KAJADIAN 24
24
Bengkele' i Ishak
1I Abraham i langkai'mo hondo, ka' i iwi-iwi' na han ia nubalakati nu Tumpu. 2Daagi' kino sansinaan i Abraham notataemo hi posaihonnyo anu tu'anyomo hondo, anu mongkalesang iwi-iwi' na halata'nyo, “Potiik mae na lima nu beleyum i olot nu jalempakanku. 3Basumpa' hi Tumpu, Tumpu Allah anu mongkuasai langit ka' tano', saba' beleyum madi' molioi bengkele' i Ishak anakku hi to mia-mian i tano' nu Kana'an aiya. 4Beleyum tionyo ahi' minsusule' i lipu' kinahampeanku molioi bengkele'nyo kiijo' mae i sampoto utusanku.”
5Lantas pinokilawa nu posaihon aijo' hi ia, “Mosia de langkoyang kiijo' mae madi' mongka'oho' mompala'i mae laigannyo ka' madi' mongka'oho' mombatuki mae aku mamba mae i lipu' aiya? Pa' tionyo ahi' ku boa na anak nu belento Tuan aijo' i lipu' pinolengkatan mae nu belento Tuan?”
6Panyo tinaaman i Abraham, “Jaga! Boli hondo-hondo nu boa na anakku aijo' mokiijo' mae! 7Tumpu, Tumpu Allah anu mongkuasai langit, nomboamo mae aku lengkat i laigan nu tuumangku ka' lengkat mae i lipu' nu sampoto utusanku, ka' Ia binasumpa'mo hi belengku tukoonyo Ia mombee'je lipu' aiya hi lee'ku. Iaje mule' na monsai mae malaekat-Nyo da montulungi beleyum, da beleyum timbali mongkabot samian anu lengkat mae ikiijo' bau bengkele' nu anakku. 8Panyo de langkoyang aijo' madi' mongka'oho' mamba mae tiba beleyum, saba' beleyum madi' mo nukona nu sumpa' aiya. Mau mule' mosiamo boli nu boa na anakku aijo' mokiijo' mae.” 9Lapas aijo' posaihon aijo' nompotiikmo limanyo i olot nu jalempakan i Abraham tuannyo, ka' binasumpa' tionyo mombau apaa na anu pinoitamo i Abraham aijo'.
10Posaihon aijo' nongalamo sampulu' na unta ka' ngangahan nu balang anu mahan na olinyo, anu nu tuannyo lantas nambamo i kota anu kinajojoongan i Nahor tempo'nyo ia daagi' tutuu'; tampatnyo i sasu utara Mesopotamia. 11Salatan ia tinokamo kiijo' mae, aha madi'mo i lumajang da unta haha aijo' mingkainmo koko sa'angu' na bubung i sambiha' nu kota. Sinaa ohanimo malom, ka' aijo'mo na tempo'nyo to bou-boune tokamo i bubung montauk uee. 12Lantas posaihon aijo' binalado'amo, “O Tumpu, Tumpu Allah nu tuanku i Abraham, tulungiakon mae, da anu ku lajangakon aiya ko hasinnyo sinaa aiya; kanonongiakon na tuanku i Abraham. 13Toa mae, aku tinjo-tinjo koko bubung aiya. Sasaidi' aiya to lalangkoyang anu lengkat mae i kota tokamo mae montauk uee. 14Aku saidi'motataemo hi sala'samian de tokamo mae na aha, 'Tulungi mae na aku uluakon na pontauk nu beleyum, ka' bee'i mae da aku monginum.' De ia montaami, 'Ponginumo, ka' to unta-unta nu belento Tuuma suele ku po'inum!' Iamo na anu pinile'an nu Belento Tumpu da bau bengkele' i Ishak posaihon nu Belento. De han aijo' timbali, atina' je ka' ku sumbu' saba' Belento Tumpu mongkanonongimo tuanku i Abraham.”
