Masalmo 104
104
Ndando ya kudhumisa m'vangi
1Bonga ka Mkoma awe dihika dangu!
Mkoma, Txizimu txangu!
Wa thisa ngutu ngu wuhombe;
u ambate wudhundo ni wulamuli.
2Ene wa ti fenengeta ngu liwoningo nga txyambalo
a nawuluta tinzuma kufana ni m'jiyo.
3U akile nyumba yako matini txitimwi ka tinzuma.
Marefu u ma mahile txikotxikani txako
u tsimbila u di txitimwi ka mabhapi a diphuho!
4 # Wona ni ka: Vaheb. 1:7. Maphuho u ma mahile sirumwa sako
ani tinyangafula ngu tona i ku sirumwa sako.
5U vekile mafu txitimwi ka makhato o tsana,
kasiku me zumba ma di tsani.
6U fenengetile mafu ngu Linene la kueta,
ku txi nga u to ma fenengeta ngu didhamba,
se mati ma fenengetile mimango,
7aniko awe u ma kawukile, se ona me thava,
se ma di engisile kudhinda ka dipswi dako,
ma to kuluveta me phwa.
8Ma kwete mimango, me relela mathekani,
kala ka wukhalo wu u nga ma sikela,
9kala mihinganoni mu u nga ma tsimba kupinda,
kasiku linene li si khubhunyeti kambe mafu.
10Awe wa ruma mati a milonga
ma txi tata minambo, ayi yi khulungako ka mimango.
11Sihari sotshe sa txitinga si sela ona mati awa
ni timhoti ta mimango ti tima ditora ka ona.
12Tikasani ka minambo,
sinyana sa nzuma si aka sisaka sa sona;
si emba si di madhavini ka mindonga!
13U di nyumbani kwako, txitimwi,
wa nakanisa mimango;
wa nonisa mafu ngu kuwa ka mati.
14Wa kulisa lihawu la sihari
ni mindonga yi vathu va phayako,
kasi kumana sakudya ka yona:
15Vhinya yi yi va tsakisako timbilu,
mafura awa ma va tshurisako tikhohe
ni sakudya si si va ningako mtamo.
16Mindonga ya Mkoma yi khuri,
mindonga ya mikedhari ya Libhanoni a nga yi phaya.
17Amuwa sinyana si akako kona sisaka
ni txitimwi ka mikedhari kumaneka sisaka sa mikhoromati.
18Mimango yo lapha mbuthavelo wa vamangulwi
ani sinvunza si thavela tiphakoni ka marigwi.
19U mahile mtxima kasi kupima tinguva
ni ditambo da ziva txikhati txi di faneleko kuswa ngu txona.
20Wa wuyisa txidema, ku txi maha wusiku,
se sihari sa txitinga si huma si tsimbilatsimbila.
21Tingonyamo ta bhonga ti txi xota nyama,
ti kombela ka Txizimu sakudya sa tona.
22Kambe ngako di txi txa, koneko tona ta thava
kasiku ti ya sisala maphalani ka tona.
23Sekoko nguyo mbimo, m'thu a humako eya mthumoni
a txi ya thuma kala di txi swa.
24 Mkoma, awe u mahile simaha sasingi
u mahile sotshe ngu wuzivi wa hombe!
Mafu ma tate ngu sivangwa sako!
25Ku na ni Linene la hombe, la kuanama ngutu,
amu si tsimbilatsimbilako sihari so mbi balwa,
sihari sa hombe ni sa sidotho.
26 # Wona ni ka: Job. 41:1; Mas. 74:14; Isa. 27:1. Konemo kutsimbila sitimela sa mati,
konemo a sakanela kona Levhiyatani,
mnyoka wa hombe wa linene u nga wu maha.
27Sotsheso sivangwa si rinzela awe
kasiku u si ninga sakudya
ngu mbimo yi yi fanelako.
28Ngawe u si ningako sakudya, asi sona si rolelako;
wa nawuluta dianza dako, se sona si khura ngu si i ku sa sinene.
29Ngako u txi si sisela khohe yako, sa rereka,
ngako u txi si thavisa moya, sa fa,
si txi tshumela si maha luthule.
30Ngako u txi si rumela moya wako,
sa tshumela si hanya.
Ngu toneto, wa wuseta mafu me maha a maphya.
31Wudhumo wa Mkoma kha wu nga ni magwito!
Mkoma a na tsake ngu sile a nga si va nga!
32Mafu ma dhudhumela, ngako Mkoma a txi ma wonetela;
mimango ya tuvika wutshi, ngako ene a txi yi gwesa.
33Ni na embelela Mkoma, otshe masiku a kuhanya kwangu;
ni na dhumisa Txizimu txangu,
ni di ngadi ni txi hanya.
34Ndando yangu yi na tsakise Mkoma,
nguko ani ni tsakela ene.
35Sigohi si na loviswe ha mafuni!
Vabihi va na mwalale.
Ni lava kudhumisa Mkoma
ngu wotshe moya wangu!
Dhumisani Mkoma.
Currently Selected:
Masalmo 104: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
