Ribilisan 5
5
Wauhtaya ulwi tulna dawakSīp kidika karak
1Trun kau yalahna sakdai kidika tingni tingpal niningyakat wauhtaya tulna as paskau dawak ahni niningkauh kidika bik#Is 29:11; Ez 2:9-10; Zac 5:1. ulna kat talnayang dai, dawak tamp tiaskaubu karak taihna dai. 2Dawak insal parasni nuhni duyang as yaklau parasni aput yulwi dakana dai: “¿Angdika muihni kidika barangniyah adika wauhnitaya tulna adika uluhna atnin dawak tamni taihna kidika bik bisna atnin?” 3Kaunah kisang yakat, sau yakat dawak sau dinityakat bik muih as bik disdai wauhtaya tulna kidika uluhwi talna atnin. 4Dawak yang laih uba aidayang dai, kat barangni muihni as bik disdai kidika yulni wauhtaya tulna kidika uluhwi talna atnin. 5Kaunah muihbararak balna kidika kaupak as yaklau yayulna: “Baisa kaidinih, bahang Judá sulani Layanni kidika laih,#Gn 49:9. king Devid sulani kidika,#Is 11:1,10. minitbayakna#Jn 16:33; Rib 3:21. dawak witing laih sipki wauhtaya tulna kidika uluhna atnin dawak tampni balna tiaskaubu taihna kidika bik bisna atnin.”
6Bahang, trun dawak di sangninaka duduwa balna arungka kidika walsah yakat, dawak muihbararak balna kidika walsah yakat bik, Sīp as talnayang dai. Kalni kau yaklauna sakdai, sakripais yayamna dai kapat karang bik.#Is 53:7. Tamni tiaskaubu dawak minikpa balna bik tiaskaubu duwadai,#Zac 4:10. kidika balna kuduh Papang spiritni balna tiaskaubu sau bitik yakat sihna kidika. 7Kidika sīpni kiwi trun yakat yalahna sakdai kidika tingnipal kau wauhtaya tulna duwasakdai kidika duna dai; 8wauhtaya tulna kidika duna mani kat, di sangninaka duduwa balna arungka kidika dawak muihbararak balna 24 kidika limbabahna dai Sīp kidika muhnityakat. Witingna bitik laih paswi yakisdinin dini duduwa dai, dawak gol sūnitak kau busnin walapni dini kidika babung duwi uina dai, kidika balna laih Papang tawanni muihni balna minitna yulninna.#Sal 141:2; Rib 8:3. 9Dawak adika unbauna wisam adika unbabauwa dai:#Sal 33:3; 98:1; Is 42:10.
“Man laih barangniman
wauhtaya tulna kidika duta
tampni balna taihna kidika bisna atnam,
kat man laih sakripais kalyamnamankidika yulni;
dawak man āma kidika sau yakatutuhtinah
Papang dini laihta yaknaman
muih satni balna bitik, tuniyuyulwa balna,
tawan dawak nisan balna bitik kau bik.
10Kidika balna kaupak king kaninlani as yamnaman,
sumalyang balna yamnaman mayangMapapangki dini,#Ex 19:6; Rib 1:6; 20:6.
dawak witingna laih sau minityakatking kakana karang.”
11Usnitkat talnayang dai, dawak bik dakanayang dai insal balna mahni trun yaihnit yakat bangdai kidika, di sangninaka duduwa balna dawak muihbararak balna kidika dinitna bik. Witingna laih milian milian bangdai,#Dn 7:10. 12dawak parasni aput yuyulwa dai:
“¡Sīp sakripais yamna dai kidika laih#Jn 1:29; 1 Kor 5:7.
barangni ki parasni kidika dawakrits kidika bik dunin,
sins tuhni dawak parasni kidika bik,
rispik lani, alasnina yaksihni
dawak ayangni nuhni yamnin kidika bikduna atnin!”
13Dawak Papang yaklau kisang, sau, sau dinit yakat dawak kuma yakat bik di balna yamna kidika aput yuyulwakat dakanayang dai:
“¡Trun yakat yalahna sakkidika
dawak Sīp yakat bik,
ayangni nuhni yamnin kidika,rispik lani,
alasna yaksihni dawak parasni kidikabik duduna karang
ban kaput atnin yakat!”
14Di sangninaka duduwa balna kidika laih aput nangnitlalawadai: “¡Kaput karang!” Dawak muihbararak balna 24 kidika laih limbabahwi ayangni tanit nuhni yayamna dai.
Currently Selected:
Ribilisan 5: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
