KAJADIAN 27
27
I Ishak nombalakatimo i Yakub
1Daagi' kino sansinaan, salatan i Ishak i langkai'mo ka' mule' pinahamo, i laganyomo na i Esau anaknyo anu tumpenyo, lantas notataemo hi ia, “Anakku!”
“Apaa, Tuuma”, tinaaman i Esau.
2I Ishak notatae, “Sinumbu'umo aku aiya i langkai'mo ka' ugaat madi'mo pin na tumuu'. 3Jadi alamo na pana' ka' matanyo, lako'mo mamba pombebas mae sa'angu' na binatang i padang. 4Unjang mae ima-ima' susumo anu saja' ku ka'ima'i, ka' boa mae hi belengku. Ku poko kaan ku bee'mo na balakat hi beleyum ma'isa pe'e aku silaka.”
5I Ishak binasisik tiba i Esau aijo' i hongo i Ribka. Sahingga salatan i Esau nambamo nombebas, 6notataemo na i Ribka hi Yakub, “Sala'je i hongongku hi Tuumaum nompoto'i hi Esau sumo uuka, 7'Bebasi mae sa'angu' na binatang ka' unjangakon mae ima-ima' hi belengku. Ku poko kaan, ku bee'mo na balakat hi beleyum i ahop nu Tumpu, ma'isa pe'e aku silaka.' 8Jadi, anakku,” na koonyo i Ribka mule', “potombihing mae ka' bau apaa na anu tinaloakonkumo aiya. 9Lako' i tampat nu dombanto aijo', ka' pile'i mae ohua' na anak nu mee' anu to lompo-lompo' da ku unjang timbali kaanon anu nuka-nuka ima'i nu tuumaum. 10Lapas aijo' boaje hi ia da nu kaan, ka' lapas aijo' nu bee'mo na balakatnyo hi beleyum ma'isa pe'e ia silaka.”
11Panyo i Yakub notatae hi tinayo, “O tinangku, te misa' butong i Esau ko bulunyo, panyo butongku madi'an? 12Boli-boli tuumangku monsapu butongku ka' nu sumbu' taalu' aku nonga kalimo ia; sahingga misa' balakat na nu bee' mae, panyo ola ahi' mongkutuki mae aku.”
13Tinanyo nontaami, “Boli bata-bata, Anak. Bakas akuje na montanggungimo kutuknyo iwi-iwi'. Baumo apaa na anu pinoto'ingkumo aiya, lako'mo ala na mee' haha aijo'.” 14Sahingga i Yakub nambamo nongala mee' haha aijo' ka' nomboa mae hi tinanyo, lantas ingunjangmo i Ribka na kaanon anu nuka-nuka'ima'i i Ishak. 15Lapas aijo' ingalamo i Ribka na baju' i Esau anu ma'i-ma'ima' hondo anu pino'una'nyo i laigan, lantas pinopusoknyomo hi Yakub. 16Pinobobotnyo mule' na kilit nu anak nu mee' i botokonnyo ka' i gogohong i Yakub anu madi' ko bulunyo aijo'. 17Lantas binee'nyomo hi Yakub na anu ingunjangmo ima-ima' aijo' tiba roti anu binaunyomo.
18Lapas aijo' nambamo na i Yakub hi tuumanyo ka' notatae, “O Tuumangku!”
“Apaa”, tinaaman i Ishak, “ihe na beleyum, i Esau kabai i Yakub?”
19Tinaaman i Yakub, “I Esau, anak nu belento tuuma anu tumpenyo; potuunon nu belento tuuma binaungkumo. Suhang mae ka' kaan na ponoha' anu binebaskumo anu binoangkumo mae aiya, da belento tuuma mombalakati mae aku.”
20I Ishak notatae, “Nalia' hondo na beleyum nohumpak mae, O Anakku.”
Tinaaman i Yakub, “Kalana Tumpu Allah anu nu sombah nu belento tuuma nontulungimo mae aku.”
21Lantas notataemo na i Ishak hi Yakub, “Imbo' u'uka mae oha-ohani da ku sapu na beleyum. Pa' totu'u beleyum i Esau?” 22I Yakub nongohanimo tuumanyo, lantas tuumanyo aijo' nonsapumo ka' notatae, “Potataeum sumo potatae i Yakub, panyo botokonum sumo botokon i Esau.” 23I Ishak madi'mo nonsumbu' i Yakub kalana botokonnyo nimbulumo susumo botokon i Esau. Panyo salatan ia kahanda'mo mombalakati i Yakub, 24ia daagi' ninsan na po'ule' nompokilawa, “Totu-totu'u beleyum i Esau?”
“Totu'u,” na tinaaman i Yakub.
