YEREMIA 20
20
Ki Yeremia nobobayowan i Imang Pasyhur
1Ki Imang Pasyhur ki adí i Imer in tongguḷu in moḷoḷukad kon Baḷoi Tuhan. Naonda in dinongognea in akuoi nopotaau in bayongan tua, 2pinarentanea sinbá bongkugon in akuoi bo umantungan kon Bonawang in Benyamin, bonawang kon dotá in ḻimonik kon Baḷoi Tuhan. 3Doḷo-doḷom nobangon monik naonda in ki Pasyhur nomuḻi kon inakó nongkon pinoumantungan, akuoi i noguman kon inia, “Tangoi inta bain ogoi i Tuhan kon inimu in deeman bidon ki Pasyhur, táe ‘Sindoyó kon bayongan in tampat’. 4Ki Tuhan tontaní in noguman, ‘Iko in baḻíon-Ku sindoyó kon inimu tontaní bo kon i yobayatmu mita. Iko in mokoontongbí kon i monia in ḻimodon in musung monia. Bayongan in intau in Yohuda in pomayá-Kubí mako in kawasaan in datu in Babel; tongosilai kon i monia in akuton nobaḻí intau dinakop pobayá in Babel, bo ki agatnea in ḻimodon. 5Musung monia in pomayá-Ku doman mako in mogamá bo mogakut pobayá in Babel in bayongan kaoyúonan in kotá tanaa, bo bayongan in kapunyaannea, nodapotbí in pakakat mita pusaka in datu mita in Yohuda. 6Bo iko, Pasyhur, takin bayongan in motoḷuadímu in domokon doman bo akuton pobayá in Babel. Kon tua matoi in iko bo ḷobongon; natua doman in bayongan in yobayatmu inta ain nokidongog kon uboḷmu mita.’ ”
Ki Yeremia nogamui kon i Tuhan
7 Tuhan, Iko in nodondouḷug kon inakó
bo akuoi in kinodondouḷugandon.
Iko in moropo-ropot in akuoi
bo nopokuyungdon kon inakó.
Akuoi in irupa-rupamai in bayongan intau,
siningkuḻe nongkon doḷo-doḷom dapot in ḷoḷabungnea.
8Pomuḷoi in akuoi mosingog,
musti in akuoi momaḷú rumopot totok,
“Ḷoḻinga! Bodito!”
Tuhan, akuoi in irebeg bo siningkuḻe pomuḷoi mako,
popisí in nopotaau in koyow-Mu.
9Táe aka kon bonu in ginaku akuoi in moguman,
“Biódon mako ki Tuhan in ḻiongonkudon,
doídon in akuoi mosingog podoyon kon tangoi-Nea,”
dá koyowmu in naonda bo tuḷú
inta moborambang kon bonu in dodobku.
Aindon sinungkuḷanku pinondam,
táe diá mokoigon in akuoi.
10Kodongogan in intau moyogombong kon bayongan in tampat,
“Ondok in mongawasa!
Igai pongaduon in sia kon i inta nongawasa!”
Nodapotbí in bayongan in topotakinku modagin
mogoḷat mako kon koḷabúanku.
Guman monia, “Degá pongin dondouḷug,
kotaḷowan in sia,
sinbá motaaudon in kita
motuḻí kon yaat in gina kon inia.”
11Táe Iko, o Tuhan, in kon dotáku;
Iko in totok in moropot bo motorindog.
Mosia inta mogaḷow bo mondorot kon inakó
in moḷabúbí bo kodaitan in daya.
Mosia in mooyábí modapot in mononoi,
diádon in notuoi in bayongan tomayá monia.
Koempengan monia tua
in umuranbí toropon.
12Táe, o Tuhan Inta Totok in mokawasa,
takin aid moadil sinungkuḷan-Mu in intau;
Kinotaauan-Mu in gina bo raian monia.
Tuamai in ogoipa in akuoi
moindoi kon ini-Mu motuḻí kon aid moraat in musung
sin pelekaraku tanaa in poposarakankubí kon ini-Mu.
13Podondongdon kon i Tuhan bo dayowdon in Sia
sin Sia in mopoḷuat kon intau inta dinorot in intau moraat.
14 #
Ayb. 3:1-19
Kinutukdon in singgai kinoḷontaganku!
Biódon mako noempeng kon dodai in akuoi pinononggadí i ináku.
15Kinutukdon doman in intau inta nodia kon habar
inta nokoḷunganga totok kon i amáku,
kon dodai in pinotaau kon inia,
“Iko in nokouḻí kon adí ḷoḷaki!”
16Biódon mako ki inta nodia kon habar tatua in naonda bo kotá mita
inta irimumud i Tuhan takin diá in tabi.
Biódon mako in sia mokodongog kon karak monakit kon dodai in doḷo-doḷom,
bo kokow in parang kon dodai in noutu in singgai.
17Sin sia in diá noḻimod kon inakó
kon tungkuḷ in akuoi kon bonupa in sian,
sinbá akuoi in umuranpa kon bonu in sian i ináku
bo bobuḷadíannea in mobaḻí poḷoḷobongan kon inakó.
18Nongonu sin akuoi in mustibí pononggadí?
Degá tongábí bá mororiga bo mosusa?
Bo degá bá kobiaganku in moitaḻib
kon bonu in oyá?
Currently Selected:
YEREMIA 20: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