15-16Hau-haunyo ia binalado'amo aijo', i Ribka samian na langkoyang anu handa hondo ka' ma'isa toho' no'osoa tinokamo i bubung aijo' nomboa mae gumbang simbu-simbu i bekoangnyo. Ia anak i Betuel, ka' tuuma i Betuel aijo'mo i Nahor ka' i Milka; i Nahor aijo' utus tu'a i Abraham. I Ribka nokiijo' i bubung ka' nongisi gumbangnyo, lantas po'ule'mo ninsusule'. 17Posaihon i Abraham nopadeka'mo nongohani ia ka' notatae, “Tulungi mae, Anak, bee'i mae da aku monginum atina' i gumbang nu beleyum.”
18Langkoyang aijo' nontaami, “Ponginumo Tuuma”, lantas ti nau'akonnyomo lia-lia' na gumbangnyo anu aijo' i bekoangnyo ka' hau-haunyo montoongi gumbang aijo' pino'inumnyomo na posaihon aijo'. 19Salatan noko inum na posaihon aijo'; notataemo na langkoyang aijo', “Aku montaukje uee aijo' da bau pompo'inum suele to unta-unta nu belento Tuuma, da iwi-iwi' na binatang aijo' manjoo' na nu inum.” 20Lapas aijo', lia-lia' na ia nolana'akon uee aijo' anu i uno nu gumbang i lana'akonnyo i ponginuman nu unta, lantas ia nopadeka'mo ninsusule' i bubung aijo' nontauk uee lebe manjoo' mule' sampe iwi-iwi' na binatang aijo' manjoo' na inginumnyo. 21Hau-haunyo aijo' posaihon i Abraham saja'mo nontonto'i, panyo madi' notatae mau pa' santaa'. Ia kahanda' monsumbu' pa' Tumpu mompotimbali ia da ko hasinnyo na mompojalan kalajanyo kabai madi'.
22Salatan iwi-iwi' na unta manjoo'mo na inginumnyo, posaihon i Abraham nongalamo mainan mosoni' anu mahan na olinyo lantas pinokonanyomo i sung nu langkoyang aijo'. I botokonnyo pinopusoknyomo na galang mosoni' ohua'. 23Lantas posaihon aijo' notataemo, “Soba sisik mae pa' ihe na tuuma nu beleyum. Pa' ko tampat kamale'an i laigannyo, aku ka' to mia-mianku?”
24“Tuumangku i Betuel, anak i Nahor ka' i Milka”, tinaaman nu langkoyang aijo'. 25“I laigan mami ko tampat kamale'an nu belento Tuuma ka' suele manjoo' na haat bau pompakan potuu'on.”
26Sahingga dinumaladupumo na posaihon aijo' nonsombah Tumpu. 27Ia notatae, “Opuji' na Tumpu, Tumpu Allah nu tuanku i Abraham. Inyata'mo na Tumpu taalu' saja' ahi' mongganapi janji' ka' nanonongmo hi tuanku Abraham. Ia nolaya'mo aku lau-laus tinoka hi sampoto utusannyo.”
28Lapas aitu langkoyang aijo' nopadeka'mo nokiijo' i laigan nu tinanyo ka' nonsisik iwi-iwi' apaa na anu jinadimo aijo'. 29-30I Ribka ko utusnyo tu'a samian sanggonyo i Laban. Ia nohongomo sisik nu utusnyo mongkona apaa na anu tinaloakon nu posaihon aijo'. Ia suele nontoamo mainan aijo' i sung ka' galang i botokon nu utusnyo ise' aijo'. Sahingga nopadeka'mo na i Laban nokiijo' i sambiha' nu laigan aijo' nonsingkaboti posaihon i Abraham aijo' anu daagi' tinjo-tinjo tiba to unta-untanyo koko bubung. 31Lantas notataemo na i Laban, “Belentomo na Tuuma nu mian anu nu balakati nu Tumpu! Boli jojoong i sambiha'nyo aiya. Imbo' mokiijo'mo i Laigan mami. Kami nontoukaimo salipi' hi belento Tuuma ka' suele tampat nu to unta-unta nu belento Tuuma.”
32Lantas nombatukimo na posaihon aijo' ka' ninsoopmo i uno nu laigan. I Laban nontau'akonmo boaon nu to unta-unta, ka' nombee'imo haat ka' bau pompakan binatang haha aijo'. Lapas aijo' binoannyomo uee pondudu'i tengke posaihon i Abraham ka' to mia-miannyo. 33Salatan anu okaan pino atumo, posaihon aijo' notataemo, “Aku ma'isa mongkaan de ma'isa ku potoka na potuunon anu binoangku mae.”
