1 Korintus 14
14
Kodeꞌ dumbuꞌne komapande mampowute lolitana Pueꞌ Ala
1Mewaliꞌ, to hangangaa topohimpodulu, iomo mampokarimaki hangko awanta, hei hangangaa tokodokoꞌi mpololeke woꞌo pahua komapande ka Inohaꞌ Mangkolehi. Angkana komapande to modumbuꞌ mpololeke iomo komapande mampowute lolita to ka Pueꞌ Ala. 2Toaꞌ to mololita i lali wiharo to handoaꞌi nibahaꞌ to mepohele, hawaꞌhi mololita pe toaꞌ, angkana mololitahi hante Pueꞌ Ala, alaꞌ toaꞌ ntaniꞌna hawaꞌhi pobahaꞌ hapo to nitiꞌi. Alaꞌ perandana Inohaꞌ Mangkolehi, mampololitahi hapo to tewuni i toaꞌ. 3Angkana toaꞌ to mampowute lolita to ka Pueꞌ Ala, lolitara mampokaroho lalina hangko awara, mampoturuꞌhi, hei mampododoli lalira. 4Toaꞌ to mololitahi i lali wiharo to handoaꞌi nibahaꞌ to mepohele, mampokaroholuhi lalira hadoduora, angkana toaꞌ to mampowute lolita to ka Pueꞌ Ala, mampokaroho lalira lekiꞌ-lekiꞌna toaꞌ i lali jumaꞌa.
5Peleihangku halali-halali, hingkeꞌna ingkei lekiꞌ-lekiꞌna pobahaꞌkei mololita i lali wiharo to handoaꞌi nibahaꞌ to mepohele, angkana moromiꞌ tene ane mampowutekei lolita ka Pueꞌ Ala, alaꞌ ane mampowutekei lolita ka Pueꞌ Ala, kodeꞌ podumbuꞌane i toaꞌ ntaniꞌna hintina mololitakei i lali wiharo to ka kuasaꞌ Inohaꞌ Mangkolehi. Angkana ane uwaꞌhi to molimba wiharo tiꞌo hingkeꞌna nibahaꞌi palaihane, honiꞌi uwaꞌ wae podumbuꞌane mampokaroho lalira lekiꞌ-lekiꞌna toaꞌ i lali jumaꞌa.
6Mewaliꞌ halali-halali, ane rapaꞌna nolouꞌa maminggu moꞌawa hante ingkei, hei mololitaꞌa i lali wiharo to handoaꞌi nibahaꞌ to mepohele, hapomo dumbuꞌne i ingkei? Angkana modumbuꞌ mpololeke ane kupowutekikei hapo to nopotongawakiꞌa Pueꞌ Ala, ba mampokononto tungkaihana Pueꞌ Ala, ba mampowuteꞌa lolita ka Pueꞌ, ba mepoturuꞌa. 7Hingkoweꞌ woꞌo parewa to momoni hibali tulali ba katapi, ane hawaꞌi nipomomuni ngkoromiꞌ, hawaꞌi uwaꞌ podumbuꞌane. Toaꞌ to mampehoromua hawaꞌi pobahaꞌ lengkoꞌna monina. 8Hei ane uwaꞌ torompeꞌ to nitowuiꞌ hingkeꞌna mowowoi surodadu nolou moponiꞌ, angkana ane hawaꞌi mononto konipomomunine, hihimo to hingkiꞌ timomo nolou moponiꞌ? 9Hatoꞌo woꞌo ingkei: ane mololitakei i lali wiharo to handoaꞌi nibahaꞌ to mepohele, hohumbomo korobahaꞌne palaihane hapo to itiꞌikei? Lekiꞌ-lekiꞌna lolitami hawaꞌi modumbuꞌ, hibalilu parowo to moliu.
10I duniaꞌ hieꞌe, molangkaꞌ-langkaꞌ wiharo, hei lekiꞌ-lekiꞌna wiharo uwaꞌ palaihane. 11Angkana ane uwaꞌ toaꞌ to mampololitakiꞌa i lali wiharo to hawaꞌi kubahaꞌ, hingkiꞌ kupowuli hapo to nololita. Hatoꞌo woꞌo, ane mololitaꞌa i lali wiharo to hawaꞌi robahaꞌ, hingkiꞌ ropowuli hapo to kupasuwu. 12Hatoꞌo woꞌo ingkei halali-halali: alaꞌ koꞌikodokoꞌinakei pahua komapande ka Inohaꞌ Mangkolehi, mewali hangangaa iperapiꞌkei to modumbuꞌ mpololeke iomo komapande to mampokaroho lalira lekiꞌ-lekiꞌna toaꞌ i lali jumaꞌa.
