MAZMUR 143
143
Do'a mongkakase da otulungi mae
1Mazmur i Daud.
O Tumpu, potombihingakon mae na do'angku,
pahatikan mae na anu ku kakase aiya.
Taamiakon mae na aku nu kalibosan nu Belento,
situjuiakon mae na do'angku nu ka'adilan nu Belento.
2 #
Rm. 3:20, Gal. 2:16 Aku aiya posaihon nu Belento, boli mae mompulusi aku,
kalana madi' ko mian anu madi' kokasala'annyo i ahop nu Belento.
3Anu monsampobali' mae aku nololoi'mo mae ka' nompatundu'mo aku,
ka' nontuamo aku i uno nu talungku' anu pintung:
aku timbalimo susumo mian anu pininmo na sinilaka.
4Aku madi'mo ko pikilan pa'apaa na anu obau,
kinyonyoangku talalomo hondo biningung.
5Ku inau' hondo na kantumuu'anku i sinaa anu i hikuhakonmo:
ku popikilakon iwi-iwi' apaa na anu binaumo nu Belento,
ku tutugi iwi-iwi' apaa na anu binaumo nu Belento.
6Aku balado'a hi Belento lima opotala;
sumomo tano' anu notiismo, santuu'ku nongindimo Belento.
7Sampa mae taami na aku, o, Tumpu,
kalana madi'mo daagi' ko anu ku taha'imani.
Boli maninsuluk dumo madi' ku toa,
da boli aku susumo mian anu nintatau'mo i dunia nu mian anu sinilakamo.
8De subu-subumo po'ingatakon mae hi belengku na kalibosan nu Belento,
kalana olamo Belento na anu ku taha'imani.
Potiju'akon mae hi belengku na jalan anu tionyo ahi' ku jalani,
kalana olamo hi Belento na anu pompotokanku do'a.
9Aku toka mae kahanda' mihohung' hi Belento,
o, Tumpu, pobebasakon mae na aku da madi' nupoposia nu anu monsampobali' mae aku.
10Potiju'akon mae na aku mombau pongka'oho' nu Belento,
kalana Belentomo na Tumpungku.
Belento manonong,
ka' molaya'mo aku i jalan anu mahata.
11Posalamatakon mae na aku susumo anu jinanji'mo nu Belento, o, Tumpu,
kalana kanonongan nu Belento, pobebasakon mae na aku da madi' mongoa'i kasansala'an.
12Kalana kalibosan nu Belento pateimo iwi-iwi' na anu monsampobali' mae aku,
pateimo iwi-iwi' na anu momposakisa mae aku,
kalana aku posaihon nu Belento.
Currently Selected:
MAZMUR 143: LAILOE
Highlight
Copy
Compare
Share
Want to have your highlights saved across all your devices? Sign up or sign in