I Laban notatae, “Ii' potataemo mae.”
34Lantas nontampu'unimo na posaihon i Abraham notatae, ia notatae, “Aku aiya posaihon i Abraham. 35Tumpu talalo hondo mombalakati tuanku kiijo' ka' nompotimbalimo ia kinayamo hondo. Tumpu nombee'imo ia sampahas na domba, mee', sapi', unta, keledai, ka' mule' salaka, mosoni', tiba posaihon to momo'ane ka' to bou-boune. 36Salatan umunnyo i langkai'mo, i Sara bengkele', nu tuanku kiijo' nohampeakonmo anak mo'ane, ka' tuanku kiijo' nombee'mo iwi-iwi' na halata'nyo hi anak'nyo kiijo'. 37Ia nompokaumo aku bajanji' ka' basumpa' da tulu-tulutan i palentahnyo. Ia notatae, 'Boli beleyum mompile'i bau bengkele' nu anakku anu kiijo' mae to lalangkoyang i tano' nu Kana'an aiya, 38panyo anu i uno nu sampoto utusan hi bansa nu tuumangku. Jadi mambamo pokiijo' lia-lia'.' 39Lantas pinokilawangkumo hi ia, 'Mosia de langkoyang kiijo' mae madi' mongka'oho' mombatuki mae aku?' 40Lantas tinaamannyo, 'Tumpu anu saja' ku tuluti, na monsaije malaekat-Nyo da montulungi da anu ku kalaja ko hasinnyo. Beleyum tionyo singkabot anu timbali bengkele' nu anakku hi posi bansangku, aijo'mo anu hi sampoto utusan nu tuumangku. 41Ola de aha madi' montalima beleyum, atina'je ka' beleyum madi' nukona nu sumpa' nu beleyum.'
42Ka' salatan aku tinokamo i bubung u'uka, aku binalado'amo i uno nu kinyonyoa, 'O Tumpu, Tumpu Allah nu tuanku i Abraham. Pohumpakakon mae o Tumpu da apaa na anu ku kalaja ko hasinnyo. 43Aku sinaintinjomo koko bubung aiya. De samian na langkoyang toka mae montauk uee, ku poitaje hi ia da nu po'inumi. 44De ia mongka'oho' mombau ka' monsale'i suele mompo'inum to unta untangku, saba' aijo'mo ia na anu pinile'anmo nu Tumpu timbali bengkele' nu anak nu tuanku aijo'.' 45Ma'isa pe'e iningkot na aku binalado'a i uno nu kinyonyoa, i Ribka tinokamo nomboa mae gumbang simbu-simbu i bekoangnyo montauk uee i bubung. Lapas aijo' aku notataemo hi ia, 'Tulungi po'inumi mae na aku.' 46Lia-lia' na ia nontau'akon gumbang aijo' anu i bekoangnyo ka' notatae, 'Ponginumo ka' to unta-unta nu belento Tuuma suele, ku po'inumije.' Lantas aku nonginumo ka' ilapas aijo', to unta-untangku suele pino'inumnyomo. 47Lapas aijo' pinokilawangkumo, 'Ihe na tuuma nu beleyum?' Lantas tinaamannyomo, 'Tuumangku i Betuel, anak i Nahor ka' i Milka.' Lantas pinokonangkumo na mainan mosoni' i sungnyo ka' galang ohua' i limanyo. 48Aku dinumaladupumo nonsombah ka' nompuji'mo Tumpu, Tumpu Allah nu tuanku i Abraham. Ia nolaya'mo mae aku tinoka-toka i aiya, hi sampoto utusan nu tuanku sahingga aku nongkabotmo langkoyang aiya bau bengkele' nu anaknyo. 49Uuka aiya de komiu sanang na montalima kahanda' nu tuanku ma'i-ma'ima' ka' mompopo'i'mo na komiu hi ia salaku ponginau' moto utus, yo poto'imo mae hi belengku panyo de madi' yo taloakonmo mae, da ku sumbu' apaa na anu tionyo ku bau.”
