MAZMUR 144
144
I tomundo' nontalima kasemo hi Tumpu kalana inguntungmo na nahampate
1Lengkat hi Daud.
Opuji' na Tumpu anu binaumo pihohungan'anku!
Ia nompogulu'mo aku nahampate,
ka' nongajanmo aku mosia na mahangewa.
2Iamo na anu nontulungi mae aku ka' nontinjohimo mae aku,
anu nomposalamatmo mae aku tampat pihohungankumo.
Ia nonjagaimo mae aku, tampat pinopalaianku,
iwi-iwi' na bansa pinota'aluk-Nyomo hi belengku.
3 #
Ayb. 7:17-18, Mzm. 8:4 O, Tumpu, ihe na mian sahingga nupalahatikan nu Belento na ia?
Ihe na ia sahingga Nu inau' na ia?
4Mian aijo' ola susumo mombun saimpotulu,
susumo lolung motulu, sumomo aijo' na kantumuu'annyo.
5O, Tumpu, bukaimo mae na langit nu Belento ka' pintatau'mo mae,
sintungmo na bungkutnyo iwi-iwi' da mintibukmo.
6Lumbu'akonmo mae na kilat nu Belento da anu monsampobali' mae mosungke-sungkehetmo,
lapasakonmo mae na hihis nu pana' nu Belento da aha mabuhuk ka' bingungmo.
7Tajuakonmo mae na lima nu Belento atina' mae i suluga',
ka' pobebasakonmo mae na aku da madi' nu anjuhakon nu iyaba'.
Posalamatakonmo mae na aku da madi' nukuasai nu mian anu i salipu'an.
8Anu mongka'ima'i baleko' ka' mongakali ka' saja' basumpa' anu madi' totu'u.
9Aku monyanyiakon hi Belento, o, Tumpu nyanyian anu sala'je ingajan,
ka' onyanyiakon na mongkuti' kasapi'.
10Belento nompo'untungmo to tomu-tomundo' nahampate,
ka' nompobebasmo i Daud posaihon nu Belento.
11Opimpaliakon mae na aku da madi' nukaan nu bajak nu mian anu madi' adin ka' buhingison.
Posalamatakon mae na aku da madi' nukuasai nu mian anu i salipu'an
anu mongka'ima'i baleko' ka' mongakali,
ka' saja' basumpa' anu madi' totu'u.
12O'amalakon da to ana-anakto mo'ane de daagi' olitau
sumomo sosu'anon anu ko daka-daka'nyomo.
O'amalakon da to ana-anakto boune sumomo ahi' ohi anu handa,
anu bau pombunga-bungai pasu'nyo i laigan nu tomundo'.
13O'amalakon da alangto iwi-iwi' mobuke'mo nu isinyo,
mongangahan na isinyo nu ale'.
O'amalakon da dombanto iwi-iwi' anu kiijo' mae i tampat padang,
minganakmo sampe mopulu-pulu'mo na madala na konjo'nyo.
14O'amalakon da sapi'to iwi-iwi' saponga-ponga'naknyomo
ka' madi' ko anu molapus kabai ola manabu' na anaknyo.
O'amalakon da madi' ko anu ohongo na mongoa'i kasansala'an
i iwi-iwi na jalan nu kota'.
15Mohumpak kantumuu'an ma'ima' na bansa anu sumo aijo,
mohumpak kantumuu'an na mian anu Tumpu-nyo, aijo'mo na Tumpu!
Currently Selected:
MAZMUR 144: LAILOE
Highlight
Copy
Compare
Share
Want to have your highlights saved across all your devices? Sign up or sign in
