TINGULI 28
28
Balakati ode taa u modungohe
(Im. 26:3-13; Tin. 7:12-24)
1“Wonu timongoli modungohe to Eeya Allahu Taa̒ala limongoli wau debo molotolo hilao mohutu mao̒ ngoa̒amila palenta uwohi mai lowatia todulahee botie, yi Tio mamopowali olimongoli bangusa talaba-labaalo masaahuru todunia. 2Podungohulo to Eeya Allahu Taa̒ala limongoli, yi ngoa̒amila balakati botie mawohi-Lio mai ode limongoli:
3Mabala-balakatilo kokoo-tawaalo wau hahaa-laboluwalo limongoli.
4Mabala-balakatilo timongoli, tilinggula mongo walai̒ mongoli dadaata, tilapulo huta limongoli letaletaao̒ wau sapi boli batade himba limongoli ojumulaa daa̒.
5Mabala-balakatilo sembo lopale limongoli boli ua̒alo u pohutuo limongoli monto pale boito.
6Mabara-balakatilo totoonulalo kelekela limongoli.
7Wonu timongoli tuhuolio, Eeya mamopo olaaheo̒ muusu limongoli. Timongolio mamohutu alihu moolato moluhu lou̒ aa̒atulu, bo tumeteo̒ wolo aa̒a-mbulatia.
8 Eeya Allahu Taa̒ala limongoli mamo balakati mai tolopani limongoli wau moluango yiyii-bungowalo limongoli wolo pale. Tio mamo balakati mai olimongoli tolipu uwohi-Lio mai olimongoli.
9Wonu timongoli modungohe to Eeya Allahu Taa̒ala limongoli wau mohutu mao̒ totoonulalo palentaa-Lio, timongoli mapowalii-Lio umati-Lio lohihilao, debo odelo u dilanti-Lio mai. 10Yi ngoa̒amila bangusa todunia mamoo̒onto deu̒ timongoli bangusa tatilulaoto Eeya, wau timongolio mamo hulumati wau moohe olimongoli. 11Timongoli mawohiya-Lio walao̒ dadaata. Bibiahi mongoli mamowali dadaata wau tilapulo huta limongoli laba-labaalo daatalio tolipu u dilanti lo Eeya odeli nenemoya limongoli u wohi ode limongoli. 12Eeya mamopo tuhutai didi to sembolio monto tambati polahuwa-Lio ulaba-labaalo daata tohulungo. Tio mamo balakati mai totoonulalo tolopani limongoli, tilinggula timongoli mowali mopo bulotao̒ ode dadaata bangusa, bo timongoli lohihilao sambeloolo mobuloto. 13Eeya Allahu Taa̒ala limongoli mamopowali olimongoli tau̒wa towolota lo babaa-ngusawalo, bo diila muri. Wonu timongoli tatapu wau molotolo hilao modungoheo̒ ngoa̒amila palenta lo Eeya uwohi mai lo watia todulahee botie, timongoli malebe mao̒ maa̒amulu mola wau diila pee̒enta mao̒ tumouli. 14Bo diila mao̒ pomalonga sama-samaata papaa-lentawalo boito penu boli wolo dudelo woloolo mola olo. Diila mao̒ pomuja olo wau motiwato to ii̒i-lawaalo wewo.”
Aa̒a-kibatiyalo lou̒ diila tatapu wau molotolo hilao
(Im. 26:14-46)
15“Bo wonu timongoli diila modungohe to Eeya Allahu Taa̒ala limongoli, wau diila tatapu wau molotolo hilao mohutu mao̒ totoonulalo palenta wau buto-I̒o uwohi mai laatia olimongoli todulahee botie, yi totoonulalo laa̒anati botie mamotoduo mai olimongoli:
16Malaa̒-laa̒anatilo kokoo-tawaalo wau hahaa-laboluwalo limongoli.
17Malaa̒-laa̒anatilo sembo lopale limongoli wau ua̒alo u pohutuo limongoli monto pale boito.
18Malaa̒-laa̒anatilo timongoli, tilinggula bo ngoi̒di walai̒ mongoli, tilapulo huta limongoli, wau sapi boli batade himba limongoli.
