Isaya 25
25
Ndando ya kudhumisa Txizimu
1Awe Mkoma, ngawe Txizimu txangu;
ni na kuguleta, ni dhumisa ditina dako,
nguko u mahile sixamaliso,
makungo ako a kale nga ditshuri, ni kutsana.
2Nguko didhoropa u di mahile mmumbu wa marigwi,
didhoropa do tsana u di mahile dirumbi,
se dizumbo da vamatiko, di nga mahe kambe didhoropa,
di nge ngadi di aketwa kambe.
3Ngu mhaka yeto, vathu va mtamo va na kudhumisa,
se didhoropa da matiko o thisa di na ku thava.
4Nguko uve mkhokhola wa txisiwana,
kambe uve mkhokhola wa wule wo pwata, kuxanisekani kwawe;
wuthavelo masoni ka txihuhuri, ni mtsudi ha lisanini;
nguko kufuteta ka vaxanisi, kufana ni txihuhuri txo peka diguma.
5Nga lisani ka wukhalo wa kuoma,
awe u malatile diguwa da vamatiko,
kufana ni lisani li kapeliswako ngu mtsudi wa direfu do hehuka;
ngu toneto, ndando ya vaxanisi, yi na xowokiswa.
M'buso wo lumba votshe vathu
6Se Mkoma wa Mabutho a Tiyimbi a na ninga ka mmango wuwa ka votshe vathu, m'buso ngu sihari so nona, m'buso wa vhinya ya yinene, kudya sakudya sa mafura, kuselwa ni vhinya ya yinene, yo surutetwa kha kwati. 7Se mmangoni hawa a na vharula nguwo yi matiko otshe ma tsivako ngu yona tikhohe, ni m'jiyo wu matiko otshe ma sisalako ka wona. 8#Wona ni ka: 1 Vak. 15:54; Mtu. 7:17; 21:4. A na fuvisa lifo ngu ha ku si gwitiko, ngu kumaha keto, Mkoma Txizimu, a na bahula mirongo ka totshe tikhohe, kambe a na thavisa tingana ta vathu vakwe kotshe ha mafuni, nguko Mkoma a wombile.
9Se ka ditshiku donedo, va na kha vona:
Wonani Txizimu txathu, hi nga ti txi verela, txi na hi hulukisa; awuwa ngene Mkoma, wule hi nga txi m'verela; hi na m'guleta ni kutsaka, kuhanyisani kwakwe.
Txizimu txi na tsayisa Mowabhi
10Nguko dianza da Mkoma, di na humula ka mmango wuwa;
aniko Mowabhi a na ganyatelwa hahatshi ka wona, kufana ni kuganyatelwa ka mwasi ditalani.
11Se Mowabhi a na nawuluta manza hagari kwawe,
kufana ni msambeli a txi lava kusambela;
kambe Mkoma a na veka hahatshi kutikulisa ka Mowabhi,
hambiko manza akwe i ku a wutxhari.
12Se a na wisa mikhokhola yo guleka ya maguma ako,
kambe a na ma wisa, a txi ma khundumusela hahatshi, kala me maha lithulu.
Currently Selected:
Isaya 25: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
