1 Korintus 13
13
Rima
1Kehapoꞌi kubiaꞌ mololita i lali wiharo malaꞌeka ba wiharo toaꞌ to hawaꞌi kubahaꞌ, angkana ane hawaꞌi uwaꞌ komarimangku, hawaꞌi modumbuꞌ kotuwuꞌka. Lekiꞌ-lekiꞌna komapande tiꞌo hibalilu monina goꞌ ba tanengko to melili. Hawaꞌi modumbuꞌ.
2Kehapoꞌa pahua komapande mampowute lolita to ka Pueꞌ Ala, hei kubahaꞌ lekiꞌ-lekiꞌne to tewuni, hei maroho pepoꞌohingka horiana kubiaꞌ molimba biri, angkana ane hawaꞌi uwaꞌ komarimangku, hawaꞌi modumbuꞌ kotuwuꞌka.
3Ane lekiꞌ-lekiꞌna lumangku kudolaꞌ-dolaꞌkihi toaꞌ to merima-rima, hei kupewei woꞌo wotangka hingkeꞌna nihunuꞌi, angkana ane hawaꞌi uwaꞌ komarimangka, hawaꞌi modumbuꞌ kotuwuꞌka.
4Hapo palaihane to nitiꞌi rima? Ane mampokarimaki hangko awanta, hangangaa:
sabaraꞌki
hei moromiꞌ lalinte,
hawaꞌi pobahaꞌ mohiriꞌ,
hawaꞌki mampokokodeꞌ,
hawaꞌki mamperenaki wotanta,
5hawaꞌki mowali hapo to molungkaꞌi adaꞌ,
hawaꞌki moparuku peleihanta hadoduonta pe toaꞌ ntaniꞌna,
hawaꞌki hohiꞌ bukota,
hei hawaꞌki momepoꞌilali.
6Ane marimakei pe hangko awanta, palaihana:
hawaꞌi tolei walia to kodake,
angkana to tolei, walia to moromiꞌ,
7mojagai konaꞌna toaꞌ,
mepoꞌohiki nturusi,
mohinaruki nturusi,
hei sabaraꞌki nturusi kehapoꞌi ba hapolu to morumpaki.
8Rima hawaꞌi hingkiꞌ mokoꞌukoa. Angkana ane uwaꞌ to mapande mampowute lolitana Pueꞌ Ala hingkiꞌ uwaꞌ tempone komapande tiꞌo moholi. Ane uwaꞌki to mapande mololita i lali wiharo to handoaꞌi nibahaꞌ to mepohele, hingkiꞌ uwaꞌ tempone komapande tiꞌo hingkiꞌ uko. Ane pahuaki komapande ka Pueꞌ Ala hingkeꞌna pobahaꞌki hapo to handoaꞌi robahaꞌ awanta, hampiha tempo komapande tiꞌo hamboaꞌmo niparalui. 9Hinewowoꞌena lekiꞌ-lekiꞌna komapandena toaꞌ makuraꞌ tene. Hingkoweꞌ toaꞌ to mampowute lolita to ka Pueꞌ Ala, makuraꞌ tene komapandere. 10Angkana ane hupaꞌmo tempone Pueꞌ Ala mampomombaha lekiꞌ-lekiꞌna, hamboaꞌmo hingkiꞌ uwaꞌ komapande tiꞌo, alaꞌ hamboaꞌmo roparaluꞌi.
11Rapaꞌna, tempoku tene oꞌanaꞌ, pololitangku hibali tene oꞌanaꞌ; hatoꞌo woꞌo pekiringku hante waliangku. Angkana hinewowoꞌena, monindimoꞌa; tiꞌo horiana kupohentemo hapo to kuwali hampiha. 12Hinewowoꞌena, hibaliki toaꞌ to mepomororoa to hawaꞌi mombaha, alaꞌ handoaꞌi tene tobahaꞌ hohumbo kototuꞌuana. I ando to hingkiꞌ dongkaꞌ, honiꞌi tobahaꞌ wae lekiꞌ-lekiꞌne, alaꞌ hingkiꞌ momehinoroiki hante Pueꞌ Ala. Hinewowoꞌena, makuraꞌ tene kokubahaꞌne Pueꞌ Ala, angkana i ando to hingkiꞌ dongkaꞌ, hingkiꞌ kubahaꞌ mpololeke Pueꞌ Ala hibali woꞌo Io pobahaꞌa hinewowoꞌena.
13Mewaliꞌ hinewowoꞌena, uwaꞌ tolu langkaꞌ to hangangaa towali: mepoꞌohiki pe Pueꞌ Ala, mohinaruki i dandina Pueꞌ Ala, hei marimaki pe hangko awanta. Angkana ka tolu langkaꞌ tiꞌo, to meliu mpololeke komoromiꞌne iomo rima.
Currently Selected:
1 Korintus 13: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
