ANU MOMPOLELE POTATAE NU TUMPU 11
11
Palabuatan nu mian anu pande
1Balanjakon na doi nu beleyum isa'angu' na usaha kiijo' mae ilipu' anu isantano'an.
Beleyum tionyo mohumpak kauntungan imihinyo mae.
2Balanjakon na doi nu beleyum ingangahan nu badagangan;
Olio na usaha jonjoo'.
Kalana mian palalu saja balajaga-jaga;
mau ma'isa pe'e ko balaa' montokai mae.
3Maumo pa' sasu moya na potua'an nu kau' aijo';
tataap ia matitimpas i tano' potu-potua'annyo.
De kundom ko ueenyomo ka' manjoo'mo;
ujan daka' tudunmo aiya i dunia.
4Ihe na montanda'i sampe mombun tiba jingka ma'ima'mo;
madi'mo daagi mosu'an sosu'anon ka' madi'mo daagi mongala hasinnyo.
5Tumpu na nompotimbali iwi-iwi' anu idunia aiya;
ka' manusia madi' monsumbu' apaa na anu binau-Nyomo,
sumo aitu mule' ia madi monsumbu' kantumuu'an anu salaje mae jadi
i uno nu ma'alum nu samian na totina.
6Daagi subu-subu saumo na bine' nu beleyum;
ka' boli mingkain mau mule' malomo,
kalana madi' osumbu'to iya na anu sinaunto aijo' na anu tinumuu' ma'ima'.
Ugaat ahi' ohu-ohua' tinumuu' ma'i-ma'ima'.
7Jingka nu sinaa moko bilahi kantumuu'an;
ibeh nako sanangnyo de moko ala ahi' mongoa'i.
8Tionyo ahi' beleyum montalima kase;
de mintuangmo na umun nu beleyum.
Panyo o inau' ahi'; maumo beleyum pin na tumuu' i dunia,
lebe mule' ahi' pin na tempo'nyo i uno nu dunia kapatean.
Jadi apaa na anu daagi otaha imani?
Iwi-iwi' palasuma' ka' madi'mo ko gunanyo.
Pokinde' hi mian anu daagi olitau ka' langkoyang
9O belemiu to oli-olitau ka' to lalangkoyang, oa'i pe'e na kasanangan de daagi olitau ka' langkoyang!
Balame-lame'mo de belemiu hau-haunyo tumimpasje.
Baumo iwi-iwi' apaa na anu nu kahanda'i nu nyawa nu belemiu,
ka' mule' baumo iwi-iwi' apaa na anu iniatmo nu kinyonyoa nu belemiu.
Panyo o inau' ahi' na Tumpu anu kiita i suluga',
Ia na momputusi saidi' mae palabuatanto iwi-iwi'.
10Bolimo daagi bata-bata ka' mongoa'i susa' i uno nu kinyonyoa nu belemiu
kalana ka umolitauan tiba kalangkoyangan nu belemiu malia' hondo tombo liu.
Currently Selected:
ANU MOMPOLELE POTATAE NU TUMPU 11: LAILOE
Highlight
Copy
Compare
Share
Want to have your highlights saved across all your devices? Sign up or sign in
