1 Musa 50
50
1Ipegalè si Josep mo dirina mi daging bapana i ninganna tangis janah menanggohi abèna. 2Nai iperèntahken si Josep mo taba sibaso asa i sirai bangkè si Jakob i, 3Empatpuluh ari ngo dekkahna mengulaken i, imo biasana tikki lako menirai bangkè. Nai merhendem mo kalak Mesir pitupuluh ari kira pesangapken si Jakob.
4Enggo kessa pul tikki merhendem idokken si Josep mo taba naposo raja, “Pesoh mo tennahku èn taba raja i, 5#1 Ms. 47:29-31 ‘Tikan naing roh ajal bapangku, idokken ngo asa kujandiken bana, asa kukuburken ia i kuburen sienggo ipèmaken kin i tanoh Kanaan. Kerna i, paduè mo aku laus mengkubur bapangku. Kessa pul i, balik ngo aku mi sèn.’ ”
6Nai idokken raja i mo, “Berkat mo ko lako mengkubur partuamu bagè sienggo ijandiken kono i tabasa.”
7Nai berkat mo si Josep menaruhken bapana i mi kuburen. Karina pugabè raja, pengetua-pengetuai istana dekket karina simersangap Mesir rabakken berkat ngo dekket si Josep. 8Simpangansa kaka-anggina dekket kadè-kadèna sidèban i pè dekket ma ngo. Pellin anak-anak bak pinakan kalak i mo kessa tading i ladang Gosyen. 9Soridadu merkurèta bak merkuda pè dekket ngo, asa nggeddang kalohon ngo nuhnuhen i.
10Soh kessa mo kalak i mi bekkas kalak mengerrik pagè i Goren-Haatad kan kebincaren laè Jordan, derru-derru mo kalak i nggang kalohon kumarna bonekna. Nai ibaing si Josep mo acarana mengendasi pitu ari dekkahna. 11Idah pengisi Kanaan i kessa mo acara mengendasi i, nina kalak i mo. “Sondel ngo bonekna acara mengendasi kalak Mesir i.” Kumernaken i ngo asa igerari kalak i bekkas i Abel-Mizraim.
12Bagi mo ipesaut dukak-dukak si Jakob bagè nitennahken si Jakob i taba kalak i. 13#Ul. 7:16 Iembah kalak i ngo bangkèna mi tanoh Kanaan janah ikubur mi bagasen liang Makhpela kan kebincaren Mamre, i bekkas juma sienggo itokor si Abraham kin bai si Efron kalak Het i nai, ibaing gabè pekuburen. 14Enggo kessa ikubur si Josep bapana i, mulak mo ia mi Mesir rebbakken dekket kaka-anggina bak karina kalak simengèkutkensa lako mengkubur bapana i.
Ipemènak si Josep ukur kakana
15Enggo kessa matè bapa ni kalak i, idokken kaka si Josep i mo, “Bakunè ngo sibaing mula nggettem atè si Josep, janah mula ibales kejahatenta arnia?” 16Kumarna i itennahken kalak i mo bai si Josep, “Sinderrang madèng matè bapanta arnia, 17isuruh ngo kami mendokken mendahi kono bagèen, ‘Ampuni mo sinibaing kaka-kakamu i arnia taba ko.’ Jadi, bagè naposo Dèbata nisembah bapanta i, kupido kami bamu, Ampuni mo kesalahen nami sienggo kubaing kami bamu.” Tangis mo si Josep tikan soh kessa bana tennah i.
18Nai roh mo dengan sibeltekna i mersembah i hadeppenna, ninganna mendokken, “Naposomu ngo kami.”
19Tapi nina si Josep mo taba kalak i, “Ulang kènè mbiar; ai oda ndorok aku maing bagè Dèbata. 20Tuhu enggo merarih kènè maing jahat taba aku, tapi iobah Dèbata ngo kejahaten i gabè mendè, asa merkitè simasa arnia i mèduk jelma singgelluh bagèndari gabè terpaluah. 21Ulang kènè rembekbekken, kupehèdu-hèdu pè kènè dekket dukak-dukak ndènè.” Bagi mo ibaing peposken ukur kalak i merkitè kata melamlam, nai gabè melui mo ukur kalak i.
Matè si Josep
22Tong ngo merian i Mesir si Josep dekket kadè-kadèna i; nggelluh ngo ia soh merumur seratus sipuluh tahun. 23Sanga ngo idah dèng anak bak kempu si Efraim. Sanga ma ngo idèdah dukak-dukak si Makhir, imo kempu si Manasye, bagè dukakna sendiri. 24Nina ngo taba kaka-anggina, “Ukum ajalku enggo ndessing, tapi ipehèdu-hèdu Dèbