Popular Bible Verses from Roma 4

Share

Abraham endainggen Allah oba esigit diluk panggot diluk mondok dogolik, “Allah nen abok yoknikike etnogo, ebeat asigin a? Dek asigin a,” yiluk wene munini ebekidek welagike. Esigit diluk endainggen Allah oba panggot diluk welagike eti paga obatnet disinem Allah pogorako lagike. Esigit diluk pogorako dogolik, “Allah yi mende ndi mende kagasusak erlok arlek etnogo nen abok yoknikike eti, ebeat asiginat o,” yiluk endainggen ʼbogokogonat welagike.

Wene eti pasik Allah nen Abraham men yogokike, “Yi akoni ndi akoni inunggulowak endaga dogalegat inombae, kat mendagagi o,” yiluk yogokikemo kolal mbalogo ʼbisuka. Esigit diluk yogokikemo at Abraham akla nen, “At Allah akoni warek mende inilugurinakik, nen, yi mende ndi mende dek mende ane paga wereget digik, kagarigogo mende nen abok yokneke eti eberogonat yokneke o,” yiluk endainggen oba panggot disike.

At Allah nen, nit at ane sagalogo togot diyalok weyak kagako lago eti paga, Yesus ebe akoni nen wasuwagaluk wusa ʼbi wagikemo ebe wakukama, yabunggane, “Wene kit kinoba mende nggorogo ʼbigi o,” yiluk, at ninom suguluk kunogo ʼbinanigiluk ilugut disike o.

At Abraham nen, “An nen endago mende esigit diluk kagat lasugun,” yiluk akla ambausak mondok degat werekma, “Eberogonat kagat lasigin o,” yiluk endainggen Allah oba panggot diluk mondok kagako lagike eti paga, Allah nen, “Kat nen endago mende mondok dogalegat wikalasugun o,” yiluk abok yogokike ndak-ndagat, yi akoni ndi akoni inunggulowak endaga dogalegat inombae Abrahamat agike.

Eti paga, Allah obabut pano nen werlegat woknisiligogo, yiluk yuwagaluk, ninendainggen at oba panggot disinem abok yisike mende eti, woknisiligogo o. Nit at nen endago mende wene Allah nen ninasuk wakike wene eti kologo mot-mot kagako dogolik, ninendainggen Allah oba panggot diligogi mende arlek woknisiligogo ʼbuk. Abraham it amberek ninom taʼbokogonat ninombaeatma, it eti at Abraham endainggen Allah oba panggot disike eti kak, inendainggen Allah oba panggot diligogi mende wogisiligogiat o.

“It akoni inasuk warek dek nggorlo kagarigogi mende, Allah nen degerogo togot digik, weyak kagarigogi mende, sebelogo togot digik, kagake mende inakla arlenggen kawak o. Nen, it akoni amberek weyak kagarigogi mende pasik, ninombae Allah Endaganggok nen wene enggen ʼbilu inoba ʼbigidek mende inakla arlenggen kawak o,” yiluk kolal mbalogo ʼbisikemo werek.

Allah wene kolal mbalogo ʼbisuka eti paga ninggit diluk yisuka nogo? Men yisuka dek nogo? Abraham endainggen Allah oba panggot disikemo, at Allah nen, “Kat kobabut mot-mot kagako dogu kak, kendainggen noba panggot degenma, wene koba mende nggorogo ʼbigirik, suguluk an paga kunogo ʼbagagi o,” yiluk yisikemo, kolal mbalogo ʼbisuka.