KAJADIAN 25
25
Lee' i Abraham hi bengkele'nyo sangga'at
(1Taw. 1:32-33)
1I Abraham po'ule' mule' no'osoa tiba samian na boune sanggonyo i Ketura. 2Bengkele'nyo aijo' nohampeakon to ana-anak sanggonyo: I Zimran, i Yoksan, i Medan, i Midian, i Isybak, ka' i Suah. 3I Yoksan tuuma i Syeba tiba i Dedan, ka' lee' i Dedan aijo'mo mian nu Asyur, mian nu Letus ka' mian nu Leum. 4To ana-anak i Midian aijo'mo; i Efa, i Efer, i Henokh, i Abida, ka' i Eldaa. Aha iwi-iwi' lee' i Ketura.
5Maumo i Abraham nombee'mo iwi-iwi' na halata'nyo hi Ishak, 6tempo'nyo ia daagi' tutuu' ia nombee'imo palasen manjoo' hondo hi to ana-anak anu i humpaknyo hi to bengke-bengkele'nyo sangga'at. Lapas aijo' pinokaunyomo na to ana-anaknyo haha aijo' da molalinmo i da'erah sasu kabete'an Kana'an da matikojo'on hi Ishak anaknyo.
I Abraham sinilakamo ka' i lamunmo
7-8I Abraham sinilaka umunnyo i langkai'mo hondo, tempo'nyo aitu ia 175 mo na taun. 9Ia i lamunmo nu to ana-anaknyo, aijo'mo i Ishak ka' i Ismael, i liang Makhpela tampatnyo, i ale' sasu kabete'an Mamre. U'utu mae ale' aijo' tumpunyo i Efron anak i Zohar, mian nu Het, 10#Kej. 23:3-16 panyo ingolimo i Abraham hi mian nu Het aijo'. I Sara bengkele' i Abraham, suele i lamun kiijo' mae. 11Salatan i Abraham sinilakamo, Tumpu Allah nombalakatimo i Ishak anak i Abraham. Tempo'nyo aitu i Ishak jinojoongmo koko bubung anu osanggohi, “Ia Anu Mompalahatikan mae Aku”.
Lee' i Ismael
(1Taw. 1:28-31)
12I Ismael aijo'mo na anak i Abraham hi Hagar, boune nu Mesir, posaihon i Sara aijo'. 13-16I Ismael ko anak sampulu' ka' ohua', anu sinanggo i aiya tinampu'unan hi utus tu'a ka' lundu-lunduannyo: I Nebayot, i Kedar, i Adbeel, i Mibsam, i Meisyma, i Duma, i Masa, i Hadad, i Tema, i Yetur, i Nafis ka' i Kedma. To ana-anak haha aijo' tinimbalimo mompolee' nu sampulu' ka' ohua' na tulunan nu bansa, ka' kampung ise' ka' pombauan nu aha kemah osanggohimo susumo sanggo nu aha haha aijo'. 17I Ismael sinilaka umunnyo 137 mo na taun. 18Lee'nyo jinojoongmo i daerah olot nu Hawila ka' Syur i sasu kabete'an Mesir mompatui mokiijo' i Asyur. Aha tinumuu' madi' notuang tiba lee' i Abraham sangga'at.
Kinahampean i Esau ka' i Yakub
19Aiyamo na sisikon i Ishak, anak i Abraham. 20I Ishak umunnyo patompulu' mo na taun salatan ia no'osoamo tiba i Ribka, utus ise' i Laban, anak i Betuel, mian nu Aram lengkat mae i Mesopotamia. 21Kalana i Ribka madi' nohumpak anak, i Ishak nondo'akonmo bengkele'nyo hi Tumpu. Ka' Tumpu nompopo ii'mo do'a i Ishak, sahingga i Ribka pinoboamo. 22Ia pinoboa anak i hapi', ka' ma'isa pe'e anak haha aijo' i hampe', aha nongkohenggomo i uno nu ma'alumnyo. I Ribka notataemo, “Kadaka' han aiya jinadimo mae hi butongku?” Lantas ia nompoitamo tanga'an hi Tumpu.
23 #
Rm. 9:12
Tumpu notataemo hi ia,
“Ohua' na bansa i uno nu ma'alum nu beleyum;
beleyum mohampeakon ohua' na bansa anu saja' mompaha idek;
utus ise' lebe mahoson molingkudui utusnyo tu'a
utusnyo tu'a timbali posaihon hi utusnyo tampalui'.”
24Tinokamo na tempo'nyo i Ribka mompohampemo, lantas ia nohampeakonmo ohua' na anak mo'ane hapi'. 25Anu tumpe butongnyo mohaha, ka' kilitnyo sumo juba' anu ko bulunyo. Kalana aijo' ia sinanggohanmo i Esau. 26Salatan anak ko ohua'nyo pinohampemo, limanyo kanyi-kanyinyit i pantigan hi Esau. Kalana aijo' ia sinanggohanmo i Yakub. I Ishak umunnyo anompulu'mo na taun tempo'nyo aha i hampe'.
I Esau nompobalukmo haknyo salaku anak tumpe
27Ua-ua'aha na anak aijo' kino daka-daka'nyomo. I Esau tinimbalimo anu pande na mombebas ka' anu saja' mongka'ima'i jojoong i padang bola, panyo i Yakub pakamok ka' mongka'ima'i jojoong i laigan. 28I Ishak mongkalibosi hondo i Esau, kalana i Ishak mongka'ima'i mongkaan ponoha' anu o bebas. Panyo i Ribka mongkalibosi hondo i Yakub.
29Daagi' kino sansinaa tempo'nyo i Yakub hau-haunyo mongkola' utan bue momea', tinokamo na i Esau lengkat mae nombebas. Ia no'ohopmo. 30Ia notatae hi Yakub, “Aku no'ohopmo hondo. Bee'i mae sangkiding bue momea' aijo'.” (Mokonyo aijo' ia osanggohi i Edom.)
31Tinaaman i Yakub, “Ii', asan nu bee' pe'e mae momona na hak nu beleyum salaku anak tumpe.”
32Notatae na i Esau, “Apaa na gunanyo hak aijo' hi belengku. Aku no'ohopmo mompai patemo!”
33 #
Ibr. 12:16
Notatae mule' na i Yakub, “Basumpa' pe'e momona, beleyum motatae, hak nu beleyum obee'mo mae hi belengku.”
I Esau binasumpa'mo ka' nombee'mo haknyo hi Yakub. 34Lapas aijo', i Yakub nombee'imo ia roti, ka' sambagian na utan bue momea' aijo'. I Esau nongkaanmo ka' nonginumo lantas nambamo. Sumo aijo' na i Esau madi'mo nontapali haknyo salaku anak tumpe.
Currently Selected:
KAJADIAN 25: LAILOE
Highlight
Copy
Compare
Share
Want to have your highlights saved across all your devices? Sign up or sign in
