1 Tutul Israél 15
15
Eles kehtifes le mit du ebè Jirusalim yóm Slungan Dwata
1Wen kem kun gónô Dabid deng hdaen lem yóm syudaden. Ne deng eles wen tolda hefdaen mò hlun gónóhen hemsù yóm Slungan Dwata. 2Ominen wen hlolò Dabid yó kem tau, monen, “Bè yóm kangay tekuy du ni yóm Slungan Dwata, laen dù dumu tau semtihang du tek són yó kem sfu Libay, yakà laen dù tul sónen yóm deng kélék Dwata kul mò mit yóm kun Slungan ne mò nmò béléen.”
3Duhen yó, gotu sentifun Dabid lu bè Jirusalim yóm kdéen tau Israél anì mung le bè yóm kwit le yóm Slungan Dwata ebè yóm kun gónô nô deng eles hetfingen. 4Ni se yó kem tau gel blóng ebè Dwata ne kem dumu sfu Libay htaba Dabid.
5Lematu lewu folò lemwót bè tbong Kuhat, ne Uryél fen malak kul.
6Lewu latu lewu folò lemwót bè tbong Mirari, ne Ahasaya fen malak kul.
7Lematu tlu folò lemwót bè tbong Gérsum, ne Juwél fen malak kul.
8Lewu latu sfu Ilisafan, ne Simaya fen malak kul.
9Wolu folò sfu Hibron, ne Iliyél fen malak kul.
10Lematu sfolò lewu sfu Usiyél, ne Aminadab fen malak kul.
11Omin Dabid htaba yó kem tau gel blóng ebè Dwata, le Sadok ne Abyatar, ne yó kem sfu Libay gel malak, duhen le Uryél ne Ahasaya ne Juwél ne Simanaya ne Iliyél ne Aminadab. 12Yó monen mò kul, “Yu se kem malak bè yó kem tbong Libay. Hólós ye knô ye dalang se yóm kdê ye sfu Libay, anì nwit ye edini yóm Slungan Dwata yóm Dwata yó kem tau Israél. Nwit ye ebè yóm gónô deng eles hetfingu mò gónóhen nô. 13Lemwót bè yóm là kwit kem sfu Libay du yóm Slungan Dwata bè yóm tanay tô kangay me du, yó gónóhen alì lembut tekuy yóm sana kut Dwata hol gónó mogot. Yakem deng tehe eles snólók tekuy kmò kwit du.” 14Tahu se, hólós le knô le yó kem tau gel blóng ebè Dwata ne yó kem sfu Libay anì nangay le yóm Slungan Dwata yóm Dwata yó kem tau Israél, nwit le ebè Jirusalim. 15Sentihang le yóm Slungan Dwata hol lómón yóm deng tehe eles hlolò Dwata ke Musis.
Là gomongen bè nili yóm bérs 16 kól bè bérs 24. Yó tulónen bè ni kem bérs ni hono boluy yó kem tau nélék le hulung semngal ne hulung huni yóm dê kay nuni le. Lu fen hligal semngal ebè Dwata bè yóm igò le semtihang yóm Slungan Dwata ebè Jirusalim yóm igò le mógów tukô gna kul yó kem tau mféw. Ne wen se nélék le mò fen mentey yóm Slungan Dwata.
Kwit le du ebè Jirusalim yóm Slungan Dwata
25Duhen yó, kewót Dabid bè yó mung du yó kem malak bè yó kem tau Israél ne yó kem geta bè yó kem sendalù, nangay le yóm Slungan Dwata nô bè gónô Ubid-idom. Wen tey kehligal bong nmò le. 26Tey któbóng Dwata yó kem sfu Libay semtihang yóm Slunganen. Yó gónóm mon, wen hitu safì tudu ne hitu ngà ubiha dsù le ebè Dwata. 27Lesek Dabid yóm nes bukay, dalang se yóm kdê sfu Libay semtihang yóm Slungan Dwata, ne yó kem tau hulung semngal, ne Kinanaya yóm fen gel malak sngal, gotu le lemsek nes bukay se kul. Lesek Dabid snéen yóm nes boluyen ifod mò gel lesek yóm tau gel blóng ebè Dwata. 28Duhen yó, nwit Dabid ne yóm kdéen tau Israél yóm Slungan Dwata ebè Jirusalim, mung du yóm tey kehligal le mensag, lel le myuf yó kem tey féw wen, ne sendofì le yó kem simbal, ne lel yóm tey uni yó kem gel kenbit le.
29Yóm khuseken elem yóm syudad Dabid yóm Slungan Dwata yó, temngel tembó beng Mikal yóm ngà Sol libun yehen Dabid. Tikóng tonen yóm kehkak ne kadal Dabid lanen alì hligal, deng mom tey sidek kehedemen du yóm nmò Dabid.
Currently Selected:
1 Tutul Israél 15: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
