Wahiu 11
11
Roduo sabiꞌna Pueꞌ Ala
1Uko katoꞌo, nipaꞌaniꞌa hangkaru popehukaꞌ to hibali laiꞌ, hei notiꞌikiꞌa Pueꞌ Ala, “Noloumoko mohukaꞌ Tambina Pueꞌ Ala hante potutua dupaꞌ, hei iꞌihaꞌ haꞌumbo koworiꞌre toaꞌ to menomba itoꞌo. 2Angkana inioꞌ Ihukaꞌi tanobaꞌa to uwaꞌ i howali Tambina Pueꞌ Ala, alaꞌ tanobaꞌa tiꞌo Kupatimomokihi toaꞌ to handoꞌio toYahudi. Iohi hingkiꞌ modihaꞌ-dihaꞌ Yerusale, kota to mangkolehi tiꞌo, i lali iba mpuluꞌ rombula. 3I tempo tiꞌo, hingkiꞌ Kurumbaꞌ roduo sabiꞌKu nolou mampowute pohawaꞌKu. SabiꞌKu to roduo tiꞌo, mopakeꞌhi baduꞌ to niwali ka karuꞌ, hibali to ropakeꞌ toaꞌ to masusa lalira, hei mampowutehi pohawaꞌKu i lali hasabu ronatu oni mpuluꞌ ando.”
4Sabiꞌ to roduo tiꞌo, nipandiriꞌ hibali ropongko loti saitu hei meroꞌonu pobuntaha huluꞌ#11:4 loti saitu, pobuntaha huluꞌ: Basa Sak. 4:1-14. to metotiꞌi i hinarona Pueꞌ Ala Pueꞌna humanele duniaꞌ. 5Makuasaꞌhi mampopesuwu api ka lali omeꞌra morokoꞌ ba himolu to mangkodokoꞌi mowali dake pe iohi. Iomo horiana mahihi lekiꞌ-lekiꞌne poniꞌra to moꞌewahi. 6Uwaꞌ kuasaꞌre motaha ura hingkeꞌna hawaꞌi toꞌu i tempora mampowute lolitana Pueꞌ. Makuasaꞌhi woꞌo i lekiꞌ-lekiꞌna uwai. Uwai wadi ropopewali raꞌa. Uwaꞌ woꞌo kuasaꞌre mampomasusa duniaꞌ norumpa mampopengaa komaporiꞌ, hiwaꞌimbolu motuntuni peleira.#11:6 Tandaꞌ kuasaꞌ hieꞌe to nowali Elia hante hi Musa hampiha. Basa 1Dat. 17:1; Kel. 7:17, 19.
7 #
Dan. 7:8, 21; Mat. 24:15; Mrk. 13:15; 2Tes. 2:3, 4 Ane tutumoꞌi jamare mampowute lolitana Pueꞌ, hingkiꞌ mehupaꞌ hambaꞌa pinatuwuꞌ to meꞌoꞌoka ako moꞌewahi. Io hingkiꞌ monanihi hante morokoꞌhi. Pinatuwuꞌ to meꞌoꞌoka tiꞌo, iomo pinatuwuꞌ to hingkiꞌ mesuwu ka woloꞌ pehukua to hawaꞌi tehukaꞌ kokuladune. 8Koꞌukora sabiꞌ to roduo tiꞌo rorokoꞌ, wotara hingkiꞌ ropotedehi i lumbu lala kota to kodeꞌ. I kota to kodeꞌ tiꞌo woꞌo, konipakuana Pueꞌra. Kota tiꞌo wadi nipandiriꞌ hibali kota Sodomo ba woiꞌ Masiri hampiha, 9Toaꞌ ka humanele duniaꞌ: mepongka ka lekiꞌ-lekiꞌna kodatua, lekiꞌ-lekiꞌna pemuleꞌa hei lekiꞌ-lekiꞌna wiharo, hingkiꞌ pangkiꞌ wotana sabiꞌ to roduo to rorokoꞌ tiꞌo i lali tolu ando hantangaꞌ. Wotara hingkiꞌ ropotedehi i lumbu lala alaꞌ hawaꞌi ropewei nitawu. 10Toaꞌ to hawaꞌi mengkatobaꞌ to meꞌohaꞌ i duniaꞌ, hingkiꞌ mampotanaꞌ komahiramo sabiꞌ to roduo tiꞌo. Hingkiꞌ mosusaꞌhi hei momehadiahi, alaꞌ mahimohi nabi to roduo tiꞌo to mampoperima-rimahi.
