1 Musa 49
49
Rana si Jakob perpodi
1Enggo kessa i idiloi si Jakob mo dukak-dukakna, idokken mo taba kalak i, “Pulung mo kènè mi gembarku èn. Naing kubagahken ngo taba kènè kadè sinaing akapen ndènè i podi ari,
2Pulung mo kènè alè dukak-dukak si Jakob,
dengkohken mo si Israel bapamu.
3Alè Ruben anakku situaen,
kono ngo gegohku,
buah perlebbè kegegohenku.
Kono ngo simaholi janah simergegohna
i karina dukak-dukakku.
4Kono murah goncang bagè laè,
gabè oda nèngè merkesurungen,
kumarna ipedemmi ko ngo denganku meddem
ilamuni ko ngo pedemmen bapamu.
5Si Simeon bak si Lewi sibeltek;
senjata kalak i gabè kejukkaten.
6Oda ngo dekket aku ipas perarihen kalak i,
bagi ma oda dekket ibas runggu kalak i.
Kumarna memunuh ngo kalak i ibagasen pungur
mengeraon-raon lembu pepuasken ukur.
7Merjaya mo laga kalak i
kumarna ntengamna.
Merjaya mo pungur kalak i
kumarna jahatna.
Kusompar-baèrken mo kalak i
mi suberri Israel.
Kusara-saraken mo kalak i
mi tengah-tengah karina bangsa.
8Alè Juda, ijerngem kono mo tengkukuk musuhmu
ipoji kaka-anggimu mo kono,
janah mersembah i hadeppenmu.
9 #
4 Ms. 24:9; Alm. 5:5 Bagè singa anè-anè ngo si Juda
ijerngem ngo pangaenna, nai balik mi liangna;
mengennat mo ia nai gempang
isè poda pang pegerit-geritkensa.
10Si Juda ngo menjèmak tongket kerajaen
pinemparna ngo memerèntah soh mi amman sumendah.
Merrohen mo bangsa-bangsa merembah luah,
janah mersembah merkuraja i hadeppenna.
11Itambat ngo anak kalodèna ibas kayu,
ibas kayu anggur simendèna kalohon.
Itaptapi ngo geddana dekket anggur,
anggur bagè mbara daroh.
12Mbara ngo matana kumara mènum anggur,
mbulan èpenna kumarna mènum susu.
13Si Zebulon merian mo i biding laut;
merlabuh mo keppel-keppel i bidingna;
soh mi Sidon mo baleng ladangna.
14Si Isasar tosè bagè kuda mergegoh
gempang i perkelangen kirang bobanna.
15Soh mo mendèna idah bekkas i
janah bagi mo mendèna nagerri i,
nai tungkuk mo ia uè ibobani,
janah ipaksa mahan bahaen bagè hamba.
16Kono alè Dan, perhukum i bangsamu
gabè marga tosè mi marga sidèban i Israel.
17Tosè bagè nipè i biding dalan mbellen
nipè darih i biding dalan
simenebbi nèhè kuda
sanga mastak simemasangsa.
18Ialè Jahowa, keluahen niberèkenMu
ingo dak kupèma-pèma.
19Alè Gad, ikubu pemangus mo ko
tapi gabè kono nola mo mengkubu kalak i.
20Kono alè Asyer, merlebbih-lebbih ngo pangaenmu,
kono ngo mèmaken pangaen bai raja-raja.
21Ukum si Naptali, tosè bagè balkih meriar ngo
merandal kalohon dukak-dukakna.
22Si Josep tosè bagè kalodè bajar
bagè kalodè meriar i gembar takal laè,
lojang-lojang i pispis delleng.
23Iletlet musuh ngo ia
iletlet merkitè panah.
24Tapi tong ntegguh betekken si Josep
sèurna tettap ntegguh
kumarna kuasa Permakan Sintèmbul i,
Dèbata si Jakob, perculenggemmen Israel.
25Dèbata bapamu ngo mengurupi ko;
Perkuasa Sintèmbul i ngo memasu-masu ko
merkitè udan i langit nai
dekket laè i terruh tanoh nai.
Merkitè dukak dekket lembu
merkitè pagè dekket bunga.
26Pasu-pasu Dèbata bapamu mengelampoi
kinibèak delleng-delleng sienggo rokih-rokihen.
Katerra pè susur mo karina pasu-pasu i
mi babo takal si Josep
mi perdempakenna.
Ia ngo sitermurmurna
ipas kaka-anggina.
27Si Benjamin codi bagè sorigala melaga ngo
Siceggen ngo ia menjerngem panganna.
Berngin ngo i ibagi-bagiken.”
28Idi mo Israel sisipuluh dua marga, dekket rana siniruapken bapa kalak i, sinderrang maing kata persirangen taba kalak i gennep.
Matè si Jakob janah ikuburken
29-30 #
1 Ms. 23:3-20
Enggo kessa i mertennah mo si Jakob taba dukak-dukakna, “Sigejap nai kumellip mo aku bagè empungku. Kubur kènè mo aku sikali èn i gembar kalak i i liang Makhpela kan kebincaren Mamre i tanoh Kanaan. Enggo kin ngo itokor si Abraham liang bak juma sikulilingna i bai si Efron kalak Het i nai mahan perkuburen. 31#1 Ms. 25:9-10, 35:29 I sidi ngo ikubur si Abraham dekket si Sara, si Isak bak si Rebekka, janah i sidi ma ngo ikubur si Lea. 32Juma dekket liang ni sidi ngo itokor bai kalak Het nai. I sidi mo aku kuburken kènè.” 33#Ul. 7:15 Enggo kessa pul iruapken si Jakob tennahna i taba dukak-dukakna, galè mo ia nai mèter matè mo.
Currently Selected:
1 Musa 49: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
