AMSAL 16
16
1Manusia timbali mombau sa'angu' na tanga'an
panyo Tumpu Allah na mombee'i kaputusan.
2Batu-batu palabuatan nu mian tantu ugaat ma'ima' na nu oa'i;
panyo Tumpu na monsumbu' isi nu kinyonyoanyo.
3Asanakon hi Tumpu iwi-iwi' na tanga'an nu beleyum;
sahingga kohasinnyo na beleyum mokalaja.
4Sinin na apaa na anu nu bau nu Tumpu ko makisud-Nyo;
ka' makisud nu mian anu ma'idek na kinyonyoanyo ola kasilakan.
5Iwi-iwi' na mian anu takabun nu ka'ideki nu Tumpu;
Ian madi' mompojohok aha da madi' ohukum.
6Mian anu tulu-tulutan hi Tumpu Allah mohumpak ka'ampunan;
mia anu tulu-tulutan hi Tumpu madi' mombau palabuatan anu ma'idek.
7De beleyum momposanang kinyonyoa nu Tumpu;
iwi-iwi' na sampo bali' nu beleyum Nu potimbali sangalu nu beleyum.
8Lebe ma'ima' ola sangkiding na pandapatan asan ohumpak nu kinyonyoa anu madi' tageo';
boli pandapatan manjoo' padahan ohumpak nu palabuatan anu madi' adin.
9Manusia timbali mombau tanga'an;
panyo Tumpu Allah na montantukan jalan nu kantumuu'annyo.
10Tomundo' montalima kuasa lengkat mae hi Tumpu Allah;
jadi ia madi' sala' i uno nu kaputusannyo.
11Tumpu mongkahanda'i mian anu madi' tageo' na kinyonyoanyo ihan badagang;
ka' mule' monggunakon timbangan ka' ihan monsukat.
12Hi aha anu balakuasa de mombau anu ma'idek aijo' han anu madi' ma'ima';
kalana pamalentahannyo mahoson aijo' kalana ka'adilan.
13Katalangan anu totu'u momposanang anu balakuasa;
ia mongkalibosi mian anu motatae madi' tageo'.
14Tambuha' nu tomundo' salakumo lele nu hukuman mate;
mian anu pande mongusahakon da mohuhusi tambuha'!
15Nonongnyo nu kinyonyoa nu tomundo mompodaagi' kasanangan nu kantumuu'an;
susumo kundom montudunakonmo ujan itempo' nu posinaa.
16Mohumpak kapandean bapikin nu lingkudui na mohumpak mosini';
mohumpak ilimu' lebe ko angga'nyo nu lingkudui na mohumpak salaka.
17Mian anu manonong matikojo'on ipalabuatan anu ma'idek;
mian anu mompalahatikan kantumuu'annyo alati'nyo monjagai butongnyo.
18Mian anu takabun mohumpak kahansunan;
kobubuun ahennyo madi'mo ohalagai.
19Lebe ma'ima' boli takabun ka' madi' ko halata';
ka' de ola mule' mombatuki mian anu takabun ka' mompake halata' nu mian anu ingagoan.
20Palahatikan apaa na anu ingajanakonmo hi beleyum sahingga beleyum saidi' mae mohumpak apaa na anu ma'ima'.
Palesaya hi Tumpu sahingga beleyum mohumpak kabilahian.
21Mian anu pande osumbu' ipikilanyo anu matajom;
potataenyo na monsabapi sanang na mohongo.
22Kapandean aijo'mo na pinolengkatan mae nu kabilahian nu kantumuu'an nu mian anu manonong.
Panyo mian anu ponga' nu sakisa nu posi kaponga'annyo.
23Pikilan nu mian anu manonong mombau potataenyo pande;
ka' pangajalannyo lebe mombau da opalesaya.
24Potatae nu anu madi' kopesa-pesa sumomo juu' nu uani';
nyamitnyo matami' ka' mule' mokopahoson butong.
25 #
Ams. 14:12
Daagi ko jalan anu otoa hodi' hondo;
panyo imihinyo mae jalan aijo' mompanjolongi kasilakan.
26Mongkahanda'i mongkaan mongkakeha'i mian da bala usaha;
kalana monginau' ohop sahingga talapakisa bakalaja na ia.
27Mian anu ma'idek na kinyonyoanyo bala usaha monsilakai sangalunyo;
potataenyo ma'idek hondo sumomo ahi' oba nu apu.
28Mian anu madi' adin monsaduakon painggagan;
anu momboa-boa sisik ma'idek hi sangalu mongga'atakon sampo bela' anu mompahakona hondo.
29Mian anu buhingison mombaleko'i to sanga-sangalunyo;
ka momboa aha i uno nu kasilakan.
30Obala'ingati na mian anu tolomoing ka' mongkinta-kinta'i;
ia kotanga'anmo anu ma'idek i uno nu kinyonyoanyo.
31Mian anu madi' tageo' na kinyonyoanyo saidi mae obee'i mantan na umun;
uan nu ubaknyo sumomo makota' anu talalo hondo ma'ima'.
32Madi' sampa pusa lebe ma'ima', nu lingkudui na anu ko kakuasa'an
mongkuasai lebe ma'ima' nu lingkudui na anu mompatundu' kota'.
33Da osumbu' na nasip nu manusia, mombuang onde;
panyo anu montantukan hasinnyo ola ahi' samata-mata Tumpu.
Currently Selected:
AMSAL 16: LAILOE
Highlight
Copy
Compare
Share
Want to have your highlights saved across all your devices? Sign up or sign in