19Malaa̒-laa̒anatilo totoonulalo kelekela limongoli.
20Wonu timongoli mohutu u moleeto wau diila mololimo to Eeya, Tio mamopo dungga mai baala puyoo̒to wau totoolo todelomo totoonulalo u pohutuo limongoli, tilinggula todelomo ngoi̒ntalo mola timongoli pobinasaalo sama-samaata. 21Ngongoto domi ngongoto mamotoduo mai ode limongoli, tunggula pulitio diaaluo penu boli ngotaa mao̒ monto olimongoli donggo meitolaa tolipu u potibiluloa̒ limongoli boito. 22Eeya mamo hukuumani mai olimongoli wolo ngongoo-towaalo umembito, himata-matanga wau polipitolo. Tio mamopo dungga mai polohengu wau dupoto u moo̒pobu tilinggula sembo limongoli moruusa. Ngoa̒amila baala boito molemba tulusi tolimongoli tunggula timongoli binasa. 23Didi diila tamo tuhutai wau huta limongoli mowali motoheeto debo odelo wate. 24Eeya diila tamopo tuhutai taluhu didi, bo didi lopeaahuo̒ wau hungayo tunggula timongoli binasa ngoa̒amila.
25Wonu timongoli diila modungohe to Eeya Allahu Taa̒ala limongoli, yi Tio mamohutu mai olimongoli olaahe lo mumuu-suuwaalo limongoli. Timongoli mamohutu alihu moolato muluhu lou̒ aa̒atulu, bo tumeteo̒ wolo aa̒a-mbulatia. Ngoa̒amila bangusa todunia mamolaasa timihela hapato moo̒onto omarapo limongoli. 26Wonu timongoli mate, milate limongoli mowali ua̒alo lo bubuu-lungiyalo wau binatangi mongantau, wau diaaluo tamo lanenga bibii-natangiyalo boito. 27Eeya mamo hukuumani mai olimongoli wolo boboo-heyaalo debo odelo u pilohutu-Lio totaulo Masiri. Wawai̒ mongoli mamopolu wolo ambalowuta wau kukudu u motohidu, bo diaaluo wunemio. 28Eeya mamohutu mai olimongoli mowali biyongo, pitoo̒ wau moolingua. 29Tou̒ mohuloonu tutu timongoli oa̒apao̒-oa̒apao̒ debo odelo taa pitoo̒, bo diila moo̒dungga dalalo. Ngoa̒amila tolopani limongoli diaaluo mao̒ u momata. Timongoli mololalaaita deehe wau lambatolio, wau diaaluo tamo tulungi olimongoli.
30Wonu timongoli diila modungohe to Eeya Allahu Taa̒ala limongoli, susuu-aliyaalo botie mamolemba mai batanga limongoli: Timongoli mamo tilantahu, bo taa wewo tamonika mao̒ wolo tilantahi mongoli. Timongoli mamomangu bele, bo diila motibiluloa̒ tobele boito. Timongoli mamo pomulo ilengi lo angguru bo diila molamela huhuu-ngolio. 31Sapi limongoli mao̒lotolio totalu lomato limongoli, bo timongoli diila molamela tapulio. Kokoo-lodaiyalo limongoli madeloolio mota sambela hebilohe mao̒ limongoli wau diila powalingolio mai. Hihii-mbawaalo limongoli mawuduolio ode mumuu-suuwaalo limongoli wau diaaluo tamo tulungi. 32Totalu lomato limongoli mongo walai̒ mongoli mawuduolio odelo wato ode tau deli. Timii̒du dulahu mato limongoli mopiyoo̒to mololohe mongo walai̒ mongoli, bo tolopani limongoli diila ohuna, sababu timongolio diilalo mohualingai. 33Bangusa deli mamohama mao̒ ngoa̒amila tilapulo huta u motapu mai limongoli wolo tio̒opatea, bo timongoli lohihilao diila moo̒tapu wolo-wolo ngopohia polodeehe mololalaaita wau huhutu udiila omanusia. 34Timongoli mamowali biyongo sababu wolo uhe ilolaasawa limongoli. 35Eeya mamohutu mai oa̒ati mongoli polupolu lo ambalowuta u mongongoto wau diila mowali moluli; monto oa̒ato demola wimbupulu limongoli mamopolu wolo boboo-heyaalo.
