Wahiu 10
10
Malaꞌeka to motiko haꞌanu suraꞌ to kokiuꞌ
1Uko tiꞌo, kuꞌokiꞌ haduo malaꞌeka to makuasaꞌ mengkohou humei ka suruga. Malaꞌeka tiꞌo noputuꞌ kini, hei tutuꞌna notuleliꞌi tantoroꞌue. Liona mewanta hibali ando, kapuꞌna hibali ori to keꞌapi. 2Kapuꞌ koanana medadihaꞌ i tahiꞌ, hei kapuꞌ koirina medadihaꞌ i lorina. I koraweꞌna uwaꞌ haꞌanu suraꞌ to kokiuꞌ to tewuraꞌ. 3Mololitamo malaꞌeka tiꞌo nopokobue, hibali peꞌuona singa. Uko mololita, uwaꞌ boluntuꞌ to momoni ngkodeꞌ pitu mpiha, mololita hibali toaꞌ. 4Koꞌukona boluntuꞌ tiꞌo mololita, hingkiꞌ kuꞌukiꞌ lolitane, angkana hangkaꞌ-hangkaꞌlu kuhori womo loaꞌ ka suruga to mampatiꞌikiꞌa, “Inioꞌ i ukiꞌ tiꞌo! Hangangaa iwowuni hapo to notiꞌi boluntuꞌ to pitu hingkenia.”
5Uko tiꞌo, malaꞌeka to kuꞌokiꞌ hingkenia, to medadihaꞌ i tahiꞌ hante i lorina, mohiniꞌmo korawe koanana pe laniꞌ, 6-7#Dan. 11:29–12:13; Rm. 16:25-26honiꞌi modandi i lali konaꞌna Pueꞌ Ala to tuwuꞌ wute nantolou-louna, to mowali laniꞌ, duniaꞌ, tahiꞌ hei lekiꞌ-lekiꞌna ohina. I podandina notiꞌi waheꞌe: “Ane malaꞌeka to pitu motowuiꞌ torompeꞌna, i tempo tiꞌolumo Pueꞌ Ala hingkiꞌ mampopewali tungkaihaNa to moruemo tewuni. Tungkaihana tiꞌo bateꞌna hohiꞌ mewali, motuntuni hapo to Notiꞌikihi rumbaꞌaNa hampiha, iomo nabi-nabi to mampowute BooNa.”
8Uko tiꞌo, loaꞌ to kuhori ka suruga hingkenia mampatiꞌikiꞌa womo, notiꞌi, “Noloumoko moroa suraꞌ to tewuraꞌ, to uwaꞌ i koraweꞌna malaꞌeka to medadihaꞌ i tahiꞌ hante i lorina!”
9 #
Mas. 19:10; 119:103; Yeh. 2:8–3:11 Noloumoꞌa mpuꞌu pe malaꞌeka tiꞌo, hei kutiꞌiki, “Paꞌanikiꞌa suraꞌ to kokiuꞌ tiꞌo.”
Notiꞌikiꞌa, “Iroa hei iꞌokamo. Kehapoꞌi i omeꞌmu, moꞌowi hibali uwai koniuꞌ, angkana ane i lali hinaꞌimumoꞌi hingki' mampokolimbuaꞌ-mbuaꞌ.”
10Kuroamo mpuꞌu suraꞌ tiꞌo ka koraweꞌna malaꞌeka liu kuꞌoka. I omeꞌku moꞌowi mpololeke hibali uwai koniuꞌ, angkana kokuliominalu mampomolalo hinaꞌingku. 11Uko tiꞌo, notiꞌikiꞌa, “Hangangaa ipowute womo hapo to hingkiꞌ kutidoꞌkiko noniuꞌ i toaꞌ i humanele duniaꞌ: datu-datu, kodatua, pemuleꞌa hei lekiꞌ-lekiꞌna wiharo.”
Currently Selected:
Wahiu 10: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
