Roma 4
4
At Abraham endainggen Allah oba panggot disikemo, wene oba mende nggorogo ʼbiluk suguluk imbisak kunogo ʼbisike wene
1Eti paga, nit akoni Yahudi mende nen ninakomba Abraham obabut kagako lagike mende pasik abok ninggit diluk yugun? 2At enggaerek nen pano kagakike paga, Allah nen,
“Wene koba mende nggorogo ʼbigirik, suguluk an paga kunogo ʼbagagi o,” yiluk yogotlepma, enggaerek nen pogorakalep o. Mende, Allah il oba pogorakausak erlok dek welagike. 3Allah wene kolal mbalogo ʼbisuka eti paga ninggit diluk yisuka nogo? Men yisuka dek nogo? Abraham endainggen Allah oba panggot disikemo, at Allah nen,
“Kat kobabut mot-mot kagako dogu kak, kendainggen noba panggot degenma, wene koba mende nggorogo ʼbigirik, suguluk an paga kunogo ʼbagagi o,” (Kej. 15:16)
yiluk yisikemo, kolal mbalogo ʼbisuka. 4Akoni nen yi yabu ndi yabu kagakonem, ininggi onggo wogisiligogi eti, ap yonggo ʼbiligogi mende nen inobabut pano nen werlegat wogisiligogi ʼbuk. Eti ininggi onggo wogisausak mendeat wogisiligogi o. 5Mende, akoni amberek nen Allah akla panorogo yi mende ndi mende kagakidek dogolik, inakla nen,
“It akoni amberek nen Allah ebe inakla kai disi lagaka mende, at nen, it wene inoba mende erlok nggorogo deget diyalok yabunggane suguluk at inom kunogo ʼbiyiligogo,” yiluk inendainggen at oba panggot disinem, at nen,
“Kinobabut mot-mot kagako dogu kak, kinendainggen an noba panggot degepma wene kinoba mende nggorogo ʼbigirik, suguluk an paga kunogo ʼbinagagi o,” yiluk yogisiligogoat. 6At Allah nen esigit diluk kagarinabigogo yiluk, at Daud nen men yisike,
“Akoni nen, Allah akla ambasi ndak-ndak omanggi kagakidekma, wene inoba mende nggorogo ʼbiluk, suguluk inom kunogo ʼbiyiligogo, yiluk, inakla arlenggen kawak o,” yiluk yisikesik kolal men mbalogo ʼbisike,
7“It akoni inasuk warek dek nggorlo kagarigogi mende, Allah nen degerogo togot digik, weyak kagarigogi mende, sebelogo togot digik, kagake mende inakla arlenggen kawak o.
8Nen, it akoni amberek weyak kagarigogi mende pasik, ninombae Allah Endaganggok nen wene enggen ʼbilu inoba ʼbigidek mende inakla arlenggen kawak o,” (Mzm. 32:1)
yiluk kolal mbalogo ʼbisikemo werek.
9“Inakla arlenggen kawak o,” yiluk yisike eti paga, it akoni inowado inenggarlimo mende mbalek mende pasik arlek yisike a? At te, it inowado mbalek dek mende pasik inomat yisike a. Alebagik wene men yogo, Abraham endainggen Allah oba panggot disikemo, at nen,
“Kat kobabut mot-mot kagako dogu kak, kendainggen noba panggot degenma, wene koba mende nggorogo ʼbigirik, suguluk an paga kunogo ʼbagagi o,” (Kej. 1)
yiluk yogokike. 10Esigit diluk yogokike eti, at Abraham e ninggit diluk werekma. At owado enggarlimo mende mbal oba a? Mbalek dek oba o. Eti, owado enggarlimo mende mbalek oba ʼbuk. Awan mbalek dek obaat yogokike o. 11Owado enggarlimo mende esigit diluk awan mbalek dek dogolik endainggen Allah oba panggot disikemo, at Allah nen,
“Wene koba mende nggorogo ʼbigirik, suguluk an paga kunogo ʼbagagi,” (Kej. 17:10)
yiluk yogokike. Esigit diluk kagakikemo yogokike eti, inendainggen enggerlogo dogowagaluk,
“Kowado kenggarlimo mende mbalan,” yiluk yogokikemo nen mbalikikemo, enggagat agike o. Eti paga, akoni inowado inenggarlimo mende esigit diluk mbalek dek dogolik, inendainggen Allah oba panggot diligogi mende taʼbokogonat nen, inombae Abraham at o. It esigit diluk inendainggen Allah oba panggot disinem, at nen,
“Kinobabut mot-mot kagako dogu kak kinendainggen noba panggot degepma, wene kinoba mende nggorogo ʼbigirik suguluk an paga kunogo ʼbinagagi arat o,” yiluk yogisiligogoat. 12Ninakomba Abraham eti owado enggarlimo mende esigit diluk mbalek dek dogolik, endainggen Allah oba panggot disike kak, nit ninowado ninenggarlimo mende esigit dilugat mbalek kalok, Abraham ninakomba yusak erlok dek o. Mende, Abraham obabut waganogo ninendainggen esigit diluk Allah oba panggot disi kalok, Abraham ninakomba yusak o.
