MAZMUR 119
119
Atulan nu Tumpu
Kantumuu'an anu ma'ima' hi mian anu tulu-tulutan hi atulan nu Tumpu
1Mohumpak ka'ima'an na mian anu kantumuu'annyo madi' ko kasala'annyo
ka' tulu-tulutan hi atulan iwi-iwi' nu Tumpu.
2Mohumpak ka'ima'an na mian anu kantumuu'annyo montuluti palentah-Nyo,
ka' totu-totu'u na kinyonyoanyo bala'usaha monsumbu' Tumpu.
3Mohumpak ka'ima'an na mian anu kantumuu'annyo montuluti pongka'oho' nu Tumpu,
ka' madi' mombau anu ma'idek.
4Belento nombee'imo mae kami atulan nu Belento o Tumpu,
da obau mami ma'i-ma'ima'.
5O' amalakon da kinyonyoangku mahoson
na montuluti atulan nu Belento iwi-iwi'.
6De ku palahatikan na palentah nu Belento iwi-iwi',
saba' aku madi'mo mohumpak ambang.
7De ku pakalioi na ka'adilan nu kaputusan nu Belento anu adin aijo',
hodi' hondo na kinyonyoangku mompuji' Belento.
8Aku montulutimo atulan nu Belento
bolimo hondo-hondo mompala'i aku.
Tulu-tulutan hi atulan nu Tumpu
9To oli-olitau timbali monjaga kantumuu'annyo da madi' ko kasala'an
de ia tumuu' montuluti palentah nu Belento.
10Totu-totu'u hondo na kinyonyoangku bala usaha monsumbu' Belento,
boli opojohok mae na aku dumo mosele madi'mo montuluti palentah nu Belento.
11Pangajalan nu Belento ku una'mo i uno nu kinyonyoangku
da aku madi' baladosa' hi Belento.
12Ku puji'mo na Belento, o, Tumpu
potiju'akon mae na aku atulan nu Belento.
13Ku daka-daka'i na potatae mompoto'i
iwi-iwi' na atulan anu binee'mo mae nu Belento.
14Aku lame' na montuluti palentah nu Belento iwi-iwi',
sumomo daagi' ko halata' anu monga-ngahan hi belengku.
15Aku mompaka liomo iwi-iwi' na anu pinutusanmo nu Belento,
ka' mompalahatikanmo iwi-iwi' na anu pinoto'imo nu Belento.
16Atulan nu Belento nomposanangmo aku;
pangajalan nu Belento madi'mo ku kolilimi.
Kantumuu'an anu ma'ima' kalana atulan nu Tumpu
17De timbali da Belento manonong mae hi posaihon nu Belento aiya,
da aku sabole-boleh tumuu' ka' montuluti pangajalan nu Belento.
18Buka'akon mae na matangku da aku montoa
pangajalan anu okabangangi hi atulan nu Belento.
19Ola sasaingoni' na aku jojoong i dunia aiya
boli mae oposuluk hi belengku na atulan nu Belento.
20Madi'mo sinanang na kinyonyoangku kalana nolibosmo
aku kahanda' monsumbu' atulan nu Belento sansina-sinaa.
21Belento mompisala'i mian anu kobubuun
ka' mongkutuki mian anu mosele madi'mo montuluti palentah nu Belento.
22Pobebasakon mae na aku da madi' nu alu ka' nu pisala'i mae nu aha,
kalana aku mombaumo atulan nu Belento.
23Mau mule' to mia-mian anu balakuasa mosa'angu'mo mongewa mae aku,
posaihon nu Belento aiya na mompotutugakon ahi atulan nu Belento.
24Atulan nu Belento iwi-iwi' baumo pompokinde'i aku
anu momposanang kinyonyoangku.
Kahanda' da montuluti atulan nu Tumpu
25Aku nale'mo i abu';
po'ule'akon mae na kantumuu'anku susumo anu jinanji'mo nu Belento.
26Aku mongakuimo palabuatanku, lantas tinaamanmo nu Belento na aku;
potiju'akon mae na aku atulan nu Belento.
27Tulungiakon mae na aku da monsumbu' atulan nu Belento iwi-iwi',
pangajalan nu Belento anu mompobangang hondo ku potutugakonmo.
28Kinyonyoangku nohintutumo kalana tinokanmo mae nu kasusa'an,
pohosonakon mae na aku susumo anu jinanji'mo nu Belento.
29Pojo'onakon mae na aku da madi' montulu jalan anu madi' totu'u,
kalana Belento manonong potiju'akon mae na aku atulan nu Belento.