50I Laban ka' i Betuel nontaami, “Kalana anu jinadimo aiya nolengkat mae hi Tumpu, kami madi' pantas mombee'i katantuan sangga'at. 51I Ribka aiya, opobee'mo na ia mombatukimo belento Tuuma, ka' timbalimo bengkele' nu anak nu tuan nu belento Tuuma susumo anu tinaloakonmo nu Tumpu.” 52Salatan i hongo nu posaihon i Abraham na potatae nu aha, ia dinumaladupumo nonsombah Tumpu. 53Lantas ingalanyomo na baju', mainan salaka ka' mosoni', ka' binee'nyomo iwi-iwi' aijo' hi Ribka. Suele utusnyo tu'a ka' tinanyo binee'annyomo palasen anu toto maha-mahan.
54Lapas aijo', posaihon i Abraham ka' to mia-miannyo anu nonsangalui mae, ia nongkaanmo ka' nonginumo, lantas i nale'mo ikiijo'. Salatan aha nobulamo dodododopnyo, posaihon aijo' notataemo, “Pobee'mo mae na aku minsusule' hi tuanku.”
55Panyo utus tu'a tiba tina i Ribka notatae, “Sahanyo i Ribka jojoong pe'e tiba kami to sa'angu' na duminggu kabai daagi' to sampulu' na sinaa, ka' lapas aijo' timbalimo ia mamba.”
56Panyo posaihon aijo' notatae, “Boli montewa' aku. Tumpu na nompojadi lajangku aiya kino hasinnyomo; pobee'mo mae na aku minsusule'mo hi tuanku.”
57Tinaaman nu aha, “Imbo' da olaganto na i Ribka ka' opokilawa mosia na tanga'annyo.” 58Lantas i laga nu aha na i Ribka ka' pinokilawa, “Mongka'oho'mo na beleyum mombatuki mian aiya?”
Tinaaman nu langkoyang aijo', “Ii', aku mongka'oho'mo.”
59-60Sahingga pinobee'mo nu aha na i Ribka ka' anu mongkalesang ia inambamo tiba posaihon i Abraham, tiba to mia-miannyo anu nonsangalui mae. Lantas aha nombalakatimo i Ribka, tinaloakon nu aha sumo uuka,
“O'amalakon da beleyum, Ribka timbali tina nu mian mojuta-juta!
O'amalakon da lee' nu beleyum mompatundu' to kota-kota anu monsampobali' beleyum!”
61Lapas aitu i Ribka nosadiamo tiba to lalangkoyang anu bau posaihonnyo, lantas sinumake'mo i unta ka' nambamo nombatukimo posaihon i Abraham aijo'.
62Hau-haunyo aijo' i Ishak ninsusule'mo mae lengkat i padang bola, nontulu mae bubung anu osanggohi, “Ia Anu Mompalahatikan mae Aku” ka' kajojoongannyo i bahagian selatan Kana'an. 63Salatan mamalomo, ia nosabatmo i kemahnyo kahanda' kolalaajang i ale', lantas tinoanyomo na unta haha aijo' tinokamo mae. 64Salatan i Ribka nontoamo i Ishak, ia i lumobosmo i untanyo, 65ka' pinokilawanyo hi posaihon i Abraham aijo', “Ihe na mian momo'ane aijo' i ale' anu mambamo mae hi kita?”
“Iamo na tuanku”, tinaaman nu posaihon aijo'. Lantas i Ribka nongalamo salendangnyo ka' nongkukubi ohupnyo.
66Lapas aitu, posaihon aijo' nonsisikmo hi Ishak iwi-iwi' apaa na anu binaunyomo. 67Lapas aijo', i Ishak nomboamo i Ribka ninsoop i uno nu kemah nu tinanyo, ka' ingosoannyomo salaku bengkele'nyo na i Ribka. I Ishak mongkalibosi hondo i Ribka; sahingga kinyonyoa i Ishak sinanangmo mau mule' ia madi'mo ko tinanyo.
Currently Selected:
KAJADIAN 24: LAILOE
Highlight
Copy
Compare
Share
Want to have your highlights saved across all your devices? Sign up or sign in