36Timongoli wau olongia limongoli madeloo lo Eeya ode lipu deli udiila otaawa limongoli wau diila olo otaawa linenemoya limongoli. Mota teto timongoli mamotiwato to ila-ila u pilohutu monto ayu wau botu. 37To lilii-puwaalo tambati limongoli pilopo bubuu-ayaawa lo Eeya, tau-tauwalo matimihela hapato moo̒onto olimongoli; timongoli mahente-henteo̒lio wau poi̒ii̒ya limongolio.
38Dadaata bili u pomua̒yadi mongoli, bo ngoi̒di tilapulo u motapu limongoli, sababu pilomulo limongoli mopulito aalo lobulita. 39Timongoli mamo pomulo ii̒i-lengiyalo angguru wau molaalao̒, bo diila molipu hungo lo angguru meaalo taluhu lo anggurulio, sababu bungo lo angguru boito mopulito aalo lowulodu. 40To ngoilanggubu lipu limongoli mobutu mai bungo lo jaitun, bo hungolio mamo duduulahu, tilinggula timongoli diila moo̒tapu winulio. 41Timongoli mamoo̒tapu walao̒ talolai̒ wau taabua, bo timongolio mahamaa limongolio odelo tawalo lo popaatea, tilinggula timongoli oolia limongolio. 42Ngoa̒amila bungo lo ayu wau pilomulo limongoli mopulito aalo lobuhudu.
43Tau deli tabilu-biluloa̒ tolipu limongoli malebe he okawasa, hiambola kawasa limongoli lohihilao lebe he iilangi. 44Timongolio odoi u pobulotolio ode limongolio, bo timongoli diila owolo-wolo u pobulotolo olimongolio.
45Totoonulalo baala boito mamolemba olimongoli wau tulusi momuyu olimongoli tunggula timongoli binasa, sababu timongoli diila modungohe to Eeya Allahu Taa̒ala limongoli wau diila moponao̒ bubuu-too̒waalo uilohi-Lio mai ode limongoli. 46Ngoa̒amila baala boito debo odelo bukuti monto hukuumani lo Eeya tolimongoli wau wali mola limongoli u ohiheo-hiheolo mao̒. 47Timongoli mabilaa-lakatia lo Eeya Allahu Taa̒ala limongoli todelomo totoonulalo sua̒li, bo timongoli diila mohuto motiwato to Olio wolo hilaa u ihilasi wau meenagahu. 48Sababu uito timongoli motiwato tomumuu-suuwaalo tailao mai lo Eeya u moluwali olimongoli. Timongoli mapolangolo, mototoa̒ngo wau laalaala boli odiaaluwoa todelomo totoonulalo sua̒li. Eeya mamodeehe olimongoli tunggula timongoli binasa. 49Bangusa tuwau udiila opaahamua limongoli bahasaalio mapodungga mai lo Eeya monto huudu dunia mai moluwali olimongoli. Debo odelo bulungi rajawali timongolio mamodehita olimongoli. 50Timongolio diila omanusia wau diila modehu hilao tomongo panggola meaambo tau̒kekeei̒. 51Timongolio mamo poo̒pulitao̒ bibiahu wau tilapulo huta limongoli, wau diila mopo labitao̒ pale tolimongoli, taluhu angguru, winulo jaitun meaalo sapi wau batade himba limongoli tunggula timongoli mate lopolango. 52Timongolio mamoluhu timii̒du kota tolipu uilohi lo Eeya Allahu Taa̒ala limongoli ode limongoli tilinggula dingingo meeseliilio u molanggato wau piloo̒ toheetao̒ limongoli wau hepomangga limongoli boito moloohubu.