30Aku nompile'imo da tulu-tulutan,
palentah nu Belento saja' sabole-boleh ku inau'.
31Aku nontulutimo iwi-iwi' na palentah nu Belento
o, Tumpu, boli opojohok na aku dumo ma'ambang.
32Aku sanang hondo na tulu-tulutan hi palentah nu Belento,
kalana Belento nombalakatimo da aku lebe mangalati'.
Do'a mongkakase da mangalati'
33O, Tumpu, pangajali mae na aku da mangalati' hi atulan nu Belento iwi-iwi'
da ku tuluti sampe i ka'ahenannyo.
34Balakatiakon mae na aku da mangalati' hi atulan nu Belento da saja' ku tuluti,
ka' ku bau nu kinyonyoangku totu-totu'u.
35O' amalakon da aku mintoong hondo-hondo hi palentah nu Belento,
kalana aijo' na anu ku ka'ima'i.
36Balakatiakon mae na aku da ko kahanda' montuluti atulan nu Belento,
da boli mule' ko kahanda' lebe penting na timbali kaya.
37Jagai mae na aku da boli ola mololoi' anu madi' ko kaliangannyo,
bee'i mae kantumuu'an na aku susumo anu Nu kahanda'i.
38Pohosonakon mae na kinyonyoa nu posaihon nu Belento,
aiya na anu jinanji'mo nu Belento anu binee'mo hi mian
anu tulu-tulutan hi Belento.
39Pojo'onakon mae na aku o alu nu anu kukabuhuk,
kalana talalo hondo ma'ima' na atulan nu Belento.
40Bee'iakon mae na aku kantumuu'an anu bu'ou kalana Belento adin,
aku kokahanda' montuluti iwi-iwi' na anu pinutusanmo nu Belento.
Montaha'imani atulan nu Tumpu
41O, Tumpu ponyata' mae hi belengku taalu' Belento mongkalibosi ahi' mae aku,
posalamatakon mae na aku susumo anu jinanji'mo nu Belento.
42Sahingga aku moko ala montaami mian anu mongalu mae aku,
kalana aku montaha'imani potatae nu Belento.
43Tulungi mae na aku da saja' montaloakon anu totu'u,
kalana aku montaha'imani anu pinutusanmo nu Belento.
44Aku kahanda'mo mintoong hi atulan nu Belento,
sampe toka sidu-sidutu'.
45Sahingga aku tumuu' bebasmo
kalana binala'usahamo montuluti pangajalan nu Belento.
46Atulan nu Belento ku bebakonmo hi to tomu-tomundo'
ka' aku madi'mo ma'ambang.
47Kasananganku aijo'mo mombau palentah nu Belento
kalana ku ka'ima'i.
48Ku holomati ka' ku ka'ima'i na palentah nu Belento
atulan nu Belento saja' ku potutugakon.
Palesaya hi atulan nu Tumpu
49Inau'akon mae na anu jinanji'mo nu Belento hi posaihon nu Belento aiya
anu jinanji'mo aijo' timbali ku taha'imani
50Aiyamo na mohase' aku i uno nu kasala'anku,
kalana anu jinanji'mo nu Belento aijo' mombee'i aku kantumuu'an.
51Mian anu kobubuun talalo hondo mongalu aku,
panyo aku madi' mosele mompala'i atulan nu Belento.
52Ku inau' na atulan nu Belento anu polo-polo'mo daagi' salatanmo pe'e naipuan mae,
sahingga sinanangmo na kinyonyoangku, o, Tumpu.
53Tinambuha'ankumo hondo na mian anu ma'idek na kinyonyoanyo,
kalana aha nompala'imo atulan nu Belento.
54Aku tinumuu' ola sasaingoni' i dunia aiya
atulan nu Belento binaungkumo nyanyian pompuji'-puji'.
55De malomo ku inau'mo na Belento o, Tumpu,
atulan nu Belento sabole-boleh ku toongi.
56Aku nohumpakmo kantumuu'an ma'ima'
kalana nontulutimo iwi-iwi' na atulan nu Belento.
Monsombah atulan nu Tumpu
57Olamo Belento na ku ka'ima'i o, Tumpu
aku balajanji' mombau pangajalan nu Belento.
58Totu-totu'u na aku mongkakase,
kalibosan mae nu Belento,
kalibosi mae na aku susumo anu jinanji'mo nu Belento.
59Pinotutugakonkumo na kalakuanku
ka' balajanji'mo montuluti atulan nu Belento.
60Ku lia-lia'imo ka' madi'mo montanda'i
na mompojalan palentah nu Belento.
61Mian anu ma'idek na kinyonyoanyo nompokonamo so'o da nukona na aku,
panyo aku madi' mongkolilimi atulan nu Belento.
62Tonga' pahu aku mobulamo ka' mompuji'mo Belento
kalana iwi-iwi' na kaputusan nu Belento adin.
63Aku mobela' tiba iwi-iwi' mian anu tulu-tulutan,
iwi-iwi' na mian anu mombau palentah nu Belento.
64Tano' nobuke'mo nu kalibosan nu Belento o, Tumpu
pangajali mae na aku atulan nu Belento iwi-iwi'.
Angga'nyo nu atulan nu Tumpu
65Belento nongganapimo anu jinanji'mo nu Belento o, Tumpu
ka' nongkanonongimo posaihon nu Belento.
66Bee'i mae na aku kapandean ka' ilimu' da monsumbu' apa-apaa,
kalana ku palesaya na palentah iwi-iwi' nu Belento.
67Ma'isa aku i hukum, aku noselemo madi'mo nontuluti palentah nu Belento,
uuka aiya aku nontoongimo palentah nu Belento.
68Kalana Belento manonong ka' saja' mombau anu ma'ima',
potinganakon mae na aku atulan iwi-iwi' nu Belento.
69Mian anu kobubuun lewa'mo mompobau-bau aku,
panyo aku totu-totu'u hondo montuluti kaputusan nu Belento.
70Mian haha aijo' madi' mangalati',
panyo de hi belengku atulan nu Belento na momposanang ahi' kinyonyoangku.
71Memang sahanyo Belento
mohukumo mae aku,
da ku sumbu' na atulan iwi-iwi' nu Belento.
72De hi belengku atulan nu Belento lebe ko angga'nyo
molingkudui mosoni' ka' salaka i dunia aiya.
Ka'adilan nu atulan nu Tumpu
73Belentomo na nompotimbali ka' nontali' aku,
popangalati' mae na aku monggului' iwi-iwi' na palentah nu Belento.
74Mian anu tulu-tulutan sanangmo de montoamo mae aku,
kalana aku montaha'imanimo anu jinanji'mo nu Belento.
75Ku sumbu' na kaputusan nu Belento adin o, Tumpu,
Belento nohukumo mae aku kalana Belento nongkanonongi mae.
76O' amalakon da kalibosan nu Belento baumo pohase' aku,
susumo anu jinanji'mo nu Belento hi posaihon nu Belento aiya.
77Kalibosiakon mae na aku, sahingga aku sabole-boleh tumuu',
kalana atulan nu Belento momposanang mae kinyonyoangku.
78Bakas da mian anu kobubuun ma'ambangmo
kalana lewa'mo nompobau-bau aku,
panyo aku na nompotutugakonmo ahi' palentah iwi-iwi' nu Belento.
79O' amalakon da mian anu tulu-tulutan toka mae hi belengku,
iwi-iwi' na anu monsumbu' to atu-atulan nu Belento.
80O' amalakon da kinyonyoangku madi' mosele mompala'i atulan nu Belento,
da aku madi' ma'ambang.
Do'a mongkakase da opobebas
81Kinyonyoangku mongka'ima'i hondo kasalamatan lengkat mae hi Belento;
aku montaha'imani anu jinanji'mo nu Belento.
82Matangku nalawemo na montanda'i Belento mongganapi mae anu jinanji'mo nu Belento,
aku notataemo, “Hipian na Belento mohase'mo mae aku?”
83Kilitku ningkihu-kihutmo sumomo botutu nu anggur anu pininmo na pinake,
panyo atulan nu Belento madi' ku kolilimi.
84Sampe toka hipian na kopinnyo na posaihon nu Belento tionyo sabaan?
Hipian na Belento mohukumo to mia-mian anu mololoi' mae aku?
85Mian anu madi' montuluti atulan nu Belento,
nongkekemo bolo' da bau pohakob aku.
86Iwi-iwi' na atulan nu Belento timbali otaha'imani,
tulungiakon mae na aku, kalana aku i loloi'mo mae madi' ko sababnyo.
87Me ise-ise' pinoko alamo nu aha na aku pinatean,
panyo aku madi' nonte palentah nu Belento.
88Posalamatakon mae na aku kalana Belento sabole-boleh mongkalibosi,
da aku moko ala montuluti atulan nu Belento.
