AMSAL 22
22
1Mian anu madi' ko palabuatan maidek lebe ko angga'nyo nulingkudui na halata' anu manjoo';
nu kalibosi nu mian lebe ma'ima' nulingkudui naobee'i salaka' tiba mosoni'.
2Mian kaya ka' mian anu kasiasi daagi ko sa'angu' na han anu pokakana:
Tumpu na anu nompotimbali aha iwi-iwi'.
3Mian anu pande mongawahi de montoa mo anu monsilakai
mian anu ponga' lumajang lau-laus lantas nukonamo nu balaa'.
4Mian anu tulu-tulutan hi Tumpu ka' madi' buulon,
saidi mae mohumpak kabilahian, ka' oholomati.
5Pohakop ka' pontua daagi hijalan nu mian anu geguan,
patijoko'oni iwi-iwi' aijo' de beleyum mongka'oho' da salamat.
6Pangajali na samian na anak ijala-jalan nu kantumuu'an anu patut hi ia;
sahingga de toka'mo na tempo'nyo de ia langkai'mo kabai bengkele'mo kantu-kantumuu'annyo montulutimo sumo aijo.
7Mian anu kasiasi nu kuasai nu mian anu kaya;
mian anu monsabon nukuasai numian anu momposabonakon.
8Mian anu motugan kageguanan mompadak hasinnyo balaa',
ahennyo kuasanyo kahanda' buhingison saidi mae lanyapmo.
9Mian anu manonong nu balakati nu Tumpu
kalana Ia mombee'i dale' hi mian anu madi' ko apa-apaanyo.
10Laa' na mian anu kahanda' mongambangi
sahingga belentimo na painggagan, po'ualian ka' paingalu-aluan.
11Mian anu mongka'ima'i kinyonyoa anu madi' tageo' ka' madi kasan na potataenyo,
timbali bau sangalu nu tomundo.
12Momponyata kabaleko'an nu mian anu geguan,
nu halagai nu Tumpu da ilimu' anu totu'u tataap ma'ima'.
13Anu moluluk mongka'ima'i jojoong i laigan;
ia notatae, “Daagi' ko singa i sambiha'nyo, aku nu sa'umo i tonga' nu jalan.”
14Ponsale'i nu mian anu lewa' masala' sumomo bau mohakop;
mian anu nu tambuha'i nu Tumpu nanabu'mo i unonyo.
15Pantasnyomo na to ana-anak mombau hahan anu madi' totu'u,
panyo pondoke moko ala mongajan aha da obabali'i na kalakuan.
16Ihe na mongka'oho' timbali kaya,
tiba jalan monsansala mian anu kasiasi ka' mombee'i palasen hi mian anu kaya,
imihinyo mae timbalimo kasiasi hondo.
Tolumpulu' na pokinde' numian anu pande hondo
17Potombihing mae aku mongajanakonmo hi beleyum pokinde nu mian anu pande na bapkin. Palahatikan na pangajalanku. 18Beleyum saidi mae sanang de pangajalanku aijo' nu una' i kinyonyoa nu beleyum. Kalana tiba jalan anu sumo aijo' beleyum sinadiamo de beleyum ka'oho'mo mompake. 19Aku mongajanakon mo hi beleyum uuka aiya kalana aku mongka'oho da beleyum palesaya' mo hi Tumpu. 20Tolumpulu' na pokinde' noko tuliskumo obee' hi beleyum, to poki-pokinde' anu ko ilimu'nyo ka' pokinde' anu ma'ima'; 21ka' mian anu mongajanakon hi beleyum apaa na anu totu-totu'u madi' sala'. Saidi' mae, de beleyum opokilawa, beleyum timbali montaami potaam anu madi sala'.
– 1 –
22Boli mompolugi' mian anu kasiasi, ola kalana ia madi' mahoson ka' i pomputusian palakala boli mongagoi anu nu mian anu madi' moko ala mombau apa-apaa. 23Kalana, Tumpu na monsangaja'i palakala nu aha ka' mongala napas nu mian anu mombee'i kasansala'an aha.
– 2 –
24Bolimo mosangalu tiba mian anu mongka'ima'i pusa ka' sampa pusa. 25Dumo beleyum montiho ia, ka' madi' mo timbali mule' montibahakon kabiasa'an aijo'.
– 3 –
26Bolimo balajanji' montanggungi samaya' nu mian sangga'at. 27Saidi mae de beleyum madi'mo moko ala mombayali, kamale'an nu beleyum nu ala mo nu aha.
– 4 –
28Boli hondo-hondo molalin tempas nu tano' anu noko potataapmo nu mompolee' miu.
– 5 –
29Toho'mo beleyum nontoa mian anu pande na mombau pakalaja'annyo? Mian aijo' opokalajamo i jojoongan nu to tomu-tomundo, misa'mo ola i laigan nu mian biasa.
Currently Selected:
AMSAL 22: LAILOE
Highlight
Copy
Compare
Share
Want to have your highlights saved across all your devices? Sign up or sign in
