Isaya 24
24
Mkoma a na tsayisa mafu
1Wonani taku Mkoma wa maha ti to mafu meva txiwula,
kambe wa ma kona,
wa hindula zumbelo ya ona,
e hangalasa vaaki va ona.
2Se ati ti no maheka ka vathu, ti na maheka ni ka vaphaxeli;
ka txithumi txa wamwamna ni ka nyamne wa txona wa wamwamna;
ni txithumi txa txisikati ni ka nyamne wa txona wa wamsikati;
ka mxavi, ni ka msavisi,
ka wule a lombako, ni ka wule a lombisako;
ka m'vili, ni ka wule a vilwako.
3Otshe mafu ma na sala i di txiwula, otshe ma na handwa,
nguko Mkoma a wombile dipswi diya.
4Mafu ma dila, kambe ma wuna;
ditiko da guma mtamo, kambe da wuna;
vahombe va vathu va ha mafuni va guma mtamo.
5Kha ditshuri, mafu ma nyetilwe ngu vaaki va ona,
nguko va ndaka milayo, ve txitxelela sileleto,
kambe va funya txitumelelano txa kala kupinduka.
6Ngu mhaka yeto, txiruko txa heta mafu,
se avale va hanyako ka ona, va na koneka;
ngu mhaka yeto, vaaki va ha mafuni, va na hiswa,
mbadotho ava va no sala.
7Dosi ya dila,
ni m'vhinya wa guma mtamo,
se votshe vale va tsakako timbiluni kwawe, va na keta.
8Diguwa da misakano ya singomana di gumile,
di gumile diguwa da vale va ndakandakako ngu kutsaka,
kambe li gumile litsako la haripa.
9Kha va na mbi sela vhinya, va txi embelela,
wusuke wo vila wu na bava, ka vale va no sela.
10Didhoropa da txiwula di khundumusilwe,
totshe tinyumba ti vhatwe,
kha ku na mbi wulela m'thu ni wammweyo.
11Ku ni tihuwa amu ka tinzila ta hombe,
ngu mhaka yo lava vhinya;
kotshe kutsaka ku phumile,
ni misakano ya mafu yi gumile.
12Didhoropani ku to sala kukoneka dwe,
ni matimba a dona ma fayetetwe.
13Nguko ku nava ngu mndani ka mafu,
hagari ka vathu vava,
kufana ni kuzuzwa ka muolivha,
ni sizangwa sa sidotho,
na ku di gumile kuhaphelwa ka mauvha.
14Avava va na guleta mapswi awe, ve embelela ngu kutsaka;
ngu mhaka ya wudhumo wa Mkoma, va na huwelela kukhukhela lineneni.
15Ngu mhaka yeto, dhumisani Mkoma,
amu mikovani, ni sitondoloni ka linene,
ka ditina da Mkoma, Txizimu txa ka Israyeli.
16Kukhukhela magwito ka mafu,
hi pfite kuembelala, kaku:
Wudhumo ka wule wo lulama;
aniko ani ni khani: Na goma, na goma, dikhombo kwangu!
Vakanganyisi va kanganyisa,
ina, vakanganyisi va kanganyisa.
17Kuthava, ni diphala, ni mlawu, si ku emete,
awe muaki wa ha mafuni.
18Se ku na maheka taku,
wule a no tutuma ngu mhaka ya dipswi do dhukisa, a na wela diphalani;
ni wule a no huma ngu diphalani, mlawu, wu na m'bzweta;
nguko mafasitela a txitimwi ma tulekile,
ni makhato a mafu ma zinginika.
19Mafu otshe ma na bhandelelwa,
otshe ma na abaneka ngu hagari,
se otshe mafu ma na zinginika.
20Mafu otshe ma na dhedhereka kufana ni didevi,
kambe ma na zinginiswa, me thaviswa
ni wusiku, nga mtxhatxha;
se wuhambunyeti wa ona wu na ma nemelela,
ma nawa, ma si wuki kambe.
21Se ku na maheka taku, ka ditshiku dileya,
Mkoma a na endela mabutho a txitimwi nzumani, ni vafumeli va mafu, txitimwi ka mafuni.
22Se ma na tshanzuketelwa kufana ni vo ñolwa, amu diphalani,
kambe ma na khotelwa mkorani,
ma na tsayiswa msana ka masiku amangi.
23Se mtxima wu na va ni tingana,
ni ditambo di na kanganyiseka,
mbimo yi Mkoma wa Mabutho a Tiyimbi,
a no fuma mmangoni ka Siyoni ni Jerusalema; sekoko,
masoni ka vathangeli vakwe, ku nava ni wudhumo.
Currently Selected:
Isaya 24: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