Palesaya hi atulan nu Tumpu
89O, Tumpu, potatae nu Belento tataap sampe toka sidu-sidutu',
sampe toka sidu-sidutu' i suluga'.
90Kanonongan nu Belento madi' ko ka'ahenannyo sidu-sidutu',
Belento na nompotinjo tano' sahingga sabole-boleh daagi'.
91Iwi-iwi' na anu daagi' tempo' uuka aiya, daagi' kalana palentah nu Belento,
kalana aha iwi-iwi' to posa-posaihon nu Belento.
92De bisuannyo atulan nu Belento misa' pinolengkatan mae nu kalame'anku,
memang aku sinilakamo i uno nu kasansala'anku.
93Sabole-boleh aku madi' mongkolilimi palentah nu Belento
kalana tiba jalan anu sumo aijo' Belento nompotumuu'mo aku.
94Posalamatakon mae na aku, kalana aku aiya, Belentomo na tumpunyo,
aku binala'usahamo montuluti atulan nu Belento.
95Mian anu ma'idek na kinyonyoanyo montanda'imo kahanda'mo monsilakai aku,
panyo aku na mompalahatikan ahi' atulan nu Belento.
96Tinoangkumo mau mule' anu sinukupmo hondo panyo ko batasnyo ahi',
ola palentah nu Belento na anu sukup hondo ka' madi' ko batasnyo.
Mongka'ima'i atulan nu Tumpu
97Talalo hondo ku ka'ima'i na atulan nu Belento;
ku tutugi sansina-sinaa.
98Saja' ku inau' na palentah nu Belento,
anu lebemo mompopande aku molingkudui iwi-iwi' na sampobali'ku.
99Anu ku pangalati'i molingkudui anu nu pangalati'i nu to gulu-gulu'ku,
kalana aku saja' montutugi palentah iwi-iwi' nu Belento.
100Aku na lebe mangalati' molingkudui to tu'a-tu'anyo,
kalana aku montoongi iwi-iwi' na anu pinutusanmo nu Belento.
101Ku pimpalimo iwi-iwi' na kalakuan anu ma'idek,
da aku tulu-tulutanmo hi pangajalan nu Belento.
102Aku madi' mongkolilimi atulan nu Belento,
kalana Belentomo na nompogulu' aku.
103Talalo hondo matami' na potatae nu Belento
nyamitnyo lebe matami' nulingkudui na juu' nu uani'.
104Iwi-iwi' na atulan nu Belento nompopangalati'mo aku,
sahingga aku nongka'idekimo kalakuan anu tageo'.
Atulan nu Tumpu mompojingkamo
105Potatae nu Belento ponsulu'i aku malalangkas
jingkanyo monjingkai aku lumajang.
106Anu jinanji'kumo ka' sinumpa'mo tionyo ku ganapi,
bau pintoongan i kaputusan nu Belento anu adin.
107Aku sinansalamo hondo, o, Tumpu,
jagaiakon mae na kantumuu'anku susumo anu jinanji'mo nu Belento.
108Talimakon na do'a bau pontalima kasengku, o, Tumpu,
ka' potinganakon mae na aku iwi-iwi' na atulan nu Belento.
109Aku saja'mo momboto'akon nyawangku,
panyo aku madi' mongkolilimi atulan nu Belento.
110Mian anu ma'idek na kinyonyoanyo nompokonamo so'o bau pohakop aku,
panyo aku madi' mosele mompala'i kaputusan nu Belento.
111Palentah nu Belento baumo pusaka'ku sampe toka sidu-sidutu',
anu nompolame'mo kinyonyoangku.
112Aku ko kahanda' montuluti atulan nu Belento
sampe toka i ka'ahenannyo nu kantumuu'anku.
Atulan nu Tumpu mompohoson kinyonyoa da madi' mabuhuk
113Aku mongka'ima'i iwi-iwi' atulan nu Belento,
ku ka'ideki na mian anu madi' totu-totu'u tulu-tulutan hi Belento.
114Belentomo na anu montinjohi mae ka' anu monjagai mae aku
aku montaha'imanimo anu jinanji' nu Belento.
115O, mian anu ma'idek na kinyonyoanyo boli mae ohani hi belengku!
Aku montulutimo palentah nu Tumpu Allah-ngku.
116Pohosonakon mae na aku susumo anu jinanji'mo nu Belento da aku tumuu',
boli opojohok dumo madi' ku humpak, na anu tinaha'imanankumo.
