MAZMUR 118
118
Do'a pontalima kaseh kalana inguntungmo na nahampate
1 #
1Taw. 16:34, 2Taw. 5:13, 7:3, Ezr. 3:11, Mzm. 100:4-5, 106:1, 107:1, 136:1, Yer. 33:11 Pontalima kaseh hi Tumpu kalana Ia manonong,
kalibosan-Nyo sampe toka sidu-sidutu'.
2Tionyo ahi' nutaloakon nu mian Israel,
“Kalibosan-Nyo sampe toka sidu-sidutu'.”
3Tionyo ahi' nutaloakon nu to ima-imam,
“Kalibosan-Nyo sampe toka sidu-sidutu'.”
4Tionyo ahi' nutaloakon nu mian iwi-iwi' anu tulu-tulutan,
“Kalibosan-Nyo sampe toka sidu-sidutu'.”
5I uno nu kasansala'anku aku nongkakasemo hi Tumpu;
lantas Ia nontaamimo mae ka' nompobebasmo mae aku.
6 #
Ibr. 13:6
Aku madi' mabuhuk kalana Tumpu na monsangalui mae aku,
manusia madi' moko ala mombau apa-apaa hi belengku.
7Tumpu na nonsangalui mae aku kahanda' montulungi aku
aku montoamo sampobali'ku opatundu'mo.
8Sahanyo mihohung hi Tumpu,
ka' de mule' ola montakabunakon manusia.
9Sahanyo mihohung hi Tumpu
ka' de mule' ola montaha'imani to mia-mian daka'.
10Manjoo' na sampobali'ku montiikubimo mae aku;
kalana kakuasa'an nu Tumpu, aha pinatundu'kumo.
11Aha nontikumo mae aku madi'mo ko palaianku
kalana kakuasa'an nu Tumpu, aha pinatundu'kumo.
12Susumo uani' aha nongkampuhimo mae aku;
kalana kakuasa'an nu Tumpu aha pinatundu'kumo.
Ola sinangkinihap aha pinoho'mo
susumo apu anu nontoyo'imo kuhat anu ko hi'nyo.
13Aku pagalamo tinumbuhan mae totu-totu'u ka' pinipagalaanyomo
me sangkiding sinilakamo,
panyo aku tinulunganmo nu Tumpu.
14 #
Kel. 15:2, Yes. 12:2 Tumpu aijo'mo na kahosonanku ka' anu talalo ku puji',
Ia nomposalamatmo mae aku.
15Potombihing na taligala kiijo' i iwi-iwi na kemah nu mian anu palesayamo hi – Ia, kalana inguntungmo na nahampate.
“Tumpu nombaumo palabuatan anu daka' hondo!
16Kuasa nu Tumpu na nompo untung kita nahampate!
Tumpu nombaumo palabuatan anu daka' hondo.”
17Aku madi'mo silaka, panyo sabole-bolehmo tumuu'
da mombebakon kalaja nu Tumpu.
18Tumpu nonsakisamo aku totu-totu'u,
panyo Ia madi' nombee' aku i uno nu kapatean.
19Tuhea'akon mae na sabatan daka' i Laigan nu Tumpu
da aku minsoopmo ka' montalima kaseh hi Ia.
20Aiyamo na sabatan daka' nu Tumpu,
ola mian anu hodi' na kinyonyoanyo na timbali minsoop.
21Ku puji' na Belento, kalana Belento nonsitujuimo do'angku;
Belento nompo'untungmo aku nahampate.
22 #
Luk. 20:17, Kis. 4:11, 1Ptr. 2:7 #Mat. 21:42, Mrk. 12:10-11 Batu anu ingalinmo nu to tuka-tukang anu nombau laigan
tinimbalimo batu pinongusoi.
23Sumo aijo' na Tumpu nombau,
talalo hondo mompobangang kita.
24Aiyamo na sinaa anu tinantukanmo nu Tumpu
imbo' da olame'akonto totu-totu'u.
25 #
Mat. 21:9, Mrk. 11:9, Yoh. 12:13 Okakase mami Tumpu, posalamatakon mae na kami,
O, Tumpu, po'untungakon mae na kami, mahampate!
26 #
Mat. 21:9, 23:39, Mrk. 11:9, Luk. 13:35, 19:38, Yoh. 12:13 Balakatiakon mae na ia anu toka mae momboa mae sanggo nu Tumpu,
obalakatimo mami na belemiu nu balakat anu lengkat mae i Laigan nu Tumpu.
27Tumpu, aijo'mo na Tumpu Allah,
Ia manonong hondo hi kita.
Inda mambamo da kita balonda molame'akon ka' montoongi panga' nu kau' ko honnyo,
ka' montiikubi mezbah nu Tumpu.
28Belentomo na Tumpu Allah-ngku, aku montalima kaseh hi Belento,
O, Tumpungku, ku popodaka'mo na Belento.
29Pontalima kaseh hi Tumpu kalana Ia manonong,
kalibosan-Nyo sampe toka sidu-sidutu'.
Currently Selected:
MAZMUR 118: LAILOE
Highlight
Copy
Compare
Share
Want to have your highlights saved across all your devices? Sign up or sign in
