AMSAL 21
21
1Pokakana susumo Tumpu nongatun uee nukaunyo da mo'ili,
montuluti pongka'oho'Nyo, sumo aitu mule' na la mongatun pikilan nu tomundo.
2Batu-batu palabuatan nu mian, de ia na mosi oa'i tantu koonyo aijo' maima',
panyo Tumpu na anu monsumbu' isi nu kinyonyoanyo.
3Palabuatan anu adin ka' totu'u lebe momposanang Tumpu
molingkudui iwi-iwi' na anu opalasombahkon.
4Mian anu ma'idek na kinyonyoanyo aijo' baladosa',
kalana nukuasaimo nu takabun ka kobubuun.
5Tanga'an nu mian anu makeke mongahenakon molabi-labi;
usaha anu ko sia-sia' monsaduakon da madi' kokasukupannyo.
6Kakaya'an anu i humpak kalana katageo'an nu kinyonyoa
malia' hondo molapus ka' momboa mian i bolo' nu kubun.
7Mian anu ma'idek na kinyonyoa madi' mongka'oho' montuluti atulan;
ia sakisa kalana posi kabuhingisannyo na monsakisa.
8Mian anu ko sala'nyo, ia lumajang minggeo-geo'
mian anu manonong saja madi tageo' na kantumuu'annyo.
9Jojoong i pasu'nyo nu loteng lebe sanang;
ka'de mule' jojoong hingga-hinggat isa'angu' nalaigan tiba bengkele' anu mongka'ima'i painggaga.
10Mian anu ma'idek na kinyonyoanyo saja' mongka'ima'i mombau palabuatan ma'idek
maumo pa' hi he madi' ko kalibosannyo na ia.
11Hukuman ko na hi mian anu lewa' mombusiki sanggo nu mian timbali bau pangajalan hi mian anu madi' ko anu nu pisumbu-sumbu'.
De mian anu manonong opokinde'i, ia mompaka pandemo.
12Tumpu Allah Anu Talalo hondo adin monsumbu' apaa na anu jinadimo i laigan nu anu palaganta.
Ia na montua aha sahingga aha silakamo.
13Ihe na madi' mongka'oho' mohongo tusa' nu mian anu kinaku langanmo
madi' opolahatikan de ia na momoita tulung.
14Da bau pompoho'i pusa ka' tambuha',
bee'imo palasen hoko-hokot.
15De ka'adilan opojalan
saba' mian anu manonong mongoa'imo sanang,
panyo mian anu ma'idek na kinyonyoanyo na mabuhukmo ahi'.
16Mian anu madi' mombatuki mosia na kantumuu'an nu mian anu manonong,
tantu saidi mae tokamo i dunia nu mian anu sinilakamo.
17Mian anu mongka'ima'i ola bala sanang, saidi mae tataap kakulangan;
mian anu mongka'ima'i ola molewa-lewa' madi' koko jadi kaya.
18De mian da'isan nu hukum nu Tumpu,
misa' mian anu manonong, panyo mian anu ma'idek na kinyonyoanyo na mohumpak kasusa'an.
19Lebe ma'ima'jojoong i tano anu mateges
ka'de mule' jojoong tiba bengkele' anu ola saja' motawewe ka' lewa' motambuha'.
20Mian anu pande tataap tumuu' bilahi ka' molabi
panyo mian anu ponga' ola lewa' mombeasakon halata'nyo.
21Ihe na balausaha da ka'adilan ka' mompaha kali-kalibosi obau,
saidi mae mohumpak kantumuu'amu bilahi, kaholomatan, ka' mantan na umun.
22Mian anu pande na monggoliliakon moko ala mompatundu kota' anu nu jagai nu suludadu anu baani hondo,
nu hobo'akon na to bente-benteng anu nutakabunakon nu aha.
23Da boli nu tokai mae nu kasusa'an,
tionyo ahi' obala'ingati na anu otaeakon.
24Mian anu kobubuun ka' talalo hondo matangkas na kinyonyoa
mongka'ima'i mongalu ka' madi' ko adatnyo.
25Anu moluluk madi mongka'oho' mokalaja;
nu posi patei na butongnyo nu hahan anu nukamilui.
26Sansinaa-sinaa ia ola ahi' mompopikilakon
mongkona apaa na anu nuka milui.
Pada han mian anu madi' tageo' nakinyonyoanyo
moko ala mombee'i molabi-labi.
27Tumpu madi' sanang i palasombahan nu mian anu palaganta
lebe-lebe mule, de monsombahkon aijo ko makisud ma'idek.
28Katalangan nu anu baleko' madi'timbali opalesaya;
panyo katalangan nu mian anu monsumbu' bau-baunyo nu palakala, timbali otalima.
29Mian anu madi' tageo' na kinyonyoanyo nu palesaya totu-totu'u na butongnyo;
mian anu ma'idek na kinyonyoanyo madi' mosumbu' ma'ambang.
30Madi' ko kapandean, ilimu', kabai kapandean mompopikilakon
anu moko ala balatahan i ahop nu Tumpu.
31Maumo i pahampatean oposukup nu ajahan na posadiaon bau pahampate,
anu montantukan ka'untungan mahampate ola ahi' samata-mata Tumpu.
Currently Selected:
AMSAL 21: LAILOE
Highlight
Copy
Compare
Share
Want to have your highlights saved across all your devices? Sign up or sign in
