AMSAL 20
20
1Inumon anu moko palangu mombau mian madi'mo mingadat ka' lewa'mo hengge'.
Ponga' ahi' na mian anu monginum sampemo malangu.
2Tambuha' nu tomundo' sumomo polohu' nu singa,
mian anu monsaduakon da ia motambuha' alati'nyo monsilakai posi butongnyo.
3Ola ahi' mian anu ponga' na mongka'ima'i mahanggaga;
kalakuan anu o puji' aitumo mongawahi pahanggagan.
4Anu topo bau ale' anu moluluk madi' mokalaja ale'nyo de tokamo na lonunyo
ahennyo de tempo'mo nu pompadakan ale'nyo madi' ko hasinnyo apa-apaa.
5Apaa na anu i kinyonyoa nu mian lapangnyomo uee nu bubung anu maleeng;
panyo timbali nu tauk nu mian anu mangalati'.
6Manjoo' na mian anu mangaku butongnyo salaku sangalu
panyo anu totu-totu'u tulu-tulutan, mahan na okabot.
7To ana-anak untung hondo de ko tuumanyo
anu manonong ka' kantumuu'annyo madi' tageo' na kinyonyoa.
8De tomundo sumuhangmo i kulusi pomputusian palakala,
nu toa iwi-iwi' na anu ma'idek na kinyonyoanyo.
9Daagi' ko mian, anu moko ala motatae
“Kinyonyoangku belesi, aku madi'mo binala dosa'?”
10Pontimbang ka' pongukun anu mongakali
madi' nuka'ima'i nu Tumpu.
11Palabuatan nu anak timbali osumbu'
pa' kalakuannyo ma'ima' ka' madi' tageo'.
12Bihing bau pohongo ka' mata bau pontoa
ohu-ohua' aijo' Tumpu na nompo timbali.
13Mian anu ola mongka'ima'i hoyot timbali kasiasi.
Mian anu makeke na mokalaja ko kaanon manjoo'.
14Anu mongoli saja' motusa' kalana halaga'nyo mahan.
Panyo salatan ingolinyomo sanangmo na ia ihalaganyo nu balang anu ihumpaknyomo aijo'.
15Potatae anu ko isinyo ilimu',
lebe ko halaga'nyo molingkudui' mosoni' tiba intan.
16Ihe na mongka'oho' montanggungi samaya' nu mian sangga'at,
timbali o'ala na halata'nyo salaku bau ponggadei anu jinanji'nyomo.
17Halata' anu ihumpak ola kalana nongakali, momonanyo matami'na o'oa'i
panyo ahennyo mae o'oa'i sumomo bone'.
18Tanga'an ko hasinnyo kalana pinopikilakon mo;
kalana aijo' boli pe'e mombau apa-apaa de madi' opopikilakon pe'e ma'i-ma'ima'.
19Mian anu sanang lewa' monsisik mian sangga'at, madi' moko ala monguna' lahasia;
boli mogandi-gandi tiba mian anu ola' manjoo na potatae.
20Mian anu montotobi'akon tu'anyonyo, kantumuu'annyo madi'tuusan,
sumomo sulu' anu mompoho' mo i pihi anu pinikatmo.
21Halata' anu monanyo sampa i humpak lia-lia'
ahennyo taalu' misa' balakat.
22Boli mombalosi ka'idekan tiba ka'idekan
palesaya na Tumpu, Ia na anu montulungije.
23Timbangan ka' batu timbangan anu madi' totu'u
madi' nu talima nu Tumpu.
24Noko tantukanmo nu Tumpu na jalan kantumuu'an nu manusia i dunia aiya;
mokonyo aijo' mausia madi' moko ala monsumbu' jalan nu kantumuu'annyo.
25Maisa pe'e monjanji monsombahkon koloban hi Tumpu opikin mo ahi ima'-ima'.
Da boli beleyum mompele-pele' imihinyo mae.
26Tomundo anu pande monsumbu' ihe na mian anu ma'idek nakinyonyoanyo;
ia mohukumje aha madi' ko ampunnyo.
27Kinyonyoa nu manusia sumomo jingka anu lengkat mae hi Tumpu.
Anu monjingkai songko-songko na kinyonyoa.
28De Tomundo mompalentah nu kinyonyoa anu moliboa, hodi ka' adin,
saba' ia tataap balakuasa.
29Mian anu daagi' olitau o'akui kalana kahosonannyo,
ka' mian anu tu'anyomo o'angga'i kalana uanonmo.
30Toto minsan kasusa'an anu o'oa'i mongalini palabuatan anu ma'idek,
ka' mompobelesi' kinyonyoa nu manusia.
Currently Selected:
AMSAL 20: LAILOE
Highlight
Copy
Compare
Share
Want to have your highlights saved across all your devices? Sign up or sign in
