TINGULI 29
29
1Uutieelo tataa-heyaalo daantia u topalenta lo Eeya pilohutu lei Musa wolo bangusa lo Isirai̒lu tou̒ timongolio woluo tohuta lo Moab. Daantia boito debo odelo duhengio lou̒ daantia upilohutu lo Eeya woli mongolio to Hui̒dee Sinai.
Muli moe̒ela mola opopiohu lo Eeya wau daantia-Lio
2Tei Musa lopoa̒hu ngoa̒amila taulo Isirai̒lu lotia̒mbu, lapatao̒ loloi̒ya mao̒ olimongolio, “Maa iloontonga limongoli lohihilao wolo upilohutu lo Eeya odeli olongia lo Masiri, tahidihuma pantungo ulipulio wau ngoilanggubu lipulio. 3Timongoli maloo̒onto olo babaa-lawaalo u moo̒tihela hapata, mumuu̒u-jijatiyalo wau momoo̒o-linggolabeyalo upilohutu lo Eeya. 4Bo tunggula todulahee botie Eeya diipo longohi mai olimongoli u mongalati mao̒ ngoa̒amila u ilolaasawa limongoli boito. 5Wopato pulu lotaunu mola hiheolio Eeya lodelo olimongoli lolibaya tohuta luasi udelita, boli odito pakeyangi wau sandale limongoli diila lowali yiloodu. 6Timongoli diila oroti u mowali tamelolo, taluhu angguru meaalo minumani motoheeto, bo Eeya helongohi mai ngoa̒amila upalaluo limongoli alihu otaawa limongoli deu̒ Tiolo Eeya Allahu Taa̒ala limongoli. 7Wau tou̒ ito leidungga mai ode tambati botie, Olongia Sihon lonto Hesybon wau Olongia Og lonto Basan lonao̒ mai loluhu olanto. Bo ilolaahento timongolio. 8Huta limongolio hilamanto wau tilayadunto ode suku Ruben, Gad wau ngotayadu ode suku Manasye. 9Yi oditolio mamusi timongoli tatapu wau molotolo hilao modungoheo̒ ngoa̒amila daantia botie, alihu timongoli otilapulo todelomo totoonulalo tolopani limongoli.
10Todulahee botie timongoli ngoa̒amila timihulao̒ totalu lo Eeya Allahu Taa̒ala limongoli, ngoa̒amila tau̒wa losuku, tahimuloa lo ulipu, polowila, ngoa̒amila mongo lolai̒, 11mongobua, tau̒kekeei̒, wau ngoa̒amila tau deli tahi biluloa̒wa towolota limongoli wau hemomantu olimongoli momontode ayu wau momoota taluhu. 12Eeya Allahu Taa̒ala limongoli mohutu mai daantia woli mongoli, wau timongoli ngoa̒amila tahi ambuwa tewe u molihutao̒ daantia boito wau mololimo upilopo wajibulio todelomo daantia boito. 13Wolo daantia boito Eeya todulahee botie mopoo̒tohetai olimongoli mowali bangusaa-Lio, wau Tio mowali Allahu Taa̒ala limongoli debo odelo u pilodanti-Lio odeli nenemoya limongoli Abraham, Isihaka wolei Yako. 14Daantia boito wolo totoonulalo upilopo wajibulio pilohutu mai lo Eeya diila bo woli mongoli wamabao̒, 15bo wolo timii̒du taa u hitihula tewe todulahee botie, totalu lo Eeya Allahu Taa̒alanto, wau olo wolo walinto mola todulahee momooli.”
Aa̒a-kibatiyalo lo udiila tatapu wau molotolo hilao to Eeya
16“Donggo eela limongoli woloolo mola paladunto to Masiri wau woloolo mola ito helonao̒ lolibaya tolipu lo babaa-ngusawalo wewo. 17Timongoli maloo̒onto bubuu-iyaalo lo balaahala limongolio u moo̒jijio̒ monto ayu, botu, talaa̒ wau hulawa. 18Oditolio poo̒dahailo diila bolo penu ngotaa mao̒ towolota limongoli, talolai̒ meaalo taabua, ngaalaa̒ meaalo suku tatihu-tihula tewe, mopalinga monto Eeya Allahu Taa̒alanto u molubo ila-ila lobangusa wewo. Huhutu boito debo odelo waa̒ato u mobutu mai mowali pilomulo mopaa̒ato wau opeedi. 19Towolota limongoli tamo dungohe hihiile u wolo moo̒ohuu̒ boito diila bolo woluo tao̒ pikiilangi deu̒ paladio madebo mopiohu, eleponu tio neekati moduduo̒ dalalio lohihilao. Sua̒li boito mamopo binasa mai olimongoli ngoa̒amila, tau-tauwalo moleeto meaalo taa mopiohu. 20Eeya diila tamo ngambungu mai taa u debo odelo uito. Boliio̒ mao̒, tio mao̒tuhata lo omuluka lo Eeya uwali-walihuhu, wau totoonulalo baala utula-tuladee todelomo buku botie mamotoduo mai to olio, tunggula tio pobinasaa mao̒ lo Eeya. 21Eeya mamopowali olio debo odelo pohumaya tuwau duo̒lo ngoa̒amila suku lo Isirai̒lu, wau mohukuumani mai olio wolo laa̒anati u ilunte todelomo daantia u leituladu todelomo buku botie, buku Butoo̒ lo Eeya.
22Todulahee momooli, wali mola limongoli wau tau deli monto lipu u molamingo mamoo̒onto babaa-lawaalo wau polodutolo upilopo dungga mai lo Eeya tolipu limongoli. 23Hahaa-labowaalo limongoli mamowali huta luasi daa̒ udelita tau̒-tau̒ubu waliirangi wau watingo. Hutalio diila mowali pomulowalo wau huo̒yoto diila mohuto mobutu mai mota teto. Lipu limongoli madebo odelo Sodom wau Gomora, Adma wau Jeboim u pilopo binasa lo Eeya tou̒ omulukaa-Lio wali-walihuhu. 24Yi ngoilanggubu dunia mamohintu, ‘Yilongola Eeya helohutu mai odito wolo lipu limongolio? Wolo sababuulio mailaba omulukaa-Lio boito?’ 25Wau tametio yito, ‘Sababu timongolio malomaahe daantia lo Eeya, Allahu Taa̒ala nenemoya limongolio; daantia u pilohutu-Lio woli mongolio tou̒ Tio lodelo wau lopolualao̒ olimongolio lonto Masiri. 26Timongolio helo tiwato to ila-ila wewo udiila otaawa limongolio, lebe-lebe pomao̒ Eeya helodini olimongolio molubo ila-ila boito. 27Uitolo sababuulio Eeya lomuluka ode umati-Lio wau helo podungga mao̒ tolipu limongolio ngoa̒amila baala utula-tuladee todelomo buku botie. 28Omuluka lo Eeya lobutuulo mola wolo wali-walihuhu, wau todelomo omulukaa-Lio uleidaa̒ Tio lomahutao̒ bangusa lo Isirai̒lu lonto huta limongolio wau lopolayahe mola ode lipu deli tilinggula timongolio woluo mola teto.’
29Woluo dengolo sua̒li u hiluli lo Eeya Allahu Taa̒alanto; bo buto-I̒o mapilo ilaalo-Lio mai to olanto, wau ito wau walinto mola musi modungoheo̒ u ohiheo-hiheolo mao̒.”
Currently Selected:
TINGULI 29: LAIGOR
Highlight
Copy
Compare
Share
Want to have your highlights saved across all your devices? Sign up or sign in
