YEREMIA 30
30
Dandi i Tuhan kon umat-Nea
1Ki Tuhan, Allah Israel, 2noguman kon inakó, “Paisdon kon bonu in buk tobatú in bayongan inta ain pinoguman-Ku kon inimu. 3Sin moiangoibí in wakutunea Akuoi mopoguḻit bui in kaadaan in umat-Ku Israel bo Yohuda. Diaan-Kubí bui in mosia mayá in butá inta ain inogoi-Ku kon mogoguyang monia. Butá tatua in buibí mouḻí monia. Akuoi, ki Tuhan, ain nosingog.”
4Ki Tuhan in noguman kon umat in Israel bo Yohuda,
5“Akuoi in nokodongogdon
karak in intau inta nourot,
karak in intau moondok
inta diá in dodamean.
6Tungkuḷaika rai bo taridi!
Degá ḷoḷaki mopononggadí in adí?
Aka natua, nongonu sin inontong-Ku
in bayongan in ḷoḷaki nongo bilaibí
bo motonoi kon siannea
naonda bo bobay inta mononggadídon?
7Singgai motoyang ain noiangoi,
singgai inta diá in poḷawangan.
Kon i umat-Ku, tua in singgai inta mokoondok;
táe mosia in posaḷamaton-Kubí.”
8Ki Tuhan Inta Totok in mokawasa in nosingog bui kon umat-Nea, “Aka moiangoi in singgai tatua, tombuḻigan inta pinopopotaan kon sindunmu in putoḷon-Kubí bo inta pinoumantungan kon inimu in bukáan-Kudon. Moiko in diá bidon mobaḻí ata in intau ango-angoi. 9Moiko in mogundoi bidon kon i-Nakó, Tuhan Allahmu, bo kon intau tobatú buí i Daud inta duíon-Ku mobaḻí datu.
10 #
Yer. 46:27-28
Umat-Ku Israel, dikadon moondok!
Mogogundoi-Ku Yakub, dika mourot!
Moiko bo buímu in posaḷamaton-Kubí
nongkon butá moyayú, tampat pinodakopan kon i monimu.
Moiko in mobuibí
bo mogutun kon butámu takin moaman.
Moiko in mobiagbí motomoman;
diá bidon in koondok monimu.
11Akuoi in mamangoibí bo moiko in posaḷamaton-Kubí.
Bangusa mita, inta pinoporaritan-Ku kon i monimu
komintanbí yopúon-Ku,
táe moiko in diábí pomiaan-Ku natua.
Memang moiko in diábí moiḷagui kon hukuman
táe hukuman-Ku kon i monimu in moadilbí podudui in inta ain sinantú.
Akuoi, ki Tuhan ain nosingog.”
12Ki Tuhan in noguman kon umat-Nea:
“Takitmu in nobogatdon totok
paḻímu in diá bidon in undamnea.
13Diá bidon tobatúmai in intau in moḷongasi mongudam kon inimu,
diábí in undam in bituḷmu mita,
diádon in kamangmu kon mopiapa.
14Bayongan in intau inta kinoibogmu nokoḻiongdon kon inimu;
mosia in doí bidon morai kon inimu.
Naonda bo musung Akuoi ain nonubu bo nohukum kon i monimu kinoḻingá,
popisí in nobayongdon in dosamu
bo moḷoben in taḷámu.
15Dikadon mogamui soaḷ kekebmu mita,
sin kon inimu diádon in kamang mopia.
Moiko in hukumon-Ku natua
popisí in nobayong in dosamu
bo moḷoben in taḷámu.
16Táe tanaa bayongan inta noḻiom kon inimu in ḻiomonbí,
bo bayongan in musungmu akutonbí kon poḷumbúan.
Akuoi in mondorotbí kon inta nondorot kon inimu,
Akuoi in mogagowbí kon inta nogagow kon inimu.
17Umpakabí musungmu in moguman, ‘Sion in iḷumbúdon,
bo diá in noindoimai,’
tongá moiko in posehaton-Kubí bui,
bo kekebmu mita in undaman-Kubí.”
18Ki Tuhan in noguman doman bui:
“Moiko, umat-Ku in totabion-Kubí
bo poguḻiton-Ku bui in kaadaanmu kon butámu tontaní
Yerusalem in posindogonbí bui,
bo komaḻignea in tompiaan.
19Intau inta nogutun kon tua in modayowbí kon i-Nakó pongin dondong,
bo monggoḷokap takin ḷunganga in gina.
Baḻíon-Ku in mosia horomaton bo diádon singkuḻeon,
bo kobayong monia in tantúdon modugang.
20Bangusamu in baḻíon-Kudon ponango-nangoian ná dungkuḷmai,
bo simindog bui saḷaku umat-Ku.
Bayongan inta nondorot kon inia in hukumon-Kubí doman.
21-22Datu inta nomarenta kon i monimu
in nongkon bangusamu
takin diá in ḷamboinea dimiug in sia kon i-Nakó
aka oiníon-Ku in sia mamangoi in tayowon-Ku.
Sin ki ine in mokobaḻí
tumayow kon i-Nakó podudui in ibognea tontaní?
Moiko in mobaḻíbí umat-Ku
bo Akuoi in mobaḻí Allahmu.
Akuoi, Tuhan inta noguman kon tua.”
23-24Torú i Tuhan nádon deḷang, nádon tompot moropot inta nondangat kon intau mita moraat, bo diádon mooyong kon dodai in diápa mobaḻí in bayongan tomayá-Nea. Kon singgai moiduduimai umat-Nea in monotaaudon kon tua.
Currently Selected:
YEREMIA 30: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
