1Korintus 2
2
Yesus ebe o kari-garo paga mendiluk wakuka wene
1Nagarlagi nirugi o. Allah wene eti akla limago werekma, akoni agat oba mende nen inonggodek mende eti, an nen ʼbukakogo yokisa wagagi eti, an nane ambusu ndik-ndik yiligogo paga, nakla nggagalek oba, yokisa wagagi dek. 2An kit ninom dogolik, nakla nen wene werlek mende ebekidek, at Yesus Kristus ake ebeko dogolik, nggok kak, at ebe o kari-garo paga mendiluk wakuka wene eti arligat ebesigin o, yiluk nakla ambasigi. 3Nakla esigit diluk ambasigisik nen ebeko dogolik, an nenggaerek nebe kaiatma nayuk nen nowak del kiligat kinoba wagagisik welagagi ambigi. 4Esigit diluk dogolik, akoni inawene an nakla nggagalek oba, nane pano paga, nobatnerogo yokisasigi dek o. At te, at Allah Agurengge obatne paga, yokisasigimo, ebeat agikemo, kinilenggen kasigip. 5Esigit diluk yokisasigi eti, kit kinendainggen akoni inakla nggagalek mende eti inoba panggot diluk welagidek mende, Allah obatne werek yiluk, kinendainggen at oba panggot dubagik nen yiluk yokisasigi o.
“Allah akla nggagalek welagike mende eti, ʼbukakogo yoknisaligogo,” yiluk yogisasike wene
6It akoni inendainggen korle mende kalogat, wene korle mende eti inakla nggagukogo yogisaligogi o. Esigit diluk yogisaligogi eti, it akoni agat oba mende yoma, inawene mende dek. Ineugi nggokndek inebe yabunggane dek asugun mende o yogondak ya inapma werek yoma, inawene nggagalek wene mende degat o. 7Wene eti Allah akla nggagalek wene limago welagike mende ʼbukakogo yogisaligogi. Wene eti akoni agat oba mende inonggodek mende, ebe-alep Allah nen yi mende ndi mende winamet digidek dogolik, at nenat nit panot ninakonem ninakla arlenggen kowagaluk akla ambasike mende limagoat welagike. 8Akoni agat oba mende ineugi nggokndek o yogondak ya inapma werek yoma wene eti inilu agidek inonggodegat werek o. Inilu dogolepma, ninewe Endaganggok pogorarigogi etnogo, ebe o kari-garo paga mendiluk watlep degat o. 9Wene eti pasik, Allah wene yigit diluk kolal mbalek werek,
“At Allah nen yi mende ndi mende akoni nen inilenggen kigidek. Inasuk kolkidek. Inakla nen nggagalkidek. Wene taʼbokogonat nit akoni at ebe ninaʼbuwa dogoligogo mende nggarelogo ʼbinanggemo werek o,” (Yes. 64:4)
yiluk kolal mbalogo ʼbisukama werek. 10ʼBinangge mende eti, at Allah Agurengge nen yi mende ndi mende mbenarigogo eti paga, Allah akla limago dogoligogo mende eti inomat mbenako dogolik, ʼbukakogo yoknisasike o. 11Nit akoni ninakla ta ilu. Ninenggaerek ninakla dombok ninilu dogoligogi ambaligogo. Eti kagat, Allah akla it amberek inonggodegat. Enggaerek Agurengge arligat ilu dogoligogo o. 12Nit nen, akoni agat oba mende yoma inagurengge waganggugu ʼbuk. At Allah obabut pano nen woknisasike mende ninilu asuwagaluk, at Agurengge wusa ʼbi wagikemo korlasugu o. 13At Agurengge korlasugusik, Allah obabut pano nen woknisaligogo mende eti, akoni Allah Agurengge inakla werek mende yogisawogoluk, akoni agat oba mende inakla nggagalek mende nen yanggul nisasinem yogisaligogi ʼbuk. Allah Agurengge nen yanggul nisasinem yogisaligogi o. 14Wene Allah Agurengge nen woknisaligogo wene eti, it akoni Allah Agurengge inakla werek mende arlek didiligogi eti paga, it akoni inobabut inikogat dogolik, didiligogi dek. Esigit diluk didiligogi dek eti, it nen,
“Wene eti akoni nggembu mende nen yiligogi negen yiligogi,” yiluk yiligogi eti paga, wene eti didigidek werek o. 15Esigit diluk mende, nit Allah Agurengge ninakla werek mende, yi wene ndi wene didiligogi. Didisinem, it amberek nen, nit ninobabut didinanigogi dek o. 16Wene eti pasik, Allah wene paga kolal men yiluk mbalogo ʼbisuka,
“Ninombae Endaganggok akla eberigogo eti, ta kak ilu. Nen ta kak nen, at asuk wasusak,” (Yes. 40:13)
yiluk it ap Allah wene yogisasi laguka mende nen, kolal mbalogo ʼbisuka. Esigit diluk mende, Kristus akla eberigogo wene eti nit ninakla esigit dilugat eberigogi o.
Currently Selected:
1Korintus 2: DNA
Highlight
Share
Compare
Copy
Want to have your highlights saved across all your devices? Sign up or sign in