11Angkana liumo tolu ando hantangaꞌ, hupaꞌmo Inohaꞌ to tuwuꞌ ka Pueꞌ Ala to mampotuwuꞌhi. Inohaꞌ tiꞌo mekahi i wotara sabiꞌ to roduo tiꞌo, koꞌukoana tuwuꞌhi huliꞌ hei metotiꞌihi. Horiana morokaꞌhi mpololeke lekiꞌ-lekiꞌne toaꞌ to pangkiꞌ hapo to mewali tiꞌo. 12Uko tiꞌo, rohori loaꞌ ka suruga to mololita nopokobue mowowoihi, Notiꞌi, “Mengkaꞌoreꞌmokei humei!” Katoꞌo teꞌoreꞌmohi nolou pe suruga noputuꞌhi kini. Pengkaꞌoreꞌra tiꞌo rosobiꞌi lekiꞌ-lekiꞌna poniꞌra. 13Hei i tempo tiꞌo, mewalimo luanoko to makaja. Hadolaꞌ hampuluꞌ ka kota tiꞌo mokero, hei nokomi peluanokona tiꞌo, pitu sabu toaꞌ hingkiꞌ mahi. Morokaꞌhi mpololeke toaꞌ ntaniꞌne, horiana rotiꞌi, “Kodeꞌ mpololeke kuasaꞌne Pueꞌ Ala to i suruga!”
14Tutumo kohorewuꞌ to korompihana. Angkana uwaꞌ tene halangkaꞌ kohorewuꞌ to kaliuꞌ hingkiꞌ mehuntu.
Torompeꞌ to kapitu nitowuiꞌ
15Malaꞌeka to pitu motowuiꞌ torompeꞌna, hei uwaꞌhi to mololita ropokobue i lali suruga, rotiꞌi:
“Hinewowoꞌena, lekiꞌ-lekiꞌna kodatua duniaꞌ
noparentaimo Pueꞌ Ala Pueꞌta,
hei Datu to Mamposalamaꞌ to Noꞌuwiꞌmo.
PoparentaRa wute nantolou-louna.”
16Tadulako-tadulako to rompuluꞌ iba to mahurahi i pahura kodatua to uwaꞌ i hinarona Pueꞌ Ala, metumpapaꞌhi i lobo menomba pe Io, 17rotiꞌi:
“Pueꞌ Ala, kodeꞌ kuasaꞌMa ka lekiꞌ-lekiꞌna.
UwaꞌmoKo umbiꞌ mepongka ka uluꞌ-uluꞌna, hei uwaꞌKo hinewowoꞌena.
Moꞌawerasiꞌka pe Ingko, o Pueꞌ,
alaꞌ nokomi kokodeꞌna kuasaꞌMu,
horiana Ipemolukamo poparentaMa.
18 #
Mas. 2:1
#
2Tes. 1:6, 7 Lekiꞌ-lekiꞌna toaꞌ to hawaꞌhi metuntu i Ingko,
woriꞌhi moꞌewaKo.
Angkana mehupaꞌmo tempone Ipomombahakihi kokoiꞌMa.
Hupaꞌmo tempone Ibutusi kara-karane toaꞌ to mahi.
Hupaꞌmo tempone Ihowoni komoromiꞌne toaꞌ to metuntu pe Ingko:
pe nabi to mampowute PohawaꞌMu,
hei lekiꞌ-lekiꞌna toaꞌMu to mangkolehi,
mepongka to i wowoiꞌ tuwuꞌra, wute-wute i to mokonaꞌ tuwuꞌra.
Hupaꞌmo tempone Iporopuꞌ toaꞌ to mamporopuꞌ toaꞌ i duniaꞌ hieꞌe.”
19Uko tiꞌo, teweaꞌmo wambaꞌ Tambine Pueꞌ Ala i suruga, hei i lali TambiNa pangkiꞌhi Petiꞌ Podandi.#11:19 Petiꞌ Podandi: Ul. 10:1-5. Ohina: hawaꞌ hampuluꞌ, laiꞌna hi Harun, hei roti manna. Mewiaꞌ hei meboluntuꞌ, meluanoko, hei toꞌumo wuaꞌ ura to makaja.
Currently Selected:
Wahiu 11: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
