YEREMIA 22

Tonggina mita i Yeremia kon motoḷuadí i datu in Yohuda

1-2Ki Tuhan in nopotabá kon inakó minayá in komaḻig i datu in Yohuda, buí i Daud, sin mopotaau in koyow i Tuhan kon i datu, bo kon pogawainea mita, takin intau in Yerusalem. Naa in tosingogon mita i Tuhan kon i monia, 3“Pokoadildon bo pokojujur. Poḷuatdon nongkon kawasa in inta monondorot in intau inta dinorot. Dika mondorot andeka mopoaid in moraat kon intau ango-angoi, adí uno-unon, andeka boba-bobay. Dika moḻimod kon intau inta diá kotaḷá kon tampat tanaa. 4Aka moiko totu-totuu mopobayá in parenta-Ku mita tatua, dá datu mita inta nomarenta ná tai Daud in tumuotbí kon bonawang mita in komaḻig tanaa. Mosia in moyotakin in pogawai mita bo rayat monia in tumakoibí kon kereta bo kabaḷo. 5#Mat. 23:28; Luk. 13:35 Táe aka moiko bo diá dumudui kon parenta-Ku mita, dá ibotan-Ku kon komaḻig tanaa in mobaḻíbí apug. Akuoi, ki Tuhan, ain nosingog.

6Bo kon i-Nakó yo komaḻig in datu in Yohuda in totuubí kon mogaga, ná kogaga in butá in Gilead bo buḷud mita in Libanon; táe tampat tatua in baḻíon-Kubí naonda bo padang gurun inta diá inutunan in intau. 7Potabá-Kubí mangoi in intau sin morimumud kon inia. Mosia in modiabí kon boḻiung, bo mogumpag kon oiginea mita inta mogaga inta pinomia nongkon kayu ḷokuyú in Libanon. Bo mosia in mopogambatbí intua kon bonu in tuḷú.

8Mopaḷut mako kon tua mobayong in intau ango-angoi in tumaḻib kon tua bo mosiḻibóan mongo nongonu sin Akuoi, ki Tuhan, in nomia bidon kon natua kon kotá inta mogaga tatua. 9Bo intau in motubagbí kon bayongan intua in nobaḻí popisí in moiko ain nonoḻikudon kon dodandianmu takin-Ku, Allahmu, bo ain nosumba bo noibada kon ilah mita ibanea.”

Tosingogon mita i Yeremia soaḷ ki Yoahas

10Intau in Yohuda, dikadon monogumatoi

sin kopatoian in Datu Yosia.

Ombaḷaibí in ki Yoahas ki adínea ḷoḷaki

sin sia in diniadon minayá bo diá bidon mobui mangoi.

Butá kinolahirannea in diá bidon bui ontongonnea.

11 # Dat.2. 23:31-34; Taw.2. 36:1-4 Soaḷ ki Yoahas, ki adí ḷoḷaki i Yosia, inta nobaḻí datu in Yohuda momaḷui kon i amánea, ki Tuhan in noguman nanaa, “Sia in minayádon nongkon naa, bo diá bidon mobui mangoi. 12Sia in matoibí kon pinoḷumbúan, bo diá bidon mokoontong kon butá tanaa.”

Tosingogon mita i Yeremia soaḷ ki Yoyakim

13Moboditodon in intau inta moposindog in baḷoinea inta noidoyon kon aid diá moadil, bo mogin oḷad takin aid diá motuḻid. Moboditodon in sia inta nopotabá in intau nogaid bo diá inuboḻian in pinogaidannea. 14Moboditodon in intau inta noguman, “Posindogonku in komaḻig inta moḷoben takin yuangnea mita inta mooḷad kon ḷandakan kon ḻimonikan,” bo kon komaḻig tatua pinogaidannea kon jandela mita takin bongkow nongkon kayu ḷokuyú in Libanon, bo cinetnea in nopura. 15-16Indongogaidon, ei Datu Yoyakim! Aka iko moposindog in komaḻig mopomaké in kayu ḷokuyú in Libanon inta totok in mopia, yo degá tua in nobaḻí tomponuot kon iko in mopia-pia nongkon bayongan in datu ibanea? Tungkuḷaika torop in ki amámu: Sia in nokonanamdon kon kobiagan motompia bo nokodapot kon bayongan in inta iḷongasinea, popisí in sia in umuran motuḻid bo mojujur bo monisig kon pelekara in intau bogá pongin aid moadil. Memang mustibí natua in aid in intau inta nonotaau kon i Tuhan. 17Táe iko, Yoyakim, in toposibí. Iko in tongábí motayak kon kauntungan tontaní. Iko in moḻimod kon intau inta diá kotaḷá, bo mondorot kon rayatmu takin aid moḻingá.

