1 Korintus 12
12
Kopebahaꞌ to moꞌoriꞌ-ori ka Inohaꞌ Mangkolehi
1Kololiuhana halali-halali, hingkiꞌ mololitaꞌa noniuꞌ i pepaꞌani to totorimo ka Inohaꞌ Mangkolehi. Tungkaihangku hingkeꞌna ibahaꞌkei mpololeke hapo to tuꞌu noniuꞌ i Komapande tiꞌo. 2Iponindikei halali-halali, hampiha ikohandoaꞌami tene pobahaꞌ Pueꞌ Ala, teruiꞌ lalimi menomba pe lente lomoa to rowowalilu to hawaꞌi hohumbo mololita. 3Iomo horiana kulei hingkeꞌna ibahaꞌkei: haduo toaꞌ to mololita nokomi perandana Inohaꞌ Mangkolehi, hawaꞌi hingkiꞌ mantiꞌi, “Hi Yesu buntoꞌmo!” Hatoꞌo woꞌo ane uwaꞌ toaꞌ to mantiꞌi, “Hi Yesu iomo Pueꞌ!” Palaihana io noranda Inohaꞌ Mangkolehi.
4Woriꞌ langkaꞌ kopebahaꞌ to nopaꞌanikiki Inohaꞌ Mangkolehi, angkana Io haduolu. 5Woriꞌ langkaꞌ jama to tojama pe Pueꞌ, angkana Pueꞌ haduolu. 6Woriꞌ langkaꞌ lala to nopake Pueꞌ Ala mampotongawa kuasaꞌNa i lali kotuwuꞌta, angkana Pueꞌ Ala haduolu. Iomo to mampaꞌaniki kuasaꞌ mampopatengkaꞌ jamaNa.
7Ingkiꞌ haduo-haduo nipaꞌaniki Komapande ka Inohaꞌ Mangkolehi,#12:7 Komapande ka Inohaꞌ Mangkolehi Basa woꞌo 1Kor. 12:27-28; Rm. 12:4-8; Eps. 4:11. hingkeꞌna topakeꞌ mosulungi halali hampepoꞌohinta.
8I haduo toaꞌ, Inohaꞌ Mangkolehi mepaꞌani komapande hingkeꞌna nobiaꞌ mampowute lolita to moromiꞌ hante to masipatoꞌ mpololeke.
I to haduona, Io mempaꞌani Komapande mampokononto noniuꞌ Pueꞌ Ala.
9I toaꞌ ntaniꞌna, Nopaꞌani pepoꞌohi to maroho.
Hei i to haduona woꞌo, Inohaꞌ Mangkolehi mepaꞌani kuasaꞌ mepokoꞌoriꞌ.
10I to haduona, Inohaꞌ Mangkolehi mepaꞌani kuasaꞌ hingkeꞌna nobiaꞌ mowali tandaꞌ kuasaꞌ;
hei i to haduona, Nopaꞌani komapande mampowute lolita to ka Pueꞌ Ala.
I to haduona woꞌo, Nopaꞌani Komapande mampopoꞌoriꞌori hapo to ka Inohaꞌ Mangkolehi hante hapo to handoꞌio ka Inohaꞌ Mangkolehi.
I toaꞌ ntaniꞌna, Nopaꞌani komapande mololita i lali wiharo to hawaꞌi nibahaꞌ to mepohele.#12:10 wiharo to ka Inohaꞌ Mangkolehi Wiharo tiꞌo hawaꞌi nipegurui.
Hei i to haduona woꞌo, Nopaꞌani Komapande molimba wiharo tiꞌo hingkeꞌna robahaꞌ toaꞌ ntaniꞌna hapo palaihane.
11Lekiꞌ-lekiꞌna tiꞌo mehupaꞌ ka Inohaꞌ Mangkolehi to haduolu. Iomo to mampaꞌaniki kopebahaꞌ to moꞌoriꞌ-ori motuntuni peleihaNa hadoduona.
Haꞌanu wota angkana woriꞌ langkaꞌ podolaꞌane
12Ingkiꞌ to mepoꞌohi pe Kerisitu wadi nipandiriꞌ hibali wota toaꞌ. Ane wotana toaꞌ haꞌanulu, angkana woriꞌ langkaꞌ podolaꞌane. Kehapoꞌi woriꞌ langkaꞌ podolaꞌane, lekiꞌ-lekiꞌna podolaꞌana tiꞌo mewali haꞌanu wota. 13Hatoꞌo woꞌo ingkiꞌ to mepoꞌohi. Ingkiꞌ lekiꞌ-lekiꞌta mewaliki hibali haꞌanu wota, alaꞌ niriuki lekiꞌ-lekiꞌta hante Inohaꞌ Mangkolehi to haduolu, hei ingkiꞌ lekiꞌ-lekiꞌta pahua Inohaꞌ Mangkolehi to hibali, moromiꞌ toYahudi ba to handoꞌio toYahudi, moromiꞌ to nipohawiꞌ ba to hawaꞌi nipohawiꞌ.