117Sangaja'i mae na aku da aku salamat,
ka' saja' mompalahatikan palentah nu Belento.
118Belento madi'mo mongala mian anu moselemo madi'mo montuluti atulan nu Belento,
ola palansuma na aha kahanda'mo mombatekai.
119Iwi-iwi' na anu ma'idek na kinyonyoanyo nu anggap nu Belento sumomo duhehe,
kalana aijo' ku ka'ima'i na atulan iwi-iwi' nu Belento.
120Aku ilangkakatanmo kalana nabuhukumo hi Belento,
kinyonyoangku nangada'mo kalana kaputusan nu Belento.
Tulu-tulutan i atulan nu Tumpu
121Aku nombaumo anu adin ka' anu totu'u,
boli obee' na aku hi lima nu mian anu mongewa mae.
122Balajanji'mo ahi' mae na Belento montulungi aku,
boli opojohok na aku osakisa nu to mia-mian anu takabun.
123Matangku naposmo na montanda'i pontulungi mae nu Belento da momposalamat mae,
ku tanda'imo da opobebas mae susumo anu jinanji'mo nu Belento.
124Opalentah mae na aku sitimbang tiba kalibosan nu Belento
ka' potinganakon mae na aku atulan nu Belento.
125Aku posaihon nu Belento, popangalati' mae na aku
da ku sumbu' na palentah nu Belento.
126O, Tumpu, tinokamo na tempo'nyo Belento mohukumo,
kalana to mia-mian nolanggaimo atulan nu Belento.
127Palentah iwi-iwi' nu Belento lebe ku ka'ima'i molingkudui mosoni',
molingkudui mosoni' anu madi' ko galo'nyo.
128Kalana aijo' aku tumuu'mo susumo pokinde' iwi-iwi' nu Belento;
kalakuan anu tageo' ku ka'ideki.
Kahanda' montuluti atulan nu Tumpu
129Iwi-iwi' naatulan nu Belento okabangangi hondo,
sahingga ku tuluti hondo-hondo nu kinyonyoangku.
130De otalangkan, pangajalan nu Belento mompojingka,
mompopangalati' mian anu madi' talalo pande.
131Kinyonyoangku nangada'mo,
kalana saja' mongindi palentah nu Belento.
132Siloi mae na aku ka' kalibosi mae na aku,
susumo belento mongkalibosi anu mongka'ima'i Belento.
133Pohosonakon mae na langkasku susumo anu jinanji'mo nu Belento,
boli opojohok na aku nukuasai nu kalakuan anu ma'idek.
134Pobebasakon mae na aku da boli nu sakisa nu to mia-mian na aku,
da timbali ku tuluti na palentah nu Belento.
135Balakatiakon mae na aku de Belento tokamo mae,
ka' potinganakon mae na aku atulan nu Belento.
136Lolu'ku no ilimo susumo kaunyo,
kalana atulan nu Belento madi'mo tinulutan.
Atulan nu Tumpu aijo' adin
137Belento adin, o, Tumpu
iwi-iwi' na atulan nu Belento kinonamo hondo.
138Iwi-iwi' na palentah anu binee'mo nu Belento
adin ka'timbali otaha'imani.
139Tambuha'ku ningobamo i uno nu butongku
kalana anu monsampobali' mae aku, nongkolilimimo pangajalan nu Belento.
140Anu jinanji'mo nu Belento mahoson ka' timbali opalesaya
talalo hondo ku ka'ima'i.
141Aku aiya ise' ka' madi' ko angga'nyo,
panyo aku na madi' ahi' mongkolilimi pangajalan nu Belento.
142Ka'adilan nu Belento tuu'an sampe toka sidu-sidutu',
ka' atulan nu Belento saja' totu'u.
143Aku tinokanmo nu kasansala'an ka' kasusa'an,
panyo atulan nu Belento na mompolame' kinyonyoangku.
144Atulan nu Belento saja' adin;
popangalati' mae na aku da aku tumuu'.
Do'a mongkakase da opobebas
145Totu-totu'u hondo na kinyonyoangku mongkakase hi Belento;
taami mae na aku o, Tumpu,
aku montulutimo palentah nu Belento.
146Aku momoitamo tulung hi Belento; posalamatakon mae na aku,
aku montoongimo atulan nu Belento.
147Subu-subu aku mobulamo ka' momoita tulung;
aku montaha'imanimo aku jinanji'mo nu Belento.
148Sampahu-pahu na aku tumudong
lewa mompotutugakon pangajalan nu Belento.
