MAZMUR 120
120
Do'a mongkakase da otulungi mae
1Nyanyian mamba i tampat anu ko balakatnyo
I uno nu kasusa'anku, aku nongkakasemo momoita tulung hi Tumpu,
ka' tinaamannyomo mae na aku.
2O Tumpu, posalamatakon mae na aku
da boli opoposia nu mian anu baleko' ka' anu pangakali.
3O mian anu pangakali, apaa na nu bau nu Tumpu hi beleyum?
Apaa na anu bau pohukum-Nyo belemiu?
4Tiba pana' anu matajom nu mian anu mahampate
tiba oba nu apu anu noakmo!
5Silakamo na aha kalana tumuu'mo hingga-hinggat tiba beleyum;
madi' sala' sumomo ahi' jinojoong i Mesekh,
kabai hi aha mian nu Kedar.
6Pininmo hondo na aku jinojoong hingga-hinggat
tiba to mia-mian anu madi' mongka'ima'i dame.
7De aku mombisalakon dame
aha mongka'ima'i da mahampate.
Currently Selected:
MAZMUR 120: LAILOE
Highlight
Copy
Compare
Share
Want to have your highlights saved across all your devices? Sign up or sign in