13Iomo horiana, hihimo to mololita i lali wiharo to handoaꞌi nibahaꞌ to mepohele, hangangaa merapiꞌ woꞌo pe Pueꞌ hingkeꞌna pahua komapande molimba lolitana tiꞌo, hingkeꞌna lekiꞌ-lekiꞌna toaꞌ to mampehoromua hingkiꞌ pobahaꞌ palaihana. 14Alaꞌ ane mekokaeꞌki mopakeꞌ wiharo to handoaꞌi tobahaꞌ, mekokaeki ka lalinta, angkana hawaꞌi moliu pekirinta alaꞌ hawaꞌi tobahaꞌ hapo palaihane lekiꞌ-lekiꞌna to topasuwu. 15Mewaliꞌ, hapo to hangangaa towali? Mekokaeki mopakeꞌ wiharo to handoaꞌi tobahaꞌ to ka Inohaꞌ Mangkolehi, hei mekokaeki woꞌo mopakeꞌ wiharo to robahaꞌ hangko awanta. Moromiꞌ ane molingaki mampokodeꞌ Pueꞌ Ala mopakeꞌ wiharo to handoaꞌi tobahaꞌ to ka Inohaꞌ Mangkolehi, hei molingaki woꞌo mampokodeꞌ Pueꞌ Ala mopakeꞌ wiharo to robahaꞌ toaꞌ ntaniꞌna. 16Ane rapaꞌna mantiꞌiki woriꞌ komoromiꞌ pe Pueꞌ Ala i lali wiharo to handoaꞌi kahampiha tobahaꞌ, toaꞌ to pahori hawaꞌi hingkiꞌ pobahaꞌ palaihana, mewali hawaꞌhi wadi mantiꞌi “Amin” hei mamponiuꞌ pekokae tiꞌo. 17Kehapoꞌi moromiꞌmo pekokaente mantiꞌi woriꞌ komoromiꞌ i Pueꞌ Ala, hawaꞌi hingkiꞌ modumbuꞌ i hangko awanta, alaꞌ pekokaenta tiꞌo hawaꞌi hingkiꞌ mampokaroho lalira.
18Kutiꞌi woriꞌ komoromiꞌ i Pueꞌ Ala, alaꞌ mololitaꞌa i lali wiharo to mepohele ka ingkei lekiꞌ-lekiꞌmi. 19Angkana ane mamingguki, agingku mampowute halangkaꞌ rolangkaꞌlu lolita mopaguru toaꞌ, hintina mampasuwuꞌa woriꞌ wiharo to mepohele, angkana hawaꞌi robahaꞌ toaꞌ hapo palaihane.
20Halali-halali! Inioꞌkei mampekiri hibali oꞌanaꞌ. Hangangaa mampekirikei hibali toaꞌ to monindimo, hei noniuꞌ i walia to kodake, hangangaa hibalikei himidoꞌ to handoaꞌi tene pobahaꞌ hapo-hapo. 21#Yes. 28:11-12I lali Suraꞌ mangkolehi, teꞌukiꞌ waheꞌe:
Notiꞌi Pueꞌ Ala:
“Moliu i wiharo to handoaꞌi nibahaꞌ to mepohele
hingkiꞌ Kupoturuꞌkihi toYahudi.
Hingkiꞌ Kuwowoihi toaꞌ ka woiꞌ to moꞌela
hingkeꞌna mampowutehi lolitangKu i toYahudi i lali wiharo to hawaꞌi robahaꞌ.
Angkana kehapoꞌi hatoꞌo,
hawaꞌhi hingkiꞌ mampoꞌohi lolitangKu.”
22 #
Sur. 2:4-11
Mewaliꞌ, ane uwaꞌki to mololita i lali wiharo to handoaꞌi nibahaꞌ to mepohele, lolitana tiꞌo tandaꞌ kuasaꞌ ka Pueꞌ Ala pe toaꞌ to handoaꞌi tene mepoꞌohi pe Io, handoꞌio pe toaꞌ to mepoꞌohimo. Angkana ane mampowuteki lolita to ka Pueꞌ Ala, lolitanta tiꞌo mewali tandaꞌ kuasaꞌ ka Pueꞌ Ala pe toaꞌ to mepoꞌohi, handoꞌio pe toaꞌ to hawaꞌi mepoꞌohi. 23Kehapoꞌi hatoꞌo, ane uwaꞌhi toaꞌ to handoꞌio tosarani ba to handoaꞌi tene pobahaꞌ hawaꞌna Pueꞌ Ala, hei nolouhi maminggu moꞌawa hante ingkei, hapo to hingkiꞌ rotiꞌi ane lekiꞌ-lekiꞌmi mololita i lali wiharo to handoaꞌi nibahaꞌ to mepohele? Mononto hingkiꞌ rotiꞌi magilakei. 24Angkana ane lekiꞌmi mampowute lolita to ka Pueꞌ Ala, hei mekahi haduo toaꞌ to handoꞌio toSarani ba to handoaꞌi tene pobahaꞌ hawaꞌna Pueꞌ Ala, io hingkiꞌ pobahaꞌ palaihana lolitami hei nobahaꞌ komadosane, 25hei lekiꞌ-lekiꞌna to tewuni i lalina hingkiꞌ mambaha. Koꞌukoana, io hingkiꞌ melingkotuꞌ menomba pe Pueꞌ Ala, honiꞌi mantiꞌi, “Tuꞌu mpololeke Pueꞌ Ala uwaꞌ i ingkei!”
