1Korintus 3
3
“Ninebe Allah anduwanengge werek,” yiluk yogisasike wene
1Nagarlagi nirugi o. An nen alebagigat, wene akoni Allah Agurengge inakla werek mende yogisiligogi kak, yokisigidek o. Esigit diluk yokisasigi dek eti, kit Kristus kinom kunggigisibat, kinobabut kinikogat dogolik, elege ngget endago mende negen welagagip eti paga, akoni inobabut esigit diluk werekma yogisiligogi kak yokisasigi o. 2An nen akoni inarluwendek kimbiri aʼbet mende wogisiligogi kak, kit wene korle mende waganusak erlok dek eti paga, wene korle mende yanggul kisigidek. Elege ngget endago mende inirlak ambusu wogisiligogi kak, wene anggut mende yokisasigi o. Mende, yogondakne, esigit dilugat wene korle mende yokisausak, kit erlok degat werek o. 3Kit-kirat uwa mbalkik, wenemuk mbalkik, kagarigogi kalok, kinobabut akoni inobaburat werek o. Akoni inobabut inikogat dogolik kagarigogi kak, kagarigogi eti paga yokisigi o. 4Esigit diluk kagako dogolik, kit amberek nen,
“Nit Paulus mende,” yigik nen, kit amberek nen,
“Nit Apolos mende,” yigik, yiligogi kalok, kinobabut, akoni inobaburat werek o. 5At Apolos eti ta nogo? Nen, an Paulus ta nogo? Nit eti ninewe Endaganggok nenat akla ambalok nineyabu dombok kagako dogowagaluk ninayonggo ʼbisikemo nen, at anduwanengge werek o. Esigit diluk at anduwanengge dogolik, wene yanggul kisasugumo, kinendainggen Yesus oba panggot disigip o. 6Wene eti, kimbiri ai yarigogi kak, an nen yakigi. Nen, at Apolos nen, i ndiyalik lagike. Nen, ebe, at Allah nenat nggogot disike. 7Ebe nggok endaga werek, ai yarigogo mende eti ʼbuk. I ndiyalik liligogo mende eti ʼbugat. Nggok endaga werek, Allah nen ebe nggogot diligogo etiat endaga werek o. 8An ai yarigogo mende eti, at i ndiyaligogo mende eti, nimbisak ndak-ndak mendeat, nininggi onggo, ninebe dombok yabu kagako dogogun mende ndak-ndakogonat woknisagin o. 9Kit kinebe eti Allah eyabu kak werekma, nit nimbisak nen Allah eyabu woʼbiyaligogi. Omanggi, kinebe Allah ago palek kak werekma, nimbisak nen Allah ago palogo ʼbiyaligogi o.
10At Allah obabut pano nen nayonggo ʼbisikemo, o eti kerlaga, an nendainggen enggerlek mende nen ʼbisigimo, it amberek nen oba dukogo paligogi o. Mende, akoni inebe dombok, o kerlaga eti paga dukogo paluwogoluk kalok, didiluk nen inendainggen enggerlogo palusak o. 11At Allah nen,
“O eti kerlaga, Yesus Kristus etiat dogowak,” yiluk ʼbisike eti paga, at omanggi nen, o kerlaga ninat mende wusabusak mondok dek o. 12O kerlaga eti wusabek werekma, oba dukogo it amberek nen onggo nggok mbalogo, emas mende palkik, perak mende palkik, nggit enggen permata mende palkik, paligogi. Esigit diluk palko nggorlek it amberek nen o mende palkik, o ngget engga mende palkik, mbuk engga mende palkik, paligogi o. 13Esigit diluk palko werekma, at Kristus yabunggane wisigin etinem, akoni nen o palka mende dombok,
Pano a? Weyak a, yiluk, kindu paga walkasinem, enggagat selekma agonem kugun o. 14Esigit diluk walkasinem, at omanggi nen o kerlaga eti paga palke mende kali ninggidek dogogin kalok, onggo wogosigin o. 15Esigit diluk mende, at omanggi nen o palke mende, kali nonggo kalok, o kali nasinem inebe nggarelogo ʼbiya liligogi kak, at o palke mende eti ebe kak, nggarelogo ʼbi ligin mende, onggo wogosigin dek o. 16Nit ninebe Allah ago palegat, yiluk kinonggodek nogo a? Allah Agurengge ninakla ago palogo werek, yiluk kinonggodek nogo a? 17Kit kinebe, at Allah ago palek werek eti, at mendeat werek o. Eti paga, kit nen Allah ago palek eti weyagat dumo, at nen kit weyagat kinabiginat o.
18Kinenggaerek nen kinebe dalagup o. Kat omanggi nen,
“An akoni yoma inawene mende nakla nggagalek o,” yiluk ambaligogon kalok, kakla ebe wene eti nggagalasuwak nen, akoni inawene eti kakla abit asuwak o. 19Akoni agat oba mende nen,
“Nit akoni ninawene ninakla mondok nggagalek,” yiluk ambiligogi kalok, Allah nen,
“Inakla abit werek o,” yiluk ambaligogo. It ap Allah wene kolal mbalogo ʼbisi laguka mende nen,
“Bagi kerle ʼbilukmo unggisinem nggerokogo warigogo kak, it akoni agat oba mende yoma inakla nggagalek salek dogolik nuket diyiligogi eti paga, nggerelagonem, Allah nen weyagarinabigin werek o,” (Ayb. 5:13)
yiluk kolal mbalogo ʼbisuka. 20Nen, wene omanggi yi,
“It akoni inakla nggagalek mende nen inakla eberigogi eti, we yugunat wirlikogo eberigogi o, yiluk ninombae Endaganggok ilu,” (Mzm. 94:11)
yiluk kolal mbalogo ʼbisukama weregat. 21-22Eti paga, an Paulus nebe inom, at Apolos ebe inom, Kepas ebe inom, o agat oba yoma taʼbokogonat inom, iniluk dogoligogi eti inom, watlarigogi eti inom, o yogondak ya dogoligogi mende inom, yabunggane kagat lasigin mende inom, etoma taʼbokogonat, kit indewerek eti paga, kit nen,
“An newe eti o,” yiluk akoni mende pasik pogorakagup o. 23Kit kinebe eti, indewerek, Kristus at o. Nen, Kristus ebe indewerek, Allah at o.
Currently Selected:
1Korintus 3: DNA
Highlight
Share
Compare
Copy
Want to have your highlights saved across all your devices? Sign up or sign in
