Wahiu 12
12
Peponoꞌokiꞌi noniuꞌ towoweꞌe hante naga#12:0 Toaꞌ to mepoꞌohi nipandiriꞌ hibali towoweꞌe, hi Yesu iomo Oꞌanaꞌ, hei Belisiꞌ nipandiriꞌ hibali naga.
1Uko tiꞌo, kuꞌokiꞌ haꞌanu tandaꞌ to mepohele i laniꞌ: uwaꞌ haduo towoweꞌe, baduꞌna hibali wanta ando, hei metotiꞌi i womboꞌ wula. I tutuꞌna uwaꞌ totali to niwali ka hampuluꞌ meroꞌonu betueꞌ. 2Towoweꞌe tiꞌo kolentuꞌana mehinonaꞌi. Io merorai alaꞌ komaporiꞌna hingkiꞌ moꞌanaꞌ. 3#Dan. 7:7, 20, 24Uwaꞌ tene halangkaꞌ tandaꞌ to mepohele to niꞌokiꞌ i suruga. Uwaꞌ hambaꞌa naga to momeaꞌ hei kodeꞌ mpololeke, tutuꞌna pitu onu hei motanduꞌ hampuluꞌ. I lekiꞌ-lekiꞌna tutuꞌna uwaꞌ totali datu. 4Naga tiꞌo mampelabehiꞌki lelona, noruiꞌ hadolaꞌ tolu ka betueꞌ i laniꞌ hei notubehi pe womboꞌ duniaꞌ. Metotiꞌimo naga tiꞌo i hinarona towoweꞌe to hingkiꞌ moꞌanaꞌ, hingkeꞌna noliomiꞌi anaꞌne to hingkiꞌ memolo. 5#Mas. 2:9Moꞌanaꞌmo mpuꞌu towoweꞌe tiꞌo Haduo tomaꞌani. Oꞌanaꞌ tiꞌomo to hingkiꞌ moparentai humanele duniaꞌ hei Io hingkiꞌ motiko laiꞌ besi, tandaꞌ komakuasaꞌNa. I tempona Oꞌanaꞌ tiꞌo memolo, Io hingkiꞌ noliomi naga, angkana Io kaliuꞌ niroa honiꞌi nikomi nolou pe Pueꞌ Ala, hingkeꞌna meparentaHi moꞌawa i suruga. 6#Kel. 16:4-18; 1Dat. 17:2-4; 19:3-6Uko tiꞌo, towoweꞌe tiꞌo mehilaimo nolou pe popada lori, honiꞌi meꞌohaꞌ i peꞌohaꞌa to nopatimomo Pueꞌ Ala. Towoweꞌe tiꞌo nirewahi i lali 1.260 ando komoruene.
7 #
Dan. 10:12, 21; 12:1; Yud. 9 Uko tiꞌo, kuꞌokiꞌ poponiꞌ to kodeꞌ i suruga. Tadulako malaꞌeka to nikokeneꞌi hi Mikael moꞌawa hante hangko malaꞌekana moꞌewa naga tiꞌo. Angkana naga tiꞌo nopororui malaꞌekana moꞌewa hi Mikael. 8Naga tiꞌo hante malaꞌekana, ninanihi, iomo horiana hamboaꞌmohi nipoliu meꞌohaꞌ i suruga.#12:8 malaꞌeka to mampororuiꞌi Uwaꞌ merontibura malaꞌeka. Hantibura mengkoruꞌ nturusi pe Pueꞌ Ala. Hantibura moꞌewa Pueꞌ Ala. Iohi tokodake ba lomoa hinewowoꞌena. 9#Pwl. 3:1-5Naga to kodeꞌ tiꞌo nitubemo ka suruga pe duniaꞌ moꞌawa hante malaꞌekana. Iomo ule to tuwuꞌ ka uluꞌ-uluꞌna, to nitiꞌi woꞌo Belisiꞌ ba Tadulakora Lomoa. Io to mampomonawuꞌ toaꞌ i humanele duniaꞌ.
10Uko tiꞌo, kuhori womo loaꞌ i suruga to mololita nopokobue, notiꞌi:
“Hinewoꞌenamo tempone Pueꞌ Ala Pueꞌta
mepaꞌani kotuwuꞌ to wolaꞌ pe toaꞌNa,
mampopebahaꞌ komakuasaꞌNa,
hei mampemoluka moparenta hibali Datu.
Hieꞌemo tempone Datu to Mamposalamaꞌ to Noꞌuwiꞌ Pueꞌ Ala
hingkiꞌ mampopebahaꞌ komakuasaꞌNa,
alaꞌ tomesosalaꞌi nibuemo ka suruga;
iomo to poko mosalaꞌihi toaꞌ to mepoꞌohi i hinarona Pueꞌ Ala Pueꞌta.
11Toaꞌ to mepoꞌohi tiꞌo monanimo Belisiꞌ hante raꞌana Anaꞌ Gimba,
hante komaniuꞌa to ropowute.
Hawaꞌhi motehuꞌ mahi.
12Iomo horiana motanaꞌkei, to meꞌohaꞌ i suruga,
angkana hurewuꞌmokei, to meꞌohaꞌ i humanele duniaꞌ,
alaꞌ Belisiꞌ mengkohoumo nolou pe ingkei.
Makaja kobukotane,
alaꞌ nobahaꞌi tempone mampomaporiꞌ toaꞌ hingkiꞌ tutumo.”
13Ikonobahaꞌnalu naga tiꞌo konitubenemo pe duniaꞌ, io modapaꞌ towoweꞌe to mampoꞌanaꞌki Oꞌanaꞌ tomaꞌani tiꞌo. 14Angkana towoweꞌe tiꞌo nipaꞌani meroꞌonu kepaꞌ to kodeꞌ, hibali kepaꞌ muntuꞌ to kodeꞌ mpololeke. Iomo horiana melokamo nolou pe popada lori i peꞌohaꞌa to nipatimomoki, hingkeꞌna hawaꞌi nohua naga tiꞌo. Itoꞌo, io nirewahi tolu ntoꞌa hantangaꞌ komoruene. 15Uko katoꞌo, naga tiꞌo mampehopuki uwai to woriꞌ ka omeꞌna, hingkeꞌna towoweꞌe tiꞌo moꞌanduꞌ, 16angkana duniaꞌ mosulungi towoweꞌe tiꞌo: hangkaꞌ-hangkaꞌlu woiꞌ tiꞌo mekonano maliomi uwai to nopehopuki naga tiꞌo. 17Bukota mpololeke naga pe towoweꞌe tiꞌo, io horiana noloumo mampomeroaki toaꞌ pemuleꞌana towoweꞌe tiꞌo to mampetuntui hawaꞌna Pueꞌ Ala hei mampowute noniuꞌ hi Yesu hante kuasaꞌNa. 18Uko tiꞌo, naga tiꞌo metotiꞌi i bota ntahiꞌ.#12:18 I lali woriꞌ suraꞌ to niꞌukiꞌ medulu-dulu, teꞌukiꞌ waheꞌe: metotiꞌiꞌa i bota ntahiꞌ. Kololiuhana teꞌukiꞌ i lalana 13:1.
Currently Selected:
Wahiu 12: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
