TINGULI 27
27
Bubuu-too̒waalo Allahu Taa̒ala tiluladu tobotu
1Lapatao̒ pee̒-pee̒enta wolo mongo tau̒wa lo Isirai̒lu, tei Musa lopo tunggulao̒ tahuli botie ode bangusa boito, “Dungohi mao̒ ngoa̒amila palenta uwohi mai lowatia olimongoli todulahee botie. 2Tou̒ timongoli mobalango Dutulaa Yordan u tumuwoto ode lipu uwohi mai lo Eeya Allahu Taa̒ala limongoli ode limongoli, timongoli musi mopo tihulao̒ dengolo botu leidaa̒ lapatao̒ padetala lotilo. 3Tuladeelo to boboo-tuwaalo boito timii̒du loi̒ya monto bubuu-too̒waalo botie.
Wonu bolo timongoli matilumuwoto ode lipu ukaya wau molomiodu udilanti mai lo Eeya, Allahu Taa̒ala linene moya limongoli ode limongoli, 4wau timongoli mailoluo to ngotuali lo Dutulaa Yordan, yi timongoli musi monao̒ mola ode Hui̒dee Ebal. Mota teto timongoli musi momadeta lotilo boboo-tuwaalo boito debo odelo upilo malentai lowatia ode limongoli todulahee botie. 5Totambati boito olo musi potihulo limongoli ode Eeya Allahu Taa̒ala limongoli mesba tuwau monto boboo-tuwaalo udiipo pee̒enta mao̒ kilalaja wolo pakaakasi wate, 6sababu timii̒du mesba u potihulolo ode Eeya Allahu Taa̒ala limongoli musi pohutuwola monto botu u wimu-wimumuto. Toitaato mesba timongoli musi mopodewo babaa-keyaalo yilalango. 7Podewowaalo olo bake lo polodame limongoli wau tamela mao̒ teto wau poti wengahulo totalu lo Eeya Allahu Taa̒ala limongoli. 8Toitaato boboo-tuwaalo u piladeta wolo tilo boito musi tuladee mao̒ limongoli lou̒ mopatato timii̒du loi̒ya monto bubuu-too̒waalo Allahu Taa̒ala.”
9Lapatao̒ pee̒-pee̒enta wolo mongo iimamu lo Lewi, tei Musa loloi̒ya mao̒ ode ngoilanggubu bangusa lo Isirai̒lu, “Mongo wutato poo̒tuotilo wau dungohilo! Todulahee botie timongoli malowali umati lo Eeya Allahu Taa̒ala limongoli. 10Sababu uito podungohulo to Eeya Allahu Taa̒ala limongoli wau pohutuo mao̒ ngoa̒amila palentaa-Lio uilohi mai lowatia todulahee botie.”
Laa̒anati ode taa udiila modungohe
11Lapatao̒ tei Musa loloi̒ya mao̒ ode bangusa lo Isirai̒lu, 12“Lapatio mao̒ timongoli mobalango Dutulaa Yordan, suku Simeon, Lewi, Yehuda, Isakhar, Yusu wau Benyamin musi timihulao̒ toitaato Hui̒dee Gerijim tou̒ moloi̒ya mao̒ balakati to bangusa botie. 13Tou̒ moloi̒ya mao̒ laa̒anati, suku Ruben, Gad, Asyer, Jebulon, Dan wau Naputali musi timihulao̒ toitaato Hui̒dee Ebal. 14Tau-tauwalo Lewi musi moloi̒ya mao̒ tataa-heyaalo u wumbutio mola botie wolo suala moo̒ohuu̒ wau taulo Isirai̒lu musi molametao̒, ‘Amin’.
15Tau-tauwalo Lewi: ‘Malaa̒-laa̒anatilo taa u mohutu bui̒ monto botu, ayu meaalo logamu, wau molubo olio wolo tua̒ao̒-tua̒ao̒; Eeya molonuo̒ tamomuja balaahala!’
Ngoilanggubu ulipu: ‘Amin!’
16‘Malaa̒-laa̒anatilo taa udiila mohulumati mongo dulaa̒lio wau mopoluli mao̒ olimongolio iloloihia.’
‘Amin!’
17‘Malaa̒-laa̒anatilo taa u moi̒ideo̒ sipatana lo tiheedio.’
‘Amin!’
18‘Malaa̒-laa̒anatilo taa umopo lapalo taa pitoo̒.’
‘Amin!’
19‘Malaa̒-laa̒anatilo taa u molambata haku lotau deli, walao̒ tadidu otiilo otiyamo wau janda.’
‘Amin!’
20‘Malaa̒-laa̒anatilo taa u mohina oliyamolio sababu mou̒ulauwa wolo tala ngota lodile liyamolio.’
‘Amin!’
21‘Malaa̒-laa̒anatilo taa u mou̒ulauwa wolo binatangi.’
‘Amin!’
22‘Malaa̒-laa̒anatilo taa u mou̒ulauwa wolo taabua wutatio tutu, meaalo wutatio ngotiilo ngotiyamo.’
‘Amin!’
23‘Malaa̒-laa̒anatilo taa u mou̒ulauwa wolo tiilo moluhengio.’
‘Amin!’
24‘Malaa̒-laa̒anatilo taa u momate mateelo mao̒ wolo tua̒ao̒-tua̒ao̒.’
‘Amin!’
25‘Malaa̒-laa̒anatilo taa u mololimo sooroi u momate mateelo mao̒ taa udiila ototala.’
‘Amin!’
26‘Malaa̒-laa̒anatilo taa udiila moponao̒ butoo̒ wau pongaajali lo Allahu Taa̒ala wolo huhutu.’
‘Amin!’ ”
Currently Selected:
TINGULI 27: LAIGOR
Highlight
Copy
Compare
Share
Want to have your highlights saved across all your devices? Sign up or sign in
