem, abay se tódô sónmoen wen tau hol geta bè yó kem semfu gu béléem. 11Abay se ke dengi matay, angat sotu bè yó kem ngaem mò temles kóm, ne hbegelu yóm kogoten benwu. 12Du se angat hdà du yóm dou gónô, yóm gónô mò mit du yóm dou boluy. Ne laen kô dù tul sónen yóm kehbegelu yóm kogoten benwu. 13Ou se angat maen, ne du se ngau. Là kô kóhu du yóm alì kbong nawahu du, là lómón du yóm tehe kkóhu yóm kbong nawahu ke Sol, botong kóhu anì uu mò tlesen. 14Yóm ngaem yó, angat hogotu du yó kem dou tau ne laen kô dù tul sónen yóm tendo kwen tau hol geta lemwót bè yóm kóm ktol mò mogot benwu.’ ”
15Tahu se, mulék ebè Dabid Natan, ne gotu tulónen du yóm kdê htulón Dwata du.
Kdóyón Dabid bè Dwata
16Omin Dabid husek elem yóm gónón nô yóm Slungan Dwata, ne myón bè yó bè solu Dwata, ne mni ebè Dwata, monen, “Ó Dwata yóm Dwata hol gónó mogot, tmau do de dalang se yó kem fes lówóhu ke lómón ni yóm deng nmoem béléu? 17Ne ni, Dwata yóm Dwata hol gónó mogot, deng mom bud tennuem he ni kem deng nmoem béléu ni, duhen yóm kwen fasadem dou gbak ebè yó kem semfu gu béléu elem hulin kdaw. Bè yóm udélem yó, hol lómón ke ou yóm tau bong boluyen. 18Tey ketngahu du yóm nmoem béléu ni mò gónóm madat dou. Igoem temngón du yóm dou kmò. 19Lemwót bè yóm kóm kóyô béléu, Dwata, wen fasadem dou, ne deng gotu nmoem ni kem tey tennga ni, ne deng gotu hetngónem dou.
20Ó Dwata, laen dù semnged kóm, laen dù dumu Dwata, són uu. Laen dù deng hnikót gungol me he ke wen dwata semnged kóm. 21Tau du de mkél bè yó kem tauhem Israél, yó kem tau deng tehe nsokem bè keghesek le mò hol kóm nfun? Deng tey kehtótólem boluyem bè yóm kehewaem kul gu bè Idyip. Tey dê hentaw ton yóm deng nmoem bélê le, ne deng gotu lohem yó kem tau bè yó kem dumu benwu tô hemseng kul. 22Ne deng nélékem yó kem tauhem Israél, laen kô dù tul sónen yóm kfunem kul ne deng uu se, Dwata, baling hol kul Dwata.
23Duhen ni, Dwata, hendohoem yóm deng fasadem dou gbak ebéléu ne bè yó kem fes lówóhu. Hol fasad laen dù sónen he yóm fasad yó. 24Hol laen kô dù tul sónen he kegdóyón yóm boluyem ne yó angat mon yó kem tau, ‘Yóm kul Dwata yó kem tau Israél, du se yóm Dwata laen dù là gbeken du.’ Ne angat tey kehbegelem du bè soluhem yóm kogot le benwu yó kem ktol Dabid, yóm tau tóbóng lówóhem.
25Ó Dwata, mlose mni du béléem nim ni, abay se deng hetngónem dou, yóm tau tóbóng lówóhem, deng tulónem dou, monem, ‘Lómón ke wen gónô hdau béléem, abay se laen kô dù tul sónen yóm angat tendo kwen tau hol geta semfu gu béléem.’ 26Yakà uu du se yóm Dwata hol gónó mogot, ne deng fasadem dou, yóm tau tóbóng lówóhem, nim tey hyu ni. 27Duhen ni, bong hyu béléem tmóbóng dou dalang se yó kem fes lówóhu anì yó, laen kô dù tul sónen yóm tendo keseflós kegeta me bè soluhem. Abay se yóm uu, Dwata, ke wen tau tnóbóngem, laen kô dù tul sónen yóm któbóngem du.”
Là gomongen bè nili yóm tsaptér 18. Yó tulónen bè nim tsaptér ni yóm kalak Dabid yó kem sendaluen ebè gida, yóm kesgida le yó kem tau Idom, ne kem tau Muab, ne kem tau Amunayt, ne kem tau Flistin, ne kem tau Amalikayt ne yó kem dumu hohon le. Bè yóm gel kesgida le yó, sal le gel gemmò le Dabid, ne gwa le yóm benwu gónó le gemmò yó.#18:27 Bè tsaptér 18.Bè ni gónón dohò yóm tehe fasad Dwata ke Abraham ekni gbak bè klamang yóm tonok le. Udélen ebélê le bè Tekang Kbuten 15:18 ne bè bok Hlau Dwata 11:24, ominen bè Juswa 1:4, monen, “Yó gónón gkilil yóm tonok yó, lenwóten fi leged bè yóm benwu là hyu menwu du efet kól fi bwak yóm bulul Libanun. Yó bud kililen fi dmata kdaw, lenwóten bè Él Yufratis, hnalaken benwu yó kem tau Hitayt efet kól bè Mohin Miditiranyan fi desdef.” Ne bud tulónen bè nim tsaptér ni snéen yóm tey ktilob kwit Dabid yó kem tau nogoten.
Là gomongen bè nili yóm tsaptér 19. Yó tulónen bè nim tsaptér ni yóm kungol Dabid yóm katay Nahas yóm tau hol geta bè yó kem tau Amunayt. Nim Nahas ni, tehe tnóbóngen Dabid bè yóm tehe kehlóyen ke Sol, ne là kô klifót Dabid du yóm nmoen yó. Bè yóm kungol Dabid du yóm katayen, wen kem tau hógówen ebè yóm ngà Nahas logi boluyen Hanun, mò gónóhen hegfan du yóm kadaten ke maen.
Okóm tikóng le gdek bè Hanun yó kem tau hógów Dabid yó koni, deng mom hekfóen lu, ne ya tey sidek kehyak le kul, ofo kul mon du ke lu yó kem tau hmilung bè benwu le. Timbow tngón Dabid yóm nmò le yó, yó gónón hógów yó kem sendaluen anì na le e gnida yó kem tau Amunayt yó.
Tikóng glileb yó kem tau Amunayt yóm kgida Dabid kul yó, yó gónó le tminok lewu folò libu sendalù Aramiyan mò tmóbóng kul. Okóm senged nóm, là kô le gemmò bè le Dabid, ne baling le gnô lem hólól Dabid yó kem tau Amunayt.
Currently Selected:
1 Tutul Israél 17: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