25Lantas notataemo na i Ishak, “Bee' mae na ponoha' itina' hi belengku. De ku poko kaanmo ku bee'mo na balakatku hi beleyum.” I Yakub nombee'mo ponoha' aijo' hi ia ka' suele sangkiding na anggur da o inum. 26Lantas notataemo na tuumanyo hi ia, “Imbo' pompaka ohani mae mule' Anak, ka' ooki mae na aku.” 27#Ibr. 11:20 Salatan i Yakub nongohanimo kahanda'mo mongooki ia, i Ishak nongookmo nohong nu baju' i Esau, lantas binalakatannyomo na ia. Koonyo i Ishak, “Nohong nu anakku ma'i-ma'ima' sumomo nohong nu padang anu binalakatanmo nu Tumpu. 28O'amalakon da Tumpu Allah mombee'i ujan lengkat mae i langit, da mompotimbali iwi-iwi' na ale' nu beleyum molumba'! O'amalakon da Ia mombee'i beleyum gandum ka' anggur molabi-labi! 29#Kej. 12:3 O'amalakon da to bansa-bansa timbali posaihon nu beleyum ka' tulunan nu to bansa-bansa matundu' hi beleyum. O'amalakon da beleyum mongkuasai sampoto utusan nu beleyum ka' lee' nu tina nu beleyum monsombah i ahop nu beleyum. O'amalakon da mohumpak kutuk na iwi-iwi' mian anu mongkutuki beleyum ka' mohumpak balakat na iwi-iwi' mian anu mombalakati beleyum.”
I Esau nomoitamo balakat hi Ishak
30Madi' pinin salatan i Ishak nombee'mo balakatnyo ka' i Yakub nambamo, i Esau, utusnyo tu'a, ninsusule'mo mae namba nombebas. 31Ia suele nongunjangmo kaanon anu ma'ima' lantas binoanyomo hi tuumanyo, ia notatae, “Suhang mae, Tuumangku, ka' kaan na ponoha' anu binoangkumo mae bau baginto Tuuma, da obalakati mae nu belento Tuuma na aku.”
32“Ihe na beleyum?” pinokilawa i Ishak.
“I Esau anak nu belento Tuuma anu tumpe”, na pinontaaminyo.
33I Ishak nontampu'unimo i langkakatan na butongnyo iwi-iwi' ka' ia nompokilawamo, “Desumo aitu ihe na anu nombebasmo binatang ka' nomboamo mae hi belengku u'uka? Kinaankumo ma'isa pe'e beleyum tinoka. Lantas aku nombee'mo balakatku anu pupusnyomo, ka' uuka balakat aiya, tinimbalimo anunyo sidu-sidutu'.”
34Salatan i Esau nohongomo aijo', ia i humangmo daka-daka' ka' talalomo hondo nolibos, lantas ia notataemo, “Balakatiakon mae na aku suele, o Tuumangku.”
35I Ishak notatae, “Utusum ise' tinokamo mae ka' nongakalimo aku. Ia nongalamo balakat anu sabenannyo ku bee' hi beleyum.”
36 #
Kej. 25:29-34
I Esau notatae, “Aiyamo na ko pinduannyo ia nongakali aku. Pantasmo na sanggonyo i Yakub. Ia nongalamo hakku salaku anak tumpe, ka' u'uka aiya ia nongala mule' balakat anu aku ahi' na tumpunyo. Te belento Tuuma madi'mo ko balakat sangga'at bau bagingku?”
37I Ishak nontaami, “Pinotimbalingkumo na ia tuan nu beleyum, ka' iwi-iwi' na sampoto utusannyo pinotimbalingkumo posaihonnyo. Binee'kumo hi ia na gandum ka' anggur. Uuka aiya madi'mo daagi' ko apa-apaa anu timbali ku bau, da bau bagium, o Anakku!”
38 #
Ibr. 12:17
I Esau madi' mongka'oho' momohokot na mongkakase hi Tuumanyo, “Te belento Tuuma ola sa'angu' na balakat? Balakatimo mae na aku, o Tuumangku!” Lantas po'ule' mule' i humang na ia.
39 #
Ibr. 11:20
Lapas aijo' i Ishak notataemo hi ia,
“Madi'mo daagi ko ujan lengkat mae i langit toka hi beleyum,
madi'mo daagi' ko ale' anu molumba' hi beleyum.
40 #
Kej. 36:8, 2Raj. 8:20 Beleyum me montumuu' nu bajak nu beleyum,
panyo de beleyum moto muhuk, beleyum madi'mo nupoko ala nu kuasai.”
41Sahingga i Esau nongka'idekimo i Yakub, kalana Tuumanyo nombee'mo balakat hi utusnyo ise' aijo'. Ia binapikin, “Madi'mo daagi' pin tuumanyo silakamo, ka' lapas na kami moliwangi, i Yakub ku pateimo!”
I Ishak nompokaumo mamba hi Laban
42Salatan i Ribka nohongomo tanga'an i Esau aijo', ia noki lagamo mae i Yakub ka' notatae, “Hongo mae, utusum tu'a i Esau ko kahanda'mo mombalosi ka' mompatei beleyum. 43Jadi, bau apaa na anu ku poto'i aiya. Lambamo lia-lia' hi utusku tu'a i Laban anu kiijo' mae i Haran, 44ka' jojoongmo hi ia gagana' pin sahingga madi'mo pusa na utusum tu'a. 45Ka' ia mongkolilimimo apaa na anu binaumo nu beleyum hi ia. Lapas aijo' ku saije na mian momboa mae beleyum minsusule' mae. Aku madi' mongka'oho' molapus ohu-ohua' na anakku i uno nu sansinaa.”
46Sahingga notataemo na i Ribka hi Ishak, “Aku, ma'osamo na montoa to bengke-bengkele' i Esau anu lengkat mae i bansa salipu'an aijo'. De i Yakub suele mo'osoa tiba langkoyang nu Het, sahanyo aku silakamo.”
Currently Selected:
KAJADIAN 27: LAILOE
Highlight
Copy
Compare
Share
Want to have your highlights saved across all your devices? Sign up or sign in