Akoni inendainggen Allah oba panggot disinem, at nen abok yisike mende ebe waganigogi wene
13At Allah nen, Abraham men yogokike,
“Agat oba o yi ai ndi ai taʼbokogonat nen, kat kinom, kat nen endago mende inom, kinom indewerek asugun o,” yiluk abok yogisasike. Esigit diluk yogisasike eti, wene at nen ninasuk wakike wene etnogo kologo mot-mot kagako laguka paga yogisasike ʼbuk. Dek o. At te, at endainggen Allah oba panggot disikemo, at Allah nen,
“Wene koba mende nggorogo ʼbigirik, suguluk an paga kunogo ʼbagagi o,” yiluk yogokike eti paga agat abok yogisasike o. 14Akoni wene Allah nen ninasuk wakike wene eti inasuk kologo mot-mot kagarigogi mende arlek Allah nen abok yisike mende eti indewerek ago dogolepma, ninendainggen Allah oba wirlikogonat panggot disi dogolep. Nen, abok yogisasike mende eti dek atlebat o. 15Wene Allah nen ninasuk wakike wene eti paga, Allah akla agaga ninoba ʼbiligogo. Ninasuk wakike eti wakidek dogolepma, wene sagalogo weyak kagarigogi, yiluk yilep degat o. 16Eti paga, Allah obabut pano nen werlegat woknisiligogo, yiluk yuwagaluk, ninendainggen at oba panggot disinem abok yisike mende eti, woknisiligogo o. Nit at nen endago mende wene Allah nen ninasuk wakike wene eti kologo mot-mot kagako dogolik, ninendainggen Allah oba panggot diligogi mende arlek woknisiligogo ʼbuk. Abraham it amberek ninom taʼbokogonat ninombaeatma, it eti at Abraham endainggen Allah oba panggot disike eti kak, inendainggen Allah oba panggot diligogi mende wogisiligogiat o. 17Wene eti pasik Allah nen Abraham men yogokike,
“Yi akoni ndi akoni inunggulowak endaga dogalegat inombae, kat mendagagi o,” (Kej. 17:5)
yiluk yogokikemo kolal mbalogo ʼbisuka. Esigit diluk yogokikemo at Abraham akla nen,
“At Allah akoni warek mende inilugurinakik, nen, yi mende ndi mende dek mende ane paga wereget digik, kagarigogo mende nen abok yokneke eti eberogonat yokneke o,” yiluk endainggen oba panggot disike. 18At Abraham nen,
“An nen endago mende esigit diluk kagat lasugun,” yiluk akla ambausak mondok degat werekma,
“Eberogonat kagat lasigin o,” yiluk endainggen Allah oba panggot diluk mondok kagako lagike eti paga, Allah nen,
“Kat nen endago mende mondok dogalegat wikalasugun o,” (Kej. 15:5)
yiluk abok yogokike ndak-ndagat, yi akoni ndi akoni inunggulowak endaga dogalegat inombae Abrahamat agike. 19Ap Abraham enggaerek nen,
“An nebe 100 tahun negen welagarikmo, nobatne dek agasik, naʼburi endaginabusak mondok erlok dek agi. Nen, nage Sara ebe, mondok abirliat o,” yiluk ilu welagike mende, endainggen Allah oba panggot disike mende eti, akla mbuk agidek panggot diluk mondok welagike. 20Abraham endainggen Allah oba esigit diluk panggot diluk mondok dogolik,
“Allah nen abok yoknikike etnogo, ebeat asigin a? Dek asigin a,” yiluk wene munini ebekidek welagike. Esigit diluk endainggen Allah oba panggot diluk welagike eti paga obatnet disinem Allah pogorako lagike. 21Esigit diluk pogorako dogolik,
“Allah yi mende ndi mende kagasusak erlok arlek etnogo nen abok yoknikike eti, ebeat asiginat o,” yiluk endainggen ʼbogokogonat welagike. 22Esigit diluk kagako lagike eti paga, Allah nen,
“Kobabut mot-mot kagako dogolik, kendainggen noba panggot degenma, wene koba mende nggorogo ʼbigirik suguluk an paga kunogo ʼbagagi o,” (Kej. 15:6)
yiluk yogokike o. 23At Allah nen,
“Wene koba mende nggorogo ʼbigirik suguluk an paga kunogo ʼbagagi o,” yiluk yogokikemo, kolal mbalogo ʼbisukama werek eti, at Abraham arligat ake ʼbuk. 24Nit ninake inomat yoknisasike o. Eti paga, nit nen, ninendainggen ninombae Allah ninewe Endaganggok Yesus watlagikesikmo nen ilugut disike mende etnogo oba panggot diligogi eti paga, at nen,
“Kinobabut mot-mot kagako dogu kak, kinendainggen noba panggot degepma, wene kinoba mende nggorogo ʼbigirik suguluk ninom kunogo ʼbinagagi o,” yiluk yoknisiligogoat. 25At Allah nen, nit at ane sagalogo togot diyalok weyak kagako lago eti paga, Yesus ebe akoni nen wasuwagaluk wusa ʼbi wagikemo ebe wakukama, yabunggane,
“Wene kit kinoba mende nggorogo ʼbigi o,” yiluk, at ninom suguluk kunogo ʼbinanigiluk ilugut disike o.
Currently Selected:
Roma 4: DNA
Highlight
Share
Compare
Copy
Want to have your highlights saved across all your devices? Sign up or sign in
