Ribilisan 6
6
Tamp balna tiaskaubu kidika
1Usnit kat Sīp kidika yaklau tamp tiaskaubu kidika kaupak as biswakat talnayang dai, dawak di sangninaka duduwa balna kidika kaupak as yaklau yulni parasni sarahwi yulwakat dakanayang dai sihm alwana kapat: “¡Aiwah!” 2Talik aras pihni as#Zac 1:8; 6:3,6. talnayang dai, dawak kilna sakkidika laih tingni yakat las as duwasakdai. Kraun as kalana dai, dawak kalahwi minit bayakna dai dawak minit bayakna atnin yulni.
3Sīp kidika yaklau tamp bu kidika bisna mani kat, di sangninaka duduwa balna kidika kaupak bu kidika aput yulwakat dakanayang dai: “¡Aiwah!” 4Dawak aras ūk kalahna dai. Butuni kidika laih pauni dai,#Zac 1:8; 6:2. dawak kilna sakkidika muihni laih sau akat kulnin aslah lani kidika yakpamna atnin dawak witing yaklau yamwakat muih balna kidika biri biri kalina atnin parasni duna dai; dawak isparah nuhni as kalana dai.
5Sīp kidika yaklau tamp bās kidika bisna mani kat, di sangninaka duduwa balna kaupak bās kidika aput yulwakat dakanayang dai: “¡Aiwah!” Talik aras sani as#Zac 6:2,6. talnayang dai, dawak kilna sakkidika muihni laih tingni yakat paun as duwasakdai. 6Dawak di sangninaka duduwa balna arungka kidika walsah yakat yulni as aput yulwakat dakanayang dai: “Plawar minik paun bu manah ma as warkni minit kidika, dawak cebada laih paun tiaskauas ma as warkni minit kidika; kaunah disala dawak wain kidika laih datang disnin awaski.”
7Sīp kidika yaklau tamp arungka kidika bisna mani kat, di sangninaka duduwa balna kidika kaupak arungka kidika aput yulwakat dakanayang dai: “¡Aiwah!” 8Talik, aras lalahni as talnayang dai, dawak kilna sakkidika ayangni laih Daunin kaltadai. Kidika dangnit yakat daunin kingni lani tanituna kidika kaiwadai, dawak sau sahyakna arungka kidika minityakat parasni kalana dai, war, yuh, siknis balna dawak sau dini anyang balna munah muih īna atnin yulni.#Ez 14:21.
9Sīp kidika yaklau tamp singka kidika bisna mani kat, sakripais busnin pāni kidika dinityakat talnayang dai Papang yulni yuyulwakat dawak witninis bik barangni yuyulwa yulni dininamak dadakna muihni balna dai kidika. 10Aput parasni yuyulwa dai: “King holi dawak barangni, ¿mampat mani sau muihni balna kidika lanina yammayah dawak yangna yakat yanaihina kidika biri yammayah?” 11Bahang asna pipihni diana dai, dawak baisa ma buas urupdanama diatna dai, angkat mani witingna wanaihnina balna kidika Papang warkni yakat witingna ampus dadauna kat kaput dadauwarang kat.
12Sīp kidika yaklau tamp tiaskauas kidika bisna mani kat, talingkat sau isihna nuhni as sakdai.#Rib 11:13; 16:18. Ma kidika laih sani kalna dai,#Is 13:10; Jl 2:10,31; 3:15; Mt 24:29; Mk 13:24-25; Lc 21:25. sihm kulnin bukna asnina kapat; waiku kidika bitik laih pauni kalna dai, sihm ā kapat,#Jl 2:31. 13dawak yala balna kidika laih kisang kaupak sau yakat bubukna dai, sihm ani damni panani yakat wing parasni laihwakat minik batatani bubukwa kapat. 14Kisang kidika laih disna dai sihm wauhtaya as tuyulna kapat,#Is 34:4. dawak asang balna dawak ki wirni balna bitik laih panina kaupak naikau yaklalana dai.#Rib 16:20. 15Dawak sau kingni balna kidika laih pa sulihni yakat dawak asang kinipala balna walsah yakat yakmamaldana dai,#Is 2:19,21. muih nunuhni balna, kalbauyang balna taninatuna balna, di duyang balna, parasnina duduwa balna, warau balna bitik dawak pri muihni balna kidika karak aslah; 16dawak asang balna yakat dawak kipala balna yakat bik aput diyuyulwa dai: “¡Yangna mikitna yakat buktanauh dawak trun kau yalahna sakkidika muhni kaupak yanamaltanauh,#Os 10:8; Lc 23:30. dawak Sīp annin kidika kaupak bik! 17Kat wah nuhni mani kidika laih uman kaiwi kana, ¿dawak wais sipkarangyah witing niningkauh yaklauna atnin?”#Is 13:6; Ez 30:2-3; Jl 1:15; 2:11; Am 5:18-20; 8:9-14; Sof 1:14-18; Mal 3:2.
Currently Selected:
Ribilisan 6: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