Ane mamingguki, hangangaa niꞌatoroꞌ moromiꞌ
26Mewaliꞌ halali-halali, hapo palaihane lekiꞌ-lekiꞌna tiꞌo? Ane maminggukei:
uwaꞌ to molinga,
uwaꞌ to mepoturuꞌ,
uwaꞌ to mampowute lolita to ka Pueꞌ Ala,
uwaꞌ to mololita i lali wiharo to handoaꞌi nibahaꞌ to mepohele,
uwaꞌ to molimba wiharo tiꞌo hingkeꞌna robahaꞌi lekiꞌ-lekiꞌna toaꞌ.
Lekiꞌ-lekiꞌna tiꞌo nipopodumbuꞌ mosulungi jumaꞌa.
27Ane uwaꞌhi toaꞌ to mololita i lali wiharo to handoaꞌi nibahaꞌ to mepohele, hangangaa roduolu wute totolu, inioꞌ nomelobi ka tolu duo. Hei inioꞌhi mololita lekiꞌ, hangangaa momehawa-hawahi. Hei hangangaa uwaꞌ toaꞌ to molimba wiharora hingkeꞌna robahaꞌi palaihane. 28Ane hawaꞌi uwaꞌ to molimba lolitara, toaꞌ to mololita i lali wiharo to handoaꞌi nibahaꞌ to mepohele, hangangaa monondiiꞌhi ane mamingguki. Agina mololitahi pe Pueꞌ Ala i lalira.
29Ane uwaꞌhi to mampowute lolita to ka Pueꞌ Ala, maganaꞌlu roduo ba tolu duo to mololita, hei hangangaa uwaꞌ toaꞌ ntaniꞌna to mampokononto lolitara, ba ka Pueꞌ Ala ba hawaꞌi. 30Ane rapaꞌna uwaꞌ haduo toaꞌ to mahura to mantorimo peponobuhoꞌi ka Pueꞌ Ala, aginamo toaꞌ to kolentuꞌana mololita meꞌohaꞌ dulu, hingkeꞌna awana wadi mololita. 31Mewaliꞌ, wadikei momehawa-hawa mampowute lolita to ka Pueꞌ Ala, hingkeꞌna lekiꞌmi pahua poturuꞌ to mampokaroho lalimi. 32Toaꞌ to mampowute lolita to ka Pueꞌ Ala hangangaa mampokononto ba temponamoꞌi mololita ba handoaꞌi tene. 33Lala mpenomba hangangaa nipopatengkaꞌ ngkoromiꞌ, hintotoꞌ hante peleihana Pueꞌ Ala. Hawaꞌi nolei Pueꞌ ane uwaꞌhi toaꞌ to metuli. Tiꞌomo atura to ropetuntui i lali jumaꞌa-jumaꞌa i imbo-imbolu.
34Mewaliꞌ, towoweꞌe hangangaa monondiiꞌ ane mamingguki. Hawaꞌhi nipoliu mololita, hei hangangaa mengkoruꞌhi hibali to teꞌukiꞌ i lali atura agama. 35Ane mangkodokoꞌihi pobahaꞌ ba hapolu, aginamo nipeꞌitanoki romoꞌi pe maꞌanira i tambi, alaꞌ hawaꞌi hintotoꞌ ane towoweꞌe mololita kolentuꞌanta maminggu.
36Ba itiꞌikeireꞌi ingkeimo to ulu-uluꞌne mampowute hawaꞌna Pueꞌ Ala? Ba itiꞌikeireꞌi hawaꞌna Pueꞌ Ala ropowutelu pe ingkei? 37Ane uwaꞌhi toaꞌ to mantiꞌi, “Mantorimoꞌa komapande mampowute lolita to ka Pueꞌ Ala,” ba “Mantorimoꞌa komapande ka Inohaꞌ Mangkolehi,” toaꞌ tiꞌo hangangaa mopangakuꞌ hapo to kuꞌukiꞌ hieꞌe iomo hawaꞌ ka Pueꞌ. 38Angkana ane hawaꞌhi mampoꞌohi poturuꞌku hieꞌe, inioꞌhi ipoꞌohikei!
39Mewaliꞌ halali-halali, hangangaa ikodokoꞌikei mpololeke hingkeꞌna pahuakei komapande mampowute lolita to ka Pueꞌ Ala, angkana inioꞌhi woꞌo niꞌopi to mololita i lali wiharo to handoaꞌi nibahaꞌ to mepohele. 40Lekiꞌ-lekiꞌna hangangaa niwali motuntuni lala to masipatoꞌ hei motuntuni atura to moromiꞌ.
Currently Selected:
1 Korintus 14: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
