KAJADIAN 26
26
I Ishak jinojoongmo i Gerar
1I lipu' aijo' po'ule' mule' tinoka na tempo' nu kasusa'an i anu okaan, susumo anu toho'mo jinadi tempo'nyo hi Abraham. I Ishak nangadapmo hi Abimelekh, tomundo nu aha mian nu Filistin anu kiijo' i Gerar, ka' nomoita da opobee' jojoong kiijo' mae. 2Han aijo' binaunyo kalana Tumpu nanintoamo hi ia ka' notatae, “Boli mamba mokiijo' i Mesir; jojoongmo i lipu' aiya susumo anu pinalentahkon-Kumo hi beleyum. 3#Kej. 22:16-18 Ku jagaije na beleyum ka' ku balakati. Songko-songko na da'erah aiya Ku bee'mo hi beleyum ka' hi lee' nu beleyum. Ku ganapije na janji' anu binee'-Kumo hi Abraham tuuma nu beleyum. 4Ku bee'ije na beleyum lee' sumo mandala' i langit na konjoo'nyo, ka' songko-songko na da'erah aiya Ku bee'mo hi aha. Iwi-iwi' na bansa i dunia aiya mompoitaje hi beleng-Ku da Ku balakati na aha susumo Aku mombalakatimo lee' nu beleyum. 5Ku balakatije na komiu, kalana i Abraham nontulutimo Aku ka' nompo'imboamo iwi-iwi' na atulan ka' palentah-ngKu.”
6Jadi jinojoongmo na i Ishak kiijo' mae i Gerar. 7#Kej. 12:13, 20:2 Salatan mian haha kiijo' mae lewa'mo noleleki i Ribka, i Ishak nontaami tukoonyo, aijo' utus ise'nyo misa' bengkele'nyo. I Ishak nabuhuk mo hi mian haha aijo' dumo saidi' mae nu pateimo nu aha na ia ka' nu alamo nu aha na i Ribka anu handa hondo aijo'. 8Salatan i Ishak jinojoongmo kiijo' mae gagana'mo pinin, daagi' kino sansinaan i Tomundo Abimelekh nontanggalakon lengkat mae i tolongan nu laigan, tinoanyomo na i Ishak hau-haunyo biang ka' i Ribka. 9Sahingga i laganyo na i Ishak ka' ia notatae, “Te misa' boune aijo' bengkele' nu beleyum? Kadaka' nu poto'i tukooyum ia utus ise' nu beleyum?”
Tinaaman i Ishak, “Ku tutugi, saidi' mae dumo aku opatei de ku poto'i ia aijo' bengkele'ku.”
10“Apaa na anu binaumo nu beleyum hi kami?” na koonyo i Abimelekh. “Sala'samian na layatku timbali ahi' hoyot tiba bengkele' nu beleyum, ka' de han aijo' timbali beleyum na montanggungi kasala'an mami aijo'.” 11Lapas aijo' i Abimelekh nompokinde' imo iwi-iwi' na layatnyo sumo uuka, “Ihe na monggeguani mian aiya kabai bengkele'nyo, tionyo o hukum mate.”
12I Ishak nonsaumo bine' nombaumo ale' i lipu' aijo', ka' i taun aijo' nohumpak hasinnyo i lipat pininsa'atu na nolingkudui anu sinaunyo, kalana binalakatanmo nu Tumpu na ia. 13Kakaya'annyo nompaka pintuangmo ka' ia kinayamo hondo. 14Mian nu Filistin nongka'idekimo ia kalana ia ko posaihon manjoo', pahasan nu domba ka' sapi'. 15Lantas pinaha tabuhanmo nu aha nu tano' iwi-iwi' na bubung anu kinekemo nu to posa-posaihon i Abraham tempo'nyo ia daagi' tutuu'.
16Lapas aijo' i Abimelekh notataemo hi Ishak, “Lako' pala'imo na lipu' mami. Beleyumo na lebe ko kuasa molingkuduimo kami.” 17Jadi nambamo na i Ishak ka' nombaumo kemah i Bangka'nyo nu Gerar. Ikiijo' ia jinojoongmo gagana' pininmo. 18Ia po'ule'mo nongkekei to bubu-bubung anu kinekemo tempo'nyo i Abraham ka' anu tinabuhanmo nu tano' nu mian Filistin salatan pinala'ianmo i Abraham. Bubung haha aijo' sinanggohannyomo pokakana susumo pinonsanggohi nu tuumanyo.
