1 Musa 48
48
Ipasu-pasu si Jakob si Efraim dekket si Manasye
1Daoh-daoh ariin ibagahken mo taba si Josep sakiten bapana. Nai laus mo ia dekket anakna sidua i, imo si Manasye dekket si Efraim mendahi si Jakob. 2Idengkoh si Jakob kessa mo enggo roh si Josep, ipepulung mo karina gegohna, kundul mo ia i babo peddemenna. 3#1 Ms. 28:13-14 Idokken si Jakob mo taba si Josep, “Enggo ipacidah Dèbata Sintèmbul i dirina taba aku i Lus i tanoh Kanaan, janah memasu-masu aku.” 4Idokken taba aku, “Kubaing pè ko morrak-merrik, asa gabè mèduk bangsa i pemparenmu nai, Kuberèken ngo nagerri èn taba pinemparmu, gabè tanohna soh mi amman sumendah.”
5Iterrusken si Jakob mo ranana, “Alè Josep, ukum anakmu sidua kalak situbuh i Mesir èn imo si Manasye dekket si Efraim, kubaing mo i gabè anakku, tosè bagè si Ruben dekket si Simeon. 6Mula i podi ari lot dèng tubuh anakmu, ukum kalak i oda kuabin gabè anakku, tapi idi mo anakmu; perbagian kalak i pè bai si Efraim bak si Manasye nai mo jalo. 7#1 Ms. 35:16-19 Kubaing pè bagi mernèngèt janah lako bai si Rahel ngo. Tikan i perdalanen lako balik i Mesopotamia nai matè ngo inangmu i tanoh Kanaan, oda ndaoh nè i Efrata nai, merhendem ngo aku tikala i. Kukubur mo ia i sidi, i biding dalan lako mi Efrata.” (Bagèndari Efrata mergerar Betlehem.)
8Idah si Jakob kessa mo dukak si Josep i, mengkuso mo ia, “Isè ngo anak-anak èn?”
9Ialoi si Josep mo, “En mo dukakku siniberèken Dèbata bangku i Mesir èn.” Nai idokken si Jakob mo, “Pejolmit mo kalak i mendahi aku asa kupasu-pasu.” 10Oda nè ngo ntangkas pendidah si Jakob kumarna tua-tuana, si enggo ramben penengenna. Nai ipedessing si Josep mo dukakna i taba si Jakob ikaol janah isanggoh mo kalak i. 11Nai idokken si Jakob mo taba si Josep, “Situhuna oda lot harapenku nè peridah dekket kono, keppè iijinken Dèbata ngo bagèndari oda pellin ko kuidah tapi kuidah dèng ngo dekket dukak-dukakmu.” 12Nai idokong si Josep mo dukakna i i abing-abingen si Jakob nai, nai sujud mo si Josep i hadeppen bapana i.
13-14Enggo kessa i ibaing si Josep mo anakna sidua i mi gembar si Jakob, si Efraim si ampun-ampun i kan kambirang janah si Manasye situaen i kan kamuhun. Tapi isilangken si Jakob mo tanganna, gabè tangan kamuhunna mo mi babontakal si Efraim, janah tangan kambirangna mi babontakal si Manasye. 15Kessa i ipasu-pasu mo si Josep nina mo,
“Dèbata ngo Jahowa, isembah si Abraham dekket si Isak,
Ia ngo meneggu-neggu aku soh bagèndari;
16Ia ngo malaèkat sienggo paluahken aku ibas karina mara nai.
Katerra pè nggelluh mo gerarku dekket gerar si Abraham bak si Isak kumernaken anak-anak èn.
Katerra pè meranak merberru mo kalak i,
janah lahlah mo pinemparna i tano èn.”
17Kurang sennang ngo atè si Josep mengidah bapana maing tangan kamuhunna mi babontakal si Efraim; nai ijèmak mo tangan kamuhun bapana i lako mangompat mi babontakal si Efraim nai mi babontakal si Manasye. 18Ninganna idokken taba Bapana, “Ulang mo nemmu bagi O Pa. En ngo anak situaen; ampèken mo tanganmu kamuhun mi babontakalna.”
19Tapi itulak bapana ngo, nina, “Kubettoh ngo alè pa, kubettoh ngo. Mbelgah ngo kuasa si Manasye, janah pemparenna pè gabè bangsa mbelgah ngo. Tapi belgahen dèng ngo kuasa anggina daripada kuasana, janah pinempar anggina i ngo gabè bangsa-bangsa mbellen.”
20 #
Heb. 11:21
Nai ipasu-pasu nola mo anak-anak i arinkenna i, ninna mo, “Dak igerari kalak Israel mo gerarmu, mula memasu-masu kalak i. Dokenken kalak i mo, ‘Katerra pè ibaing Dèbata mo bamu bagè taba si Efraim bak si Manasye.’ ” Merkitè bagidi dak ipelebbè si Jakob ngo si Efraim daripada si Manasye.
21Nai idokken si Jakob mo taba si Josep, “Bagè siniidahmu, enggo ndessing ajalku tapi iurupi Dèbata ngo kènè janah merembah kènè balik mi nagerri empungmu. 22Jadi bamu ngo kuberrèken kuta Sikhem, oda taba kaka anggimu, imo tanoh nggabur sienggo kurampasi bai kalak Amori nai merkitè peddang bak panahku.”
Currently Selected:
1 Musa 48: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
