1Korintus 1
1
Keyagi warinakike wene
1-2Kit Allah aʼburi o Korintus nandorligogi mende, nagarlagi nirugi. An Paulus Allah akla ambasike paga, Kristus Yesus nen nayonggo ʼbiluk laʼbani wagike mende etnogo, ninagarlak Sostenes nimbisak nen, wene yi kolal mbalogo kinoba laʼbi wago o. Kit o Korintus mende Allah nen kinayonggo ʼbisikemo ninewe Kristus Yesus kinom kunik werekma, Allah nen,
“It yi an naʼburi o,” yiluk kinebe at enggaerek ʼbakasikemo werek o. Esigit diluk dogolik, akoni o yi ai ndi ai etoma nen, it inom, nit ninom, ninewe Endaganggok Yesus Kristus endaga mbaligogi mende kinom taʼbokogonat wene yi kolal mbalogo kinoba laʼbi wago o. 3Ninombae Allah, ninewe Endaganggok Yesus Kristus imbisak inobabut pano etnogo nen, pano mende wokisigik, kinendainggen kambugut dinagigik, kagako dogowak o.
Allah nen Yesus alisikogo pano kagat ninabigogo wene
4Allah obabut pano nen, Kristus Yesus alisikogo, pano mende wokisaligogo eti paga, kibitngge-yogongge keyagi wako mondok dogoligogo o. 5Kit Kristus kinom kunik werekma Allah nen kinamende werek kagat kinakemo werek. Esigit diluk dogolik, yi wene ndi wene Allah wene eti erlo kinilu mondok agasip nen, wene pano mondok it amberek yanggul isaligogi o. 6Wene eti Kristus kagakike wene yokisasigimo kinakla nen waganggigisip kinendainggen korlet disigip o. 7Kinendainggen esigit diluk korlet diluk, ninewe Endaganggok Yesus Kristus selekmaat wisigin yiluk, anggorlem dogolik Allah nen woknisaligogo mende eti omanggi awan waganggidek werek ʼbuk. Taʼbokogonat waganggigisip werek o. 8Yabunggane ilugun oba ninewe Endaganggok Yesus Kristus wisigin etinem, kit weyak werekma ʼbikiya wisunogo yiluk, at Kristus nenat kinendainggen korlet kinako dogogin o. 9At Allah nen aʼbut ninewe Endaganggok Yesus Kristus kinom kunik dogobagik nen yiluk kinayonggo ʼbisike o. Esigit diluk, at obabut kumbulik mende nen kinayonggo ʼbisike eti paga, ebeat asigin yiluk kinendainggen wene munini ʼbogokogo dogusak o.
“Allah aʼburi mende inebe minggirlusak dek,” yiluk yisike wene
10Esigit diluk mende, nagarlagi nirugi o. Ninewe Endaganggok Yesus Kristus endaga paga, wene omanggi kinasuk wasik. Kit taʼbokogonat kinebe minggikidek kinom kunik dogolik nen, kinane omanggiat mende yigik, kinendainggen omanggiat welagik, kinakla nen wene omanggiat mende ebekik, kagako dogono o. 11Nagarlagi nirugi o. Wene esigit diluk yigi eti akoni kwe Kloe werekma nen wagakasik, men yega,
“It-irat wenemuk abigogi o,” yiluk ʼbukakogo yoknisi wagakama nen yokisigi o. 12Wene ebe, men yisi lagap eti pasik yigi. Kat omanggi nen,
“An Paulus mende,” yisinem, kat omanggi nen,
“An Apolos mende,” yigik, kat omanggi nen,
“An Kepas mende,” yigik, kat omanggi nen,
“An Kristus mende,” yigik, kinane asokondek dombok yiligogi eti paga yigi o. 13At Kristus eti ebe minggirlogo asokondek kagat lagama nen a? At te, kit pasik an Paulus nebe o paga mendaniluk nakukama nen a? At te, an Paulus nendaga mbalogo nen ima wusa ʼbinagasukama nen a? 14Dek o. An nen kit amberek ima wusa ʼbinagagidek, ambigi. Ap Krispus inom, Gayus inom, eta inarligat ima wusa ʼbiyasigi yiluk Allah keyagi wako lagi o. 15Akoni nen,
“Paulus enggaerek endaga mbalogo ima wusaginakike,” yiluk yunogo yiluk, inebe eta arlek wusaginakigi o. 16I! An nen Stefanus aʼburi inom ima wusa ʼbiyasigimoat kigi. Esigit diluk mende, it amberek inom wusa ʼbiyasigi a? Dek a. An nonggodek. 17At Kristus nen, an nen akoni ima wusaginako dogowagaluk laʼbani wagike ʼbuk. Dek o. Allah wene pano wene eti yogisilik noko dogowagaluk laʼbani wagike o. At ebe o paga mendiluk wakuka etnogo wirlikogo yiluk, an akoni inawene mende nggagukogo yiligogi eti negen yisi dogowagaluk laʼbani wagike dek o.
