YEREMIA 21
21
Koḷabúan in Yerusalem sinoḻindap
1Ki Zedekia datu in Yohuda nopotabá kon i Imang Pasyhur ki adí i Malkia, bo kon i Imang Zepanya ki adí i Maaseya. Sia in nopotabá kon i monia nopotaau kon inakó in oigum tanaa, 2#Dat.2. 25:1-11; Taw.2. 36:17-21 “Poigumdon kon topotundú kon i Tuhan sin kopontingan naton, sin ki Nebukadnezar datu in Babel takin tontaranea in koyogotdon mongopung kon kotá naton. Dika-dika bo ki Tuhan in mogaidbí kon inta mokoherang kon inaton, bo momakisa kon i Nebukadnezar mopotabá umundok in tontaranea.”
3Bo ki Tuhan in nosingog kon inakó, dá pinotabáku in intau mita inta pinotabá namangoi tua 4nopotaau kon i Zedekia kon ki Tuhan, Allah in Israel, noguman nanaa, “Zedekia, Akuoi in monaḷowbí kon tontaramu inta tanaa koyogot in noparang nonayow kon i datu in Babel takin tontaranea. Pakakat mita in parang in tontaramu in sipunon-Ku kon yua-yuak in kotá. 5Akuoi tontaní in rumopot monayow kon i monimu bo takin doman torú inta tumaga-tagab. 6Intau mita in kotá tanaa in ḻimodon-Ku; pinomayá intau andeka mahaḷuk in matoibí popisí in yampoi in takit inta motoyang. 7Iko bo pogawaimu mita takin intau mita inta noisimparut kon parang, gogoy bo yampoi in takit, komintan pomayá-Ku mako in domokon i Datu Nebukadnezar bo in musung mita inta moibog moḻimod kon inimu. Ki Nebukadnezar in moḻimodbí kon i monimu komintan takin diá in ampung bo diá in tabi. Akuoi, ki Tuhan, ain nosingog.”
8Bo ki Tuhan in nopotabá kon inakó noguman nanaa kon umat-Nea, “Indongogai! Akuoi, ki Tuhan, in mokipiḻí kon inimu: daḷan inta mopobayá in kobiagan, andeka daḷan inta mopobayá in kopatoian. 9Bayongan in intau inta mogutun kon bonu in kotá in matoibí popisí in parang, gogoy, andeka yampoi in takit. Táe mosia inta ḷumuai sin tumungkud kon intau in Babel inta koyogot in nonubu kon kotá tanaa, in kotaḻibanbí bo diá ḻimodon. 10Akuoi in nonantúdon kon morimumud kon kotá tanaa, bo diábí motabi kon inia. Kotá tanaa in ogoibí kon i datu in Babel; turubonneabí modapot in mopayong komintan. Akuoi, ki Tuhan, ain nosingog.”
Hukuman kon motoḷuadí i datu in Yohuda
11-12Ki Tuhan in nopotabá kon inakó nopotaau in koyow tanaa kon motoḷuadí in datu in Yohuda, buí i Daud: “Indongogai onu inta poguman-Ku, Akuoi, ki Tuhan. Poḷongasidon sinbá inta moadil in pobayá pomuḷoi in singgai. Poḷuatdon in intau inta umuran pogamáan in intau inta nongawasa kon inia. Aka diá, yo aid moraat inta inaidanmu mokotagab kon torú-Ku naonda bo tuḷú inta diá kopiongan.”
13Onda intua ki Tuhan in noguman kon Yerusalem, “Ei Yerusalem! Kinoukatanmu in moḷantu-ḷantud in ḷopá mita kon diugmumai. Iko in naonda bo buḷud batu irib kon rawang inta notondodai, táe Akuoi in moḷawangbí kon inimu. Iko in moguman kon diábí tobatúmai in intau in mokotubu kon inimu andeka mokodangat kon dindingmu mita, 14táe Akuoi in mohukumbí kon inimu popisí in oaidmu. Komaḻigmu in turubonkubí, bo bayongan in yagi-yagi kon diugnea in mopokakbí doman. Akuoi, ki Tuhan, ain nosingog.”
Currently Selected:
YEREMIA 21: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
