Roma 5
5
“At Allah nen yabunggane suguluk ninom kunogo ʼbinanggemo werek,” yiluk yogisasike wene
1Yogondak nit ninendainggen Allah oba panggot disugu eti paga, wene ninoba mende nggorogo ʼbiluk ninom suguluk kunogo ʼbinanggikemo, ninewe Endaganggok Yesus Kristus kagakike eti paga Allah ninom dambukogo pano werek o. 2Nit ninendainggen Yesus oba panggot disugu eti paga, at nen Allah obabut pano nen panot ninabigogo mende eti apma ʼbinanggikemo oba panggot diluk werek o. Dogolik, Allah pogorako mondok dogoligogi eti kak, nit esigit diluk pogot ninabigin o, yiluk ninakla arlenggen kiligogi o. 3Eti akeat ninakla arlenggen kiligogi ʼbuk. Yi aik ndi aik kiligogi eti paga, ninendainggen korle arigogi eti paga, esigit diluk weyagat ninako nggorlek, ninakla arlenggen kiligogiat o. 4Ninendainggen korle atluk nen ilugun oba, Allah nen ninaren mbalogo nen, pano yiligogo. Esigit diluk yiligogo paga, yabunggane eberogonat pano asigin, yiluk ninakla arlenggen kiligogi o. 5Pano asigin yiluk ninakla arlenggen kiligogi eti paga, Allah nen Agurengge woknisasikemo ninakla dogolik, i kenarigogi kak, Allah nit ninaʼbuwa mende eti ninakla nggokogo ʼbinaligogo eti paga ninayuk dek werek o. 6Nit Allah ebe togot diluk walegat dogolik, ninebe erlok dek werekma, at Allah nen,
“It esigit diluk werek eti inake, Kristus etinem watlasuwak,” yiluk ambasike paga ebe wakukama ninobalikmo watlagike o. 7Ap omanggi nen,
“An nebe at obabut mot mende eti ake, obalikmo watlasigin,” yiluk yusak angginat o. Esigit diluk mende, ap omanggi ayuk dek mende nen,
“An nebe ap obabut pano mende eti ake obalikmo watlasigin,” yiluk ambausagat a? 8Esigit diluk mende, at Allah ninebe ninaʼbuwa nen kagarigogo mende eti enggagat asuwagaluk, nit weyak kagako werekma, Kristus ebe woknisasikemo ninobalikmo watlagike o. 9At Kristus amep wulabogo watlagike eti paga, wene ninoba mende nggorogo ʼbiluk Allah ninom suguluk kunogo ʼbinanggike eti paga, yabunggane Allah akla agaga ninoba ʼbisinem ndil ninabigin dek nogo? Ndil ninabiginat o. 10Nit alebagik, Allah ninom wim mbalek werekma, yabunggane at aʼbut watlago dogolik, Allah ninom dambulogo ʼbinanggikemo werek o. Esigit diluk werekma, at ebe iluk dogolik, ndil ninabigin dek nogo? Alebagik ndil ninabusak dekma ndil ninakikesik nen, yogondak ninom dambulik dogolik ndil ninabiginat o. 11Mende, eti arligat ʼbuk. Ninewe Endaganggok Yesus Kristus kagakike eti paga, Allah ninom yabunggane suguluk dambulogo ʼbinanggikemo ninom pano werek eti paga, ninakla arlenggen kiligogi o.
