YEREMIA 29
29
Surat i Yeremia kon intau in Yahudi kon Babel
1 #
Dat.2. 24:12-16; Taw.2. 36:10 Akuoi in nomais kon surat kon imang mita, nabi mita bo itoi mita in bangusa inta nobiagpa, bo kon bayongan intau ibanea inta ain inakut i Nebukadnezar nongkon Yerusalem pinobayá in Babel. 2Surat tatua in pinaisku naonda in ki Datu Yoyakhin, ki inánea, pogawai mita in komaḻig, pojabat mita in pomarenta in Yohuda bo Yerusalem, mogogimok mita, bo intau mita inta mongotaau totok mogaid inakut pinobayá in pinoḷumbúan. 3Akuoi in nokidia in surat tatua kon i Elasa ki adí i Sapan, bo kon i Gemarya ki adí i Hilkia inta pinotabá i Zedekia datu in Yohuda kon i Nebukadnezar datu in Babel. Nanaa in bonu in surat tatua,
4“Nanaa in guman i Tuhan Inta Totok in mokawasa, Allah in Israel kon bayongan intau inta ain iḷumbú-Nea nongkon Yerusalem pinobayá in Babel: 5‘Pokotantúdon kon nion. Posindogdon in baḷoimu mita. Pononggobádon bo kaandon in bungainea. 6Pobuḷoidon sinbá mokouḻí kon adí in moiko, bo biódon mako in ki adímu mita in mobuḷoi doman sinbá mosia in mokouḻí doman kon adí. Kobayongmu in musti modugang bo diábí motaau in mogaat. 7Pogaidon sinbá motompia in kotá mita inta pinoḷumbúan-Ku kon i monimu. Posambayangdon kon i-Nakó sin kopontingan in kotá mita tatua, sin aka kotá mita tatua mobiag mooyúon, yo moiko in mobiagbí doman mooyúon. 8Akuoi ki Tuhan, Inta Totok in mokawasa, Allah in Israel, mopotoingat kon i monimu sinbá diá mopomayá mako in awakmu koakaḷan in nabi mita inta nogutun kon yuakmu andeka i inekadon inta noguman kon mosia in mokotoḷanow kon singgai moiduduimai. Dika moindoimai kon togoindop mita monia. 9Mosia in mopomaké in tangoi-Ku sin mongonguman kon inimu kon soaḷ mita inta diá totuu. Akuoi in diábí nopotabá kon i monia. Akuoi, ki Tuhan, ain nosingog.’
10 #
Taw.2. 36:21; Yer. 25:11; Dan. 9:2 Ki Tuhan in noguman, ‘Aka motompodon in wakutu pitu nopuḷú notaong kon Babel, yo bui-Ku in moiko indoian, bo mogintompod kon dandi-Ku modia kon i monimu mobui kon tampat tanaa. 11Kinotaauan-Ku bidon in tomayá-Ku mita kon i monimu! Tomayá mita tatua in deemanbí mopobodito kon i monimu, táe kobiaganmubí inta motompia bo mobogoi kon inimu in kobiagan moiduduimai inta nopuḻing in kamang. 12Dá moiko in mokituḷungbí kon i-Nakó. Moiko in mamangoibí mosambayang kon i-Nakó, bo tubagan-Kubí in sambayangmu. 13#Ul. 4:29 Moiko in motayakbí kon i-Nakó bo moyodungkuḷ-Kubí, sin moiko in motayak takin ḻimbatú in gina. 14Totuu, moiko in mokodungkuḷbí kon i-Nakó. Moiko in sipunon-Kubí nongkon yuak in bayongan bangusa bo nongkon bayongan in butá inta pinoporaritan bo pinoḷumbúan. Moiko in diaan-Kubí bui kon butámu tanaa bo monompia bui kon kobiaganmu. Akuoi, ki Tuhan, ain nosingog.’
