Masalmo 102
102
Mkombelo wa m'thu wo xaniseka
Mkombelo wa m'thu wo xaniseka, awule tshakunutako kutitsetsa kwakwe a di kupandisekako, masoni ka Mkoma Txizimu
1 Mkoma, engisa mkombelo wangu,
yi na hoke kwako huwa yangu!
2U nga ni sisele khohe yako,
mbimo yi ni ku kupandisekani;
siza u txi engisa kuvilela kwangu!
Kuluveta u txi ni xamula, ngako ni txi kudhana!
3Nguko masiku a kuhanya kwangu
ma mwalala nga wutshi;
mmidi wangu wa tura nga makala a mndilo.
4Mbilu yangu yi wunile nga mwasi wo gangwa,
ni txi divala ni kudya sakudya!
5Marambu angu ma namarete aha ka didhowo dangu,
ngu mhaka yo zumba ni txi dila ngutu.
6Ni fana ni ditshukulu di ku mu txiwulani;
ni txikhovha txi txi ku marumbini.
7Ni na ni txitshwave, ni tipfa ni di nokha,
ni fana ni txinyana txi txi ku txiroroni ka nyumba.
8Valala vangu va ni poyilela otshe masiku,
va ni ruketela va txi womba kubiha ngu ditina dangu.
9Kha ni nga ni sakudya,
sakudya sangu ngu dikhuma;
sa kusela sangu si patana ni mirongo yangu,
10ngu mhaka ya kuhenya kwako
ni kutsukula kwako;
u ni guletile, ngu msana u txi ni tshotsha.
11Masiku a kuhanya kwangu,
ma fana ni mtsudi wu tutumako,
se ani ni fana ni mwasi wu wunako.
12Aniko awe, Mkoma,
u mfumeli yotshe mbimo;
ditina dako di na alakanywa ka liveleko ni liveleko!
13Wuka, Mkoma, telwa ngu wumbilu ngu Siyoni;
se i mbimo ya ku m'divalela!
Txi hokile txikhati txa kona!
14Sithumi sako sa ma randa marigwi akwe,
si na ni wusiwana ngu marumbi akwe.
15Sekoko yotshe mifumo yi na thava ditina da Mkoma
votshe vafumeli va ha mafuni
va dhumisa wuhombe wakwe,
16ngako Mkoma a txi aketa Siyoni
a txi ti wonekisa ni wudhumo wakwe;
17ene a na engisa mkombelo wa txikulungu
kha na mbi tsukula mikombelo ya txona.
18Atiya ti na bhalelwe liveleko li litako,
kasiku ve dhumisa Mkoma
avale va ku ngadi va txi na velekwa.
19 Mkoma a wona a di txitimwi
ka txiluvelo txakwe txo sawuleka;
a di txitimwi nzumani ene wa wona mafu,
20kasiku engisa kuvilela ka tikhumbi
ni kuhulukisa avale va nga abaniselwa kufa.
21Kona Siyoni di na huwelelwa ditina da Mkoma
ni Jerusalema ku na pfala kudhumiswa kwakwe,
22mbimo yi vathu va yotshe mifumo
va no tshangana, kasiku ve khozela Mkoma.
23Ene a ni hungute mitamo hagari ka nzila,
a komisile masiku a kuhanya kwangu.
24Ani ni kombete ni txi khani: “Txizimu txangu,
u nga ni teke ni di hagari ka masiku a kuhanya!”
Malembe ako, Mkoma, kha ma na magwito!
25 # Wona ni ka: Vaheb. 1:10-12. U mahile mafu kukhukhela makhatoni;
ngawe upune u nga va nga tinzuma.
26Sotshe si na pinda, aniko awe u na simama u tsana.
Sotshe ha mafuni sa sakala kufana ni nguwo;
sotshe u na si txhipisa kufana ni syambalo, se si na mwalala!
27Aniko awe ngawe yotshe mbimo;
malembe ako kha ma na magwito.
28Vanana va vathu vako va na hanya ha mafuni,
ni liveleko lako li na tsaniswa masoni kwako.
Currently Selected:
Masalmo 102: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