19To posa-posaihon i Ishak nongkekemo bubung i Bangka'nyo nu Gerar aijo', ka' nohumpakmo uee manjoo' hondo. 20Panyo to pola-polaya' binatang anu kiijo' i Gerar pinainggagamo tiba to pola-polaya' binatang i Ishak. Aha notatae, “Uee aiya kami na tumpunyo.” Kalana aijo' i Ishak nonsanggohimo bubung haha aijo', “Painggagan.”
21To posa-posaihon i Ishak po'ule' mule' nongkeke bubung sangga'at, sahingga jinadi mule' na painggagan mongkona bubung aijo'. Kalana aitu, i Ishak nonsanggohimo bubung aijo', “Mompaha bali'”. 22Lapas aijo' ia nolalinmo lengkat ikiijo, ka' nongkeke mule' bubung anu ko pintolunnyomo. Uuka aiya madi'mo ko painggagan. Kalana aitu, i Ishak nonsanggohimo bubung aijo', “Binebasmo”. Ia notatae, “Uuka aiya Tumpu nompobebasmo kita da jojoongmo i lipu' aiya, ka' kita timbalimo sanang i aiya.”
23Lapas aijo' i Ishak nambamo ka' tinokamo i Bersyeba. 24Pihi-pihi aijo' Tumpu nanintoamo hi ia ka' notatae, “Akumo na Tumpu Allah nu tuuma nu beleyum i Abraham. Boli mabuhuk; Ku jagaije na beleyum. Ku balakatije na beleyum ka' mombee'i beleyum lee' manjoo' kalana anu jinanji'-Kumo hi posaihon-Ku i Abraham.” 25Lantas i Ishak nompotinjomo mezbah ka' nonsombah Tumpu i tampat aijo'. Ia nombau kemah ikiijo' ka' to posa-posaihonnyo nongkekemo bubung sangga'at.
I Ishak ka' i Abimelekh binalajanji'mo
26 #
Kej. 21:22
Daagi' kino sansinaan i Abimelekh tinokamo lengkat mae i Gerar, tiba i Ahuzat, anu saja' mombee'i pokinde' ia, ka' i Pikhol, kapala nu suludadunyo da singkabot tiba i Ishak. 27Sahingga pinokilawamo i Ishak, “Kadaka' komiu tokamo mae singkabot tiba aku uuka aiya, padahan u'utu mae komiu mongewa aku ka' nolaa'mo mae da opala'i mae na lipu' miu?”
28Lantas tinaamanmo nu aha, “Uuka aiya sinumbu'mo mami taalu' Tumpu monjagai beleyum ka' kami binapikinmo lebe ma'ima' kita balajanji'mo. Basumpa'mo 29saba' beleyum madi' mombau idek hi kami, susumo kami suele madi' toho' nombau idek hi beleyum. Kami nombaumo ima' hi beleyum ka' nompobee'mo beleyum namba ima-ima'. Nanasamo hi kami taalu' beleyum nubalakati nu Tumpu.” 30Lapas aijo' i lagamo i Ishak mongkaan na aha, ka' aha nongkaanmo ka' nonginumo. 31Dodododopnyo subu-subu toto samian nontaloakonmo palajanjian anu pinkododomo nu sumpa'. Lantas i Ishak nontaloakonmo pia mae i jalan, hi aha, ka' noga'a-ga'atmo na aha salaku mian anu nobela'mo.
32I sinaa aitu mule' to posa-posaihon i Ishak tinokamo ka' nonsisik hi ia mongkona bubung anu kinekemo nu aha. Koonyo nu aha, “Kami nohumpakmo uee”. 33Lantas i Ishak nonsanggohimo bubung aijo', “Sumpa'.” Aijo'mo na pinolengkatan momonanyo sahingga kota aijo' sinanggohanmo Bersyeba.
To bengke-bengkele' i Esau anu lengkat mae i tulunan nu bansa anu i salipu'an
34Salatan i Esau umunnyo patompulu'mo na taun, ia no'osoamo tiba ohua' na langkoyang lengkat mae i tulunan bansa nu Het, aijo' mo i Yudit anak i Beeri, ka' i Basmat anak i Elon. 35Ua-ua'aha na boune aijo' nonsusa'i hondo kantumuu'an i Ishak ka' i Ribka.
Currently Selected:
KAJADIAN 26: LAILOE
Highlight
Copy
Compare
Share
Want to have your highlights saved across all your devices? Sign up or sign in
