Masalmo 103
103
Ndando ka wunene wa Txizimu
Disalmo da Dhavhidha
1Ni lava kudhumisa Mkoma ngu wotshe moya wangu;
ngu yotshe mbilu yangu
ni lava kudhumisa Txizimu txo sawuleka.
2Ni lava kudhumisa Mkoma ngu wotshe moya wangu,
ni si divali ni txa tximwetxo ka sihiwa sakwe.
3Ngene a divalelako sotshe sionho sangu
a txi ni hanyisa ka yotshe mipando yangu;
4ngene a ni hulukisako dithowoni,
a txi ni xayisa ngu lirando ni litsako;
5 # Wona ni ka: Jak. 5:11. ngene a ni tatako ngu sihiwa kuhanyani kwangu
e wuseta wuphya wangu,
wu fana ni wa digamba.
6 Mkoma wa vhikela ngu kululama
votshe vale va xaniswako.
7A zivisile tinzila takwe ka Mosi
e zivisa mithumo yakwe ka vanana va ka Israyeli.
8 # Wona ni ka: Jak. 5:11. Mkoma a tate ngu wumbilu ni wunene;
wa timisela na a di tate ngu lirando.
9Kha khali a txi hi kawuka yotshe mbimo,
ni dikhulo dakwe kha di simami kala kupinduka;
10kha hi tshumeteli madingano ni sionho sathu
kambe kha hi tsayisi madingano ni sionho sathu.
11Nguko, nga ti nzuma yi ku kule ngutu ni mafu
ngu toneto ni lona lirando lakwe
ka vale va mthavako.
12A tsulisa kule sihambunyeto sathu,
nga ti Wutxani ku ku kule ni mswa-ditambo.
13 Mkoma mbwa kuthutha ka vale va m'thavako
kufana ni tate wo thutha ka vanana vakwe.
14Ene wa tiziva ti athu hi nga wumbiswa tona;
wa ti alakanya ti to athu hi lithulu dwe.
15Kuhanya ka m'thu kufana ni mwasi;
makhato a kona ma fana ni kumila ka txiluva txa thembweni,
16aniko, mbimo yi diphuho di txi futetako, txa mora,
ku si zivaneki kambe ahawa txi nga ti kona.
17Aniko lirando la Mkoma kha li nga ni magwito
ka vale va m'thavako
kululama kwakwe kha ku na magwito
ka liveleko ni liveleko,
18ka vale va londetako txitumelelano txakwe
va si divaliko kuvekisa sirumo sakwe.
19 Mkoma a vekile txikhalo txakwe txa wukoma tinzumani
ene wa fuma txitimwi ka sotshe si si kuho.
20Dhumisani Mkoma, anu tingelozi takwe,
anu sirumwa sakwe sa mtamo,
anu mi londetako sileleto sakwe ni ku mu engisa.
21Dhumisani Mkoma anu mabutho a nzumani,
anu sithumi sakwe mi mahako kuranda kwakwe!
22Dhumisani Mkoma, anu siwumbwa sakwe sotshe,
ka otshe makhalo a mfumo wakwe!
Ni lava kudhumisa Mkoma ngu wotshe moya wangu!
Currently Selected:
Masalmo 103: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