15Podudui kon i monimu, ki Tuhan ain nobogoi in nabi mita kon Babel. 16Indongogai in onu inta pinoguman i Tuhan soaḷ datu inta nomarenta kon tanaa mako, tuata in datu inta buí i Daud, bo soaḷ intau inta nogutun kon kotá tanaa, inta ginaḷummu inta diá inakut kon pinoḷumbúan noyotakin i monimu. 17Ki Tuhan Inta Totok in mokawasa in noguman, ‘Akuoi in mopoangoibí in parang, gogoy, bo yampoi in takit kon i monia. Mosia in aidan-Kubí naonda bo bungai mita in ara inta noiḻiudon in bongkog nodapot in diádon motaau kaanon. 18Mosia in aḷo-aḷowan-Kubí mako in parang, gogoy, bo yampoi in takit modapot in bayongan in bangusa kon sinangkub in dunia in mokoningkimbí in mokoontong kon kaadaan monia. Kon ondakabí in poporaritan-Ku kon i monia, intau in mokoningkimbí bo moondok in mokoontong kon onu inta nobaḻí kon i monia. Mosia in singkuḻeonbí, bo tangoi monia in pakéon mobaḻí kutukan. 19Tua komintan in nobaḻí kon i monia, popisí in mosia in diábí dinumudui kon koyow-Ku inta umuran potaau-ku kon i monia pinongin nabi mita mogogundoi-Ku mita. Mosia in doíbí moindoimai kon koyow-Ku tua. 20Bo moiko komintan inta ain iḷumbú-Ku kon Babel, indongogai in onu inta pinoguman-Ku, Tuhan.’
21Ki Tuhan Inta Totok in mokawasa, Allah in Israel, ain nosingog soaḷ ki Ahab ki adí ḷoḷaki i Kolaya, bo soaḷ ki Zedekia ki adí ḷoḷaki i Maaseya inta nomaké in tangoi i Tuhan sin mopotaau kon inimu in soaḷ mita inta diá totuu. Ki Tuhan in noguman kon Sia in moposarakanbí kon i monia kon kawasa i Nebukadnezar datu in Babel inta moḻimod kon i monia kon tayowonmu. 22Dá aka intau mita inta ain inakut nongkon Yerusalem pinobayá in Babel mongutuk kon intau tobatú, yo mosia in mogumanbí, ‘Igumon mako ki Tuhan in mopoaid kon inimu ná ki Zedekia bo ki Ahab, inta ain sinubá kobia-biag i datu in Babel.’ 23Natuata in ukur monia popisí in nogaidon kon dosa mita moḷoben kon Israel: Mosia in nonuaḻing, bo nopomaké in tangoi i Tuhan sin mongonguman kon inta diá mita totuu. Tua in noyotoḻikud in ibog i Tuhan. Kinotaauan-Neabí in onu inta inaidan monia, bo sia tontaní in nobaḻí sakusi moḷawang kon i monia.#29:23: inaidan, bo sia … monia andeka: aidan; sia in nokoontong kon i monia nogaid kon tua. Ki Tuhan ain nosingog.”
Surat i Semaya
24-25Ki Tuhan Inta Totok in mokawasa, Allah in Israel nobogoi in koyow kon i Semaya, intau in Nehelam, sin ki Semaya ain nokidia in surat pinodoyon kon tangoinea tontaní kon bayongan in intau inta nogutun kon Yerusalem, kon i Imang Zepanya ki adí i Maaseya, bo kon bayongan imang inta ibanea. Kon bonu in surat tatua ki Semaya in nomais nanaa kon i Zepanya: 26“Ki Tuhan ain noduí kon inimu nobaḻí imang nomaḷui kon i Yoyada, bo tanaa ikodon in pojabat inta moḷantu-ḷantud kon Baḷoi i Tuhan. Oaidanmu in momarenta sinbá bayongan intau nobundai inta tumangoi nabi, sinokig in rante uatoi kon sigogownea. 27Táe nongonu sin iko in tongábí kibio-biómai kon i Yeremia intau in Anatot tatua inta ain sinumon nabi kon sigad in bangusa naton? 28Intau tatua in mustibí pomponan kon bibignea, sin sia in noguman kon intau mita naton inta kon Babel kon mosia in moonggotpabí in mogutun kon tua. Bo popisí intua, sia in noguman kon mosia in mustibí moposindog in baḷoi bo mononggobá bo mokaan kon bungainea.”
29Surat tatua in binaca i Imang Zepanya kon inakó. 30Tuamai in ki Tuhan nopotabá kon inakó 31mokidia in habar soaḷ ki Semaya kon bayongan in intau in Israel inta iḷumbú-Nea kon Babel. Naa in habar tatua, “Ki Semaya ain nosingog kon inimu naonda bo nabi in sia; bokaka Akuoi, ki Tuhan, diábí nopotabá kon inia. Popisí in sia ain nopobaḻí kon i monimu nopirisaya kon singog uboḷ, 32bo popisí in sia ain nopotabá kon i monimu moḷawang kon i-Nakó, dá Akuoi in mohukumbí kon inia bo buínea. Diábí tobatúmai in nongkon sigad monia inta mogutunpa kon sigad monimu sin moindoi kon inta mongopia inta aidan-Ku kon bayongan umat-Ku. Akuoi, ki Tuhan, ain nosingog.”
Currently Selected:
YEREMIA 29: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
