ANU MOMPOLELE POTATAE NU TUMPU 10
10
1Bangke' nu lalo mombusiki samboton na minya-minya';
kaponga'an mau ola sangkiding mongalini kapandean bapikin anu matangkas na alati'nyo.
2Pantasnyomo ahi' de mian anu pande mombau kalakuan anu ma'ima;
ka' mian anu ponga' mombau kalakuan anu ma'idek.
3Kaponga'annyo otoa ikolangka-langkasnyo.
Ka' iwi-iwi' na mian pinompotoannyomo kaponga'annyo.
4De beleyum nu tambuha'i nu anu balakuasa;
boli momoita belenti na mokalaja.
Maumo daka' na kasala'an nu beleyum, beleyum o ampuni;
de beleyum madi' mojojoo' ka' sabaan.
5Daagi mule' ko anu ma'idek na kalakuannyo sangga'attinoangku i dunia,
aijo'mo anu balakuasa noteba'mo i jalan anu madi' ma'ima'.
6Mian anu ponga' obee'i pangkat anu oholomati,
panyo mian anu talasanggo madi' obee'i apa-apaa.
7Toho' mule' tinoangku na to botu-botuan nonsake'i ajahan,
panyo to mia-mian daka' na ola ahi' i lumajang tengke susumo to posa-posaihon.
8 #
Mzm. 7:16, Ams. 26:27 Ihe na mongkeke bolo' saidi' mae manabu' i unonyo,
ihe na montumbalakon pagan mesen ia nu sa'u nu ulo anu ko bisa'nyo.
9Ihe na mokalaja i pongkekean batu, ia tosumpun ka' belaonmo.
Ihe na mombiha-biha' kau' boli-boli saidi' mae belaon.
10De bangko' nu beleyum makujun ka' madi' nu boit;
beleyum mokalaja lebe susa' hondo.
Pake na akan nu beleyum ma'i-ma'ima',
ka' pombau ahi' tanga'an momonanyo.
11De nu sa'u nu ulo na beleyum ma'isa pe'e pininyaman nu do'a-do'a,
saba' anu nompotuu' ulo aijo' madi'mo ko gunanyo.
12Potatae nu mian anu pande mombau ia oholomati,
panyo mian anu ponga' silaka kalana nu saduakon nu potataenyo.
13Ia montampu'uni motatae nu potatae anu madi' ko alati'nyo,
panyo imihinyo mae potataenyo sumomo mian anu ulawon.
14Memang mian anu ponga' manjoo' na potatae;
sinaa anu aiya mae i ahop madi' osumbu-usumbu' nu kita iwi-iwi'.
Madi' ko anu moko ala mongkila-kila kajadian salatan kita i madi'anmo.
15Ola ahi' mian anu ponga' na anu madi' monsumbu' jalan anu mamba i laigannyo,
ia makeke na mokalaja ka' madi' toho' milawe.
16Silaka na lipu' de tomundo'nyo ma'isa talalo tu'anyo;
ka to pega-pegawenyo anu toto tangka-tangkas na pangkatnyo sinampahu na lewa' nombau bau-bauon.
17Untung hondo na lipu' de tomundo'nyo anu okabuhuk;
ka' to pega-pegawenyo anu toto tangka-tangkas na pangkatnyo
mongkaan memang kona i tempo'nyomo ahi' pongkaanan,
madi' mongka'ima'i malangu ka' pande na sabaan.
18Atop nu laigan timbali tuhu'on de madi'mo okiabi;
ka' ahennyo laigan aijo' mahu'mo kalana moluluk.
19Bau-bauon mompotimbali kumojo ka' mule' anggur mompotimbali lame'
panyo tionyo ahi' ko doi da bau pongoli.
20Boli monselidiki tomundo' mau ola i kinyonyoa.
Boli lewa' monsisik ma'idek mian anu kaya, mau ola i salipi' kaka male'an nu beleyum.
Ihe na monsumbu' nu hongo nu sa'angu' na tomonsi' apaa na anu tinaeakonmo nu beleyum
lantas nu poto'imo hi aha anu sinisikmo nu beleyum.
Currently Selected:
ANU MOMPOLELE POTATAE NU TUMPU 10: LAILOE
Highlight
Copy
Compare
Share
Want to have your highlights saved across all your devices? Sign up or sign in