53Sambela mumuu-suuwaalo limongoli mobala kokoo-tawaalo limongoli, timongoli mamooli halapani sababu polangolo, tilinggula timongoli molamela mongo walai̒ mongoli lohihilao, mongo walao̒ uilohi mai lo Eeya Allahu Taa̒ala limongoli ode limongoli. 54-55Tumbao̒ taa bangusa talaba-labaalo luuhuru wotadelio mamooli halapani ngotilonggadu polobalawa boito, tilinggula tio molamela mongo walai̒o lohihilao sababu diaaluo ua̒alo wewo. Diaaluo penu boli ngoi̒di mao̒ uilohilio ode wutatio meaalo dilelio tao̒tolia̒ngio meaalo ode mongo walai̒o tadonggo hitumula. 56-57Tumbao̒ taabua bangusa talaba-labaalo luuhuru watedelio wau takaya daa̒ tilinggula diila pee̒enta mao̒ monao̒ tolimbuta, mamohutu odito olo. Tou̒ musu mobala mao̒ kota, taabua boito mamooli halapani sababu polangolo, tilinggula tio wolo tua̒ao̒-tua̒ao̒ molamela walai̒o taboheli pilotutu mai wau talomio. Diaaluo penu boli ngoi̒di mao̒ uilohilio ode dilelio tao̒ tolia̒ngio meaalo ode mongo walai̒o.
58Wonu timongoli diila tatapu wau molotolo hilao modungohe ngoa̒amila butoo̒ lo Eeya Allahu Taa̒ala limongoli utula-tuladee todelomo buku botie wau diila mohulumati to Eeya Allahu Taa̒ala limongoli tau̒daa̒ wau moo̒linggolabu, 59yi Eeya mamopo dungga mai ode limongoli wau wali limongoli ngongoo-towaalo udiila mowali poo̒luliyolo wau wewee-mbelowalo udiila mowali otongolo. 60Ngongoo-towaalo moo̒tihela hapato u silakusia limongoli to Masiri mamei dungga ode limongoli, wau timongoli diila motapu loluli. 61Eeya olo mamopo dungga mai ngongoto u hidala-dalaala wau wembelo udiila iluntee todelomo buku botie, buku Butoo̒ lo Eeya. Lapatao̒ timongoli mapo binasaalio. 62Eleponu boli jumulaa limongoli madebo odelo daata lo poliyama tohulungo, bo ngoi̒di wamabi̒o towolota limongoli tadonggo hitumula, sababu timongoli diila modungohe to Eeya Allahu Taa̒ala limongoli. 63Debo odelo Eeya sanangi mongohi mai u maa̒amulu ode limongoli wau moduhengai jumulaa limongoli, Tio masanangi mopobinasa wau mopo loolopu olimongoli. Timongoli mainggilolio monto lipu udiilalo mohiheo potibiluloa̒ limongoli.
64 Eeya mamopo bubuua̒yawa olimongoli towolota lo babaa-ngusawalo to ngoilanggubu dunia. Mola teto timongoli mamolubo ila-ila u pilohutu monto ayu wau botu, ila-ila udiila otaawa limongoli wau diila olo otaawa linenemoya limongoli. 65Towolota lo babaa-ngusawalo boito timongoli diila tamoo̒ dungga hilaa u tantaramu, wau diaaluo tambati u mowali tanggulo limongoli miliki limongoli; Eeya mamohutu mai olimongoli molawalo daa̒ wau motombodu lou̒ diila o halaapani. 66Tutumuli mongoli malaito aa̒anjamu lou̒ topotala. Hui wau dulahu timongoli molaasa timihela hapato wau moohe mate. 67Tou̒ moo̒onto mao̒ penu boli wamabi̒o, putu limongoli lime-limelo sababu moohe. Didimodupo timongoli mohaalapu meidungga mai hui, wau tou̒ hui timongoli mohaalapu meidungga mai dumodupo. 68Eeya mamuli molao mola olimongoli ode Masiri wolo kaapali, penu boli Tio malo tahuda mai deu̒ timongoli diilalo powalingo-Lio mola ode Masiri. Mola teto timongoli mamo tolopani mopotali lobatanga limongoli odelo wato tomuusu limongoli, bo diaaluo penu boli ngotaa mao̒ tamohuto motali olimongoli.”
Currently Selected:
TINGULI 28: LAIGOR
Highlight
Copy
Compare
Share
Want to have your highlights saved across all your devices? Sign up or sign in
