Isaya 26
26
Ndando ya kuxula
1Ka ditshiku dile, ku na embelelwa ndando ditikoni ka Judha:
Hi ni didhoropa do tsana, adi Txizimu txi nga veka ka dona kuhuluka ngu maguma ni tibhingo.
2Tulani matimba, kasi ku di na wulela ditiko do lulama,
dile di xayisako ditshuri.
3Awe u na xayisa ngu kudikha
awule mapimo akwe ma nga tsana kwako;
nguko ene wa kuthemba.
4Thembani Mkoma ngu ha ku si gwitiko,
nguko Mkoma Txizimu, dirigwi da yotshe mbimo.
5Nguko ene wa wisa vale va zumbako ka makhalo o guleka,
kambe didhoropa di di guletwako a na di veka hahatshi,
a txi di khundumusela, kala di maha lithulu.
6Mkondo wu na di ganyatela:
Mikondo ya vaxaniseki mazambo a sisiwana.
7Nzila ya wo lulama, yi lulamile yotshe, awe ngu kululama, u pima matsimbilelo a mlulami.
8Nzilani ka wulamuli wako Mkoma, ha kuverela;
ditinani kwako ni mapimoni kwako, kuho kualakanya ka mihefemulo yathu.
9Ngu muhefemulo wangu ni ku lavile ni wusiku,
se ngu moya wangu wu ku mndani kwangu,
ni na phindula ni kulava,
nguko, ku di ni wululami wako ha mafuni,
vaaki va ha mafuni va gonda wululamo.
10Hambi ku txi divalelwa m'bihi,
kha ti mmahi e gonda wululamo,
hambi ditikoni ka wululamo, ene a maha kubiha,
kambe kha nga ni mhaka ni wuhombe wa Mkoma.
11 Mkoma, dianza dako di guletilwe,
hambi keto, kha va di woni;
va na di wona, hambiko va no kanganyiseka, ngu mhaka ya ku u pfelako vathu vako;
kambe mndilo wu na tshokomisa valala vako.
12 Mkoma, awe u na hi ninga kudikha,
nguko awe ngawe, u nga maha kwathu yotshe mithumo yathu.
13Awe Mkoma, Txizimu txathu,
vamwani vanyamne va tolovela ku hi fumela,
aniko athu hi alakanya ditina dako dwe.
14Va txi fa vona, kha va na mbi tshumela ve hanya;
va txifa, kha va na mbi wuka;
ngu toneto, u va endete, u va lovisile,
u fuvisa ni ku va alakanya ka kona.
15Awe Mkoma, u engetete vathu vava,
awe u engetete vathu vava,
u ti mahile wa wudhumo;
kambe u va tshotshile kule,
ka yotshe mihingano ya mafu.
16 Mkoma va ku endete kuxanisekani kwawe;
mbimo yile txitsayiso txako txi ngata txitimwi kwawe,
va to tshakunuta mkombelo wawe wa txihunja.
17Nga wamsikati wa txirumbu,
ngako yi di hokile mbimo yakwe,
a ni kupanda ko lava kuveleka, kambe wa peka huwa kupandisekani kwakwe,
hi mahile toneto nathu, ngu kulava khohe yako, awe Mkoma!
18Hi ti ti ni sirumbu athu, hive ni kupanda ko lava kuveleka,
aniko eto kha ta hambana ni kuve moya;
kha ha tisa kutxhatxhisa ha mafuni,
kambe kha vawa vahanyi va ha mafuni.
19 # Wona ni ka: Dhan. 12:2. Vafi vako va na hanya,
vafi vako va na wuka;
vhumukani, kambe giyani,
anu mi zumbako lithuluni,
nguko mwando wako, awe Txizimu,
wu na fana ni mwando wa mwasi,
se mafu ma na tshotsha mapune vafi.
20Tsulani, koko, anu vathu vangu,
wulelani tinyumbani kwanu mi ti sekela matimba,
baramani ngu mbimoanyana,
kala kuza kuboxa kuhenya.
21Nguko wona taku Mkoma a na khukha ka wukhalo wakwe,
kuya tsayisa vahanyi va ha mafuni,
ngu mhaka ya wubihi wawe;
se mafu ma na vhunungula mnoha wawe,
aniko kha ma na mbi fenengeta kambe vale va nga dawa.
Currently Selected:
Isaya 26: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