18 # Dat.2. 23:36–24:6; Taw.2. 36:5-7 Tuamai in soaḷ ki Yoyakin datu in Yohuda, ki adí ḷoḷaki i Yosia, ki Tuhan in noguman nanaa, “Kopatoiannea in diábí ombaḷan; diábí in moguman, ‘Adodoia kaasí, yobayatku, adodoia.’ Diábí in monogumatoi andeka momaḷú, ‘Kaasí in ki tuang datu!’ 19Ki Yoyakin in uguton bo pogambatbí kon ḷuai in bonawang in Yerusalem, ná pinogogaid in intau kon keledai minatoi.”

Habar soaḷ ukur in Yerusalem

20Ki Tuhan in noguman, “Ei intau in Yerusalem, bayádon in Libanon bo Basan, bo pomaḷúdon kon tua. Karakdon kon buḷud in Moab, sin bayongan in totakinmu in sinaḷowdon. 21Akuoi in nosingogdon kon inimu kon dodai in kaadaanmu mopiapa, táe moiko in doí mokidongog. Memang natuabí in gogutúmu nongkon dungkuḷmai dapot in tanaa mako; diábí kon dodai in onda in motoindudui kon i-Nakó. 22Tuamai, itoimu mita in modaitbí naonda bo inirup in tompot. Totakinmu mita in akutonbí mobaḻí intau sinokodakop, bo kotámu in poompáanmai bo pokopooyáanmai popisí in bayongan aidmu moraat. 23Moiko in mogutun moaman iḻibu in oigi mita in kayu ḷokuyú in Libanon, táe kon singgai moiduduimai aka moiko kotugatan in inta mokonakit, moiko in mororigabí naonda bo bobay inta koyogot in mononggadí.”

Hukuman i Tuhan kon i Yoyakhin

24 # Dat.2. 24:8-15; Taw.2. 36:9-10 Ki Tuhan in noguman kon i Datu Yoyakhin, ki adí ḷoḷaki i Yoyakin datu in Yohuda, “Podoyon kon i-Nakó, Allah inta nobiag, poguman-Ku kon umpaka iko nion aka kon i-Nakó naonda bo sising meterai kon ḻima koḷanan-Ku, táe iko in rabuton-Kubí 25bo ogoi kon intau mita inta kinoondokmu bo inta moibog moḻimod kon inimu. Iko in ogoi-Ku kon i Nebukadnezar datu in Babel, takin intaunea mita. 26Iko bo ki inámu in poguntunon-Kubí bo ḷumbúon kon butá inta deeman butámu tontaní, bo kon tua in kopatoian monimu. 27Moiko in mokotanobbí totok kon butá tanaa, táe diábí in moiko moibui.”

28Akuoi ki Yeremia in noguman, “Degá ki Datu Yoyakhin in nobaḻídon naonda bo kuyon noḷosi inta iḷumbú bo kinodoídon? Tua degá in mangaḻenea kon sia bo ki adínea mita in untunon bo ḷumbúon kon butá inta diá kinotaauan monia?”

29Uḻe butáku, indongogai onu in pinoguman i Tuhan, 30“Intau tatua ain sinantú kon kobuḻian in adínea mita bo umuran mosisí in kon kobiagannea. Nongkon buínea diábí in mokodapot kon inta mopia in kon bonu in pomarentaan kon Yohuda saḷaku datu buí i Daud. Akuoi ki Tuhan, ain nosingog.”

Currently Selected:

YEREMIA 22: INOMOG

Highlight

Copy

Compare