14I wotanta uwaꞌ kapuꞌ, uwaꞌ korawe, hei woriꞌ langkaꞌ dolaꞌna to ntaniꞌna. 15Ane rapaꞌna kapuꞌ mantiꞌi, “Aku handoꞌioꞌa korawe, iomo horiana hawaꞌa mekahi dolaꞌna wota,” tuꞌureꞌi kapuꞌ tiꞌo handoꞌio dolaꞌna wota? 16Ane tolina mantiꞌi, “Aku, handoꞌioꞌa mata, iomo horiana hawaꞌa mekahi dolaꞌna wota,” tuꞌureꞌi tolina tiꞌo handoꞌio dolaꞌna wota? 17Ane rapaꞌna lekiꞌ-lekiꞌna dolaꞌna wotanta mewali lekiꞌna mata, hohumbo lalane hingkeꞌna wotanta pohori? Ane lekiꞌ-lekiꞌna mewali tolina, hohumbo lalane hingkeꞌna wotanta hohumbo meroroki? 18Iomo horiana Pueꞌ Ala mowali hingkeꞌna wotanta uwaꞌ langkaꞌ-langkaꞌne dolaꞌna. Molangkaꞌ-langkaꞌ Noporia i wotanta motuntuni peleihaNa i peꞌohaꞌana to masipatoꞌ. 19Ane rapaꞌna Nopohalangkaꞌlu lekiꞌ-lekiꞌna dolaꞌna wotanta, imboꞌina to wadi nitiꞌi wota? 20Mewaliꞌ, woriꞌ dolaꞌna wota, angkana haꞌanulu wotanta.
21Mata hawaꞌi wadi mampatiꞌiki korawe, “Hawaꞌkei kuparaluꞌi!” Hei tutuꞌ hawaꞌi wadi mampatiꞌiki kapuꞌ, “Hawaꞌkei kuparaluꞌi!” 22Kotuꞌuana, dolaꞌna wotanta to torekeꞌ moledeꞌ, tiꞌo wae to modumbuꞌ mpololeke. 23Dolaꞌna wotanta to torekeꞌ hawaꞌi moromiꞌ, tiꞌo wae to hangangaa toꞌadaꞌi. Dolaꞌna wotanta to hawaꞌi masipatoꞌ roꞌokiꞌ toaꞌ ntaniꞌna, dolaꞌna tiꞌo wae to hangangaa torewahi. 24Angkana dolaꞌna wotanta to moromiꞌ roꞌokiꞌ toaꞌ, hawaꞌi paralu topodaꞌ. Pueꞌ Ala morewahi dolaꞌna wotanta hingkeꞌna to makuraꞌ niꞌadaꞌi, tiꞌo wae to torewahi mpololeke. 25Nowali hatoꞌo hingkeꞌna hawaꞌi mewali posisalaꞌ i wotanta, lekiꞌ-lekiꞌna matengkaꞌ moromiꞌ. Iomo horiana lekiꞌ-lekiꞌna dolaꞌna wotanta hangangaa momerewahi. 26Ane uwaꞌ hadolaꞌ wota to molalo, lekiꞌ-lekiꞌna wota hingkiꞌ mohoriki. Ane uwaꞌ hadolaꞌ wota to nipokodeꞌ, lekiꞌ-lekiꞌna wota hingkiꞌ nipokodeꞌ.
27Ingkiꞌ lekiꞌta iomo wotana Kerisitu hei haduo-haduoki iomo hadolaꞌ ka wotaNa tiꞌo. 28Hei Pueꞌ Ala mampaꞌani toaꞌ i lali jumaꞌa jamana haduo hei haduo:
kaꞌisaꞌ, uwaꞌhi to mewali suroNa,
kadua, uwaꞌhi to mewali to pampowute lolita ka Pueꞌ Ala,
katoluna, uwaꞌhi to mepoturuꞌ.
Hei uwaꞌhi woꞌo to Nopaꞌani kuasaꞌ mowali tandaꞌ kuasaꞌ.
Uwaꞌhi to Nopaꞌani kuasaꞌ mepokoꞌoriꞌ,
uwaꞌhi to pobahaꞌ hohumbo lala mosulungi hangko awara,
uwaꞌhi to mewali tadulako,
uwaꞌ to Nopaꞌani komapande mololita i lali wiharo to handoaꞌi nibahaꞌ to mepohele.
29Hawaꞌi lekiꞌ-lekiꞌna to mewali suro, ba to pampowute lolita ka Pueꞌ Ala, ba guru. Hawaꞌi lekiꞌ-lekiꞌna to hohumbo mowali tandaꞌ kuasaꞌ 30ba mampokoꞌoriꞌ toaꞌ. Hawaꞌi lekiꞌ-lekiꞌna to pahua komapande mololita i lali wiharo to handoaꞌi nibahaꞌ to mepohele, ba molimba wiharo tiꞌo hingkeꞌna robahaꞌi toaꞌ ntaniꞌna hapo palaihane. 31Mewaliꞌ, hangangaa ikodokoꞌikei mpololeke pahua komapande ka Inohaꞌ Mangkolehi to meliu mpololeke komoromiꞌne, angkana uwaꞌ tene to meliu mpololeke komoromiꞌne, tiꞌomo to hingkiꞌ kupowutekikei.
Currently Selected:
1 Korintus 12: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