“Allah awene nggagalek, Yesus ebe etiat o,” yiluk yogisasike wene
18-19It akoni nuk asugun mende nen, men yiligogi,
“Yesus o kari-garo paga wakuka wene eti akoni nggembu mende nen yiligogi negen yiligogi o,” yiluk yiligogi. Esigit diluk mende, at Allah nen,
“Akoni inakla nggagalek mende nen wene nggagukogo yiligogi eti an nen weyagat diyagin o. Nen akoni yi wene ndi wene erlo inilu kagarigogi mende eti an nen deget diyagin o,” (Yes. 29:14)
yiluk yisikemo, kolal mbalogo ʼbisukama werek eti paga, nit ndil ninabigogo mende nen,
“Wene eti Allah obatne etiat o,” yiluk yiligogi.
20Akoni agat oba yoma inakla nggagalek mende eti inom, akoni yi wene ndi wene erlo inilu mende eti inom, akoni wene onggo-onggo yisi dogolik inane obatne arigogi mende eti inom, we wirlikogoat werek o. At Allah nen,
“Akoni inawene inakla nggagukogo yiligogi mende eti akoni inendainggen abit mende nen yiligogi kak yiligogi o,” yiluk yisike dek nogo? 21At Allah akla mondok nggagalek eti paga, men yisike,
“Akoni agat oba mende nen, inenggaerek inawene nggagukogo yiligogi eti paga, an nebe inilu asusak erlok dek o. It amberek nen wene ebe wene yogisilik lagonem, it akoni agat oba mende nen ambasi dogolik,
Wene eti akoni nggembu mende nen yiligogi negen yiligogi, yiluk yisi nggorlegat, it amberek nen,
Wene eti eberogonat, yiluk ambagun mende kalok, an nen ndil inabiginat o,” yiluk akla warlok ambalok nen enggaerek nenat yisike. 22It akoni Yahudi mende nen yisi dogolik,
“Wene diduwagaluk, elalin mende omanggi kagatni o,” yigik, it akoni Yunani mende nen,
“Wene kinakla nggagukogo omanggi yoknisani o,” yigik, yiluk yiligogi mende 23nit nen, Kristus o kari-garo paga mendiluk wakuka wene etnogoat yogisaligogi. Yogisasinem, it akoni Yahudi mende nen,
“Wene eti weyak,” yiluk nggolelogo togot digik, nen, it akoni sikmangge mende nen,
“Wene eti akoni nggembu mende nen yiligogi negen yiligogi,” yiluk togot digik, yiligogi o. 24Esigit diluk mende, it akoni Yahudi mende inom, Yunani mende inom, Allah nen inayonggo ʼbisike mende nen,
“Allah obatne Kristus ebe etiat o. Nen, Allah awene nggagalek ebe, Kristus etiat o,” yiluk didiligogi. 25At Allah awene mendeat, it akoni agat oba mende nen,
“Wene eti akoni nggembu mende nen yiligogi negen,” yiluk yiligogi mende, at Allah akla mondok nggagalek o. Nit akoni ninawene mende ninakla nggagukogo yiligogi eti ninakla abit mende nen yiligogi o. It akoni agat oba mende nen,
“At Allah obatne dek,” ambaligogi mende, at obatneyagat o. Nen, nit akoni nen,
“Ninobatneyak,” ambaligogi mende, ninobatne dek o.
26Nagarlagi nirugi. Kinebe ninggit diluk werekma Allah nen kinayonggo ʼbisike. Kinakla ebetni. Akoni kit mende inakla nggagalek mende inom, inobatneyak mende inom, nggokndek inendaga werek mende inom, inebe dogalegat inayonggo ʼbisike ʼbuk. Dek o. 27At Allah akla nenat, it akoni agat oba mende inakla nggagalek mende eti inenggarli wasigiluk akoni nil-kilsek mendeat mikogo inayonggo ʼbisike. Akoni inobatne werek mende eti inenggarli wasigiluk, it inobatne dek mende mikogo ʼbiyalok inayonggo ʼbisike o. 28At Allah akla nenat, akoni agat oba mende nen pogorako dogolik nggogot diligogi mende eti deget diyagaluk, it akoni agat oba mende inakla nen,
“It eti inebe nggembu mende, mondok inaʼit mende, inendaga dek mende,” yiluk ambaligogi mende eti Allah nen mikogo ʼbiyalok inayonggo ʼbisike. 29Eti paga, nit akoni ninenggaerek nen Allah il oba pogorakausak erlok dek o. 30At Allah nenat kit Kristus Yesus kinom kunik dogobagik nen yiluk ʼbinagekemo werek o. Wene ninakla nggagalek dogu kak, Yesus ebeat woknisasike. Esigit diluk woknisasikemo, at nen Allah ninom yabunggane suguluk dambulogo ʼbinanggik, ninebe Allah ake ʼbinanggik, ndil ninakik, kagarigogo. 31Eti paga, Allah wene kolal mbalogo ʼbisi dogolik,
“At omanggi yi mende ndi mende pasik pogorakagaluk kalok, ninewe Endaganggok etiat pogorasuwak o,” (Yer. 9:24)
yiluk yisukama kolal mbalogo ʼbisuka.
Currently Selected:
1Korintus 1: DNA
Highlight
Share
Compare
Copy
Want to have your highlights saved across all your devices? Sign up or sign in