149Potombihingakon mae na aku kalana kalibosan nu Belento o, Tumpu
jagaiakon mae na kantumuu'anku kalana ka'adilan nu Belento.
150Mian anu mololoi' mae aku ingohanimo
aha ko niat ma'idek
ka' madi' mompajuli atulan nu Belento.
151Panyo Belento ingohanimo, o Tumpu,
iwi-iwi' na palentah nu Belento totu'u.
152Salatanmo pe'e naipuan mae sinumbu'kumo i pangajalan nu Belento iwi-iwi',
taalu' Belento nontantukanmo sampe toka sidu-sidutu'.
Do'a mongkakase da otulungi mae
153Toakon mae na kasansala'anku ka' posalamatakon mae na aku,
kalana aku madi' mongkolilimi atulan nu Belento.
154Tinjohiakon mae na palakalangku ka' pobebasakon mae na aku;
posalamatakon mae na aku susumo anu jinanji'mo nu Belento.
155Mian anu ma'idek na kinyonyoanyo madi' oposalamat,
kalana madi' tulu-tulutan hi atulan nu Belento.
156Talalo hondo daka' na kalibosan nu Belento o, Tumpu,
posalamatakon mae na aku susumo ka'adilan nu Belento.
157Manjoo' na mian anu monsampobali' mae aku ka' mololoi'mo mae aku,
panyo aku madi' mongkolilimi atulan nu Belento.
158Ku ka'ideki na montoa mian haha aijo' anu singkap palaganta
kalana aha madi' montuluti pangajalan nu Belento.
159Toa mae na aku talalo hondo mongka'ima'i palentah nu Belento, o, Tumpu,
posalamatakon mae na aku kalana kalibosan nu Belento.
160Iwi-iwi' na potatae nu Belento totu'u,
iwi-iwi' na atulan nu Belento anu adin tataap sampe toka sidu-sidutu'.
Monsombah atulan nu Tumpu
161To mia-mian anu balakuasa mololoi'mo mae aku maumo madi' ko sababnyo,
panyo ola atulan nu Belento na ku kabuhuk.
162Anu jinanji'mo nu Belento nompolame'mo aku
sumomo mian anu nohumpakmo halata'.
163Iwi-iwi' na anu madi' totu'u ku ka'ideki,
panyo atulan nu Belento ku ka'ima'i.
164Aku saja' sabole-boleh montalima kaseh hi Belento,
kalana atulan nu Belento anu adin.
165Mian anu mongka'ima'i atulan nu Belento madi' ko anu mompoposia ka' kinyonyoa madi' mangada',
madi' ko anu moko ala mongewa' aha.
166Aku montanda'imo kasalamatan anu lengkat hi Belento, o, Tumpu,
palentah iwi-iwi' nu Belento ku bau.
167Aku montulutimo atulan iwi-iwi' nu Belento,
ka' ku ka'ima'i totu-totu'u nu kinyonyoangku.
168Aku montulutimo palentah ka' pokinde' nu Belento,
kalana tinoamo mae nu Belento iwi-iwi' na palabuatanku.
Do'a mongkakase da otulungi
169O' amalakon da potataengku momoita tulung aiya toka hi Belento, o, Tumpu,
popangalati' mae na aku, susumo anu jinanji'mo nu Belento.
170De timbali da potataengku mongkakase aiya toka hi Belento,
posalamatakon mae na aku susumo anu jinanji'mo nu Belento.
171Aku saja'mo mompuji' Belento,
kalana Belento nompotinganmo aku atulan nu Belento.
172Aku kahanda'mo monyanyiakon apaa na anu jinanji'mo nu Belento,
kalana iwi-iwi' na palentah nu Belento adin.
173O' amalakon da Belento saja' sanang mae na montulungi aku,
kalana aku nompile'imo da montulutimo atulan nu Belento.
174Kinyonyoangku mongindimo kasalamatan lengkat mae hi Belento,
atulan nu Belento nompolame'mo kinyonyoangku.
175Bakas da aku tumuu', aku mompuji'mo Belento,
o' amalakon da atulan iwi-iwi' nu Belento montulungi mae aku.
176Aku tinalasmo ijalan sumomo domba anu nolapusmo,
jadi tokamo mae ka' liomo na posaihon nu Belento aiya,
kalana aku madi' mongkolilimi iwi-iwi' na palentah nu Belento.
Currently Selected:
MAZMUR 119: LAILOE
Highlight
Copy
Compare
Share
Want to have your highlights saved across all your devices? Sign up or sign in