Adam nen weyak kagakikesikmo, Kristus nen pano kagakike wene
12Wene eti men kak. Ap omanggiat mende weyak kagakikemo, weyak erlo at oba nen akoni taʼbokogonat weyak ninoba agike. Esigit diluk ninoba agikemo, ninebe taʼbokogonat weyak kagarik wagonem, ilugun oba, ninebe taʼbokogonat watlarigogi o. 13Wene Allah nen ninasuk wakike wene etnogo awan ninasuk wakidek werek nggorlek, akoni weyak kagako laguka. Mende, inasuk awan wakidekma, Allah nen,
“It weyak kagaka,” yiluk wene inoba ʼbigidek welagike. 14Wene inoba ʼbigidek mende, ap Adam welagike kurli nen, lok-lok Musa welagike eta kurli, watlarigogi erlo akoni taʼbokogonat inoba obatneat agikesik nen, watlarik waguka o. Akoni amberek at Adam Allah nen asuk wakike wene sagalogo weyak kagakike kak, esigit diluk kagakidekma, watlarigogi erlo eti inoba atluk nen, watlarik wagukaat. Nen, at Adam kagakike eti, at yabunggane wagike mende eti witluk nen kagasigin mende alino negen kagakike. 15Esigit diluk mende, imbisak inobabut omanggiat ʼbuk. Allah obabut pano nen werlegat woknisasike mende eti mondok nggokma, at Adam Allah wene sagalogo weyak kagakike eti imbisak walkamo, imbisak ndak-ndak dek o. At omanggiat nen weyak kagakike paga, ilugun oba inebe dogalegat watlarik wirigogi. Mende, Allah obabut pano nen Yesus Kristus werlegat woknisasikemo, ap ebe omanggiat mende nen pano kagakike paga, pano erlo akoni dogalegat ninoba wika lagikemo werek o. 16Ap omanggiat nen Allah wene sagalogo weyak kagakike paga, Allah nen, wene oba ʼbiluk weyagat disike o. Esigit diluk weyagat disikemo, yabunggane akoni weyak mondok kagarik waguka mende, at Allah obabut pano nen werlegat onggo dek yoknisasi dogolik,
“Wene kinoba dek o,” yiluk nggorogo ʼbisike. 17Ap omanggiat nen Allah wene sagalogo weyak kagakikesik, watlagikesikmo, watlarigogi erlo at oba nen obatne agikesik nen, wika lagike o. Esigit diluk mende, Allah obabut pano nen, Yesus Kristus werlegat woknisasikemo, at ebe omanggiat nen, pano kagakike etiat, mondok nggogat o. Esigit diluk kagako dogolik, wene ninoba mende werlegat nggorogo ʼbiluk Allah ninom suguluk kunogo ʼbinanggikemo, at ninom kunik niniluk dogolik ninobatnerogo pano dogogun.
18Wene yigi eti, men yigi o. Ap omanggi nen Allah wene sagalogo weyak omanggi pasik kagakike paga, ilugun oba akoni taʼbokogonat wene inoba ʼbiluk weyagat diyasike eti kak, ap omanggi nen Allah wene kologo mot omanggi pasik kagakike paga, wene akoni taʼbokogonat inoba mende nggorogo ʼbigik, inilugurinakik, kagakike. 19Ap omanggiat nen Allah wene kologo kagakidek weyak kagakike eti paga, akoni inebe dogalegat weyak kagarik wirigogi eti kak, ap omanggiat nen, Allah wene kologo kagakike eti paga, akoni ninebe dogalegat wene ninoba mende nggorogo ʼbisikemo Allah akla warlok mende kagako dogogun o. 20Mende, at omanggi weyak kagakikesik oba Allah wene sagalogo weyak kagarigogi mende anggin asuwagaluk, Allah nen wene ninasuk wakike wene yabunggane woknisasike. Weyak kagarigogi eti wikalarik lago nggorlegat, Allah obabut pano nen ninaʼbuwa kiligogo eti, mondok nggogat agike o. 21Weyak kagatluk watlarigogi eti paga, weyak kagarigogi mende obatne agike eti kak, ninewe Endaganggok nen wene ninoba mende nggorogo ʼbiluk, Allah ninom kunogo ʼbinanggike eti paga, Allah obabut pano nen ninaʼbuwa kiligogo mende eti obatne agikemo, niniluk mondok dogogun o.
Currently Selected:
Roma 5: DNA
Highlight
Share
Compare
Copy
Want to have your highlights saved across all your devices? Sign up or sign in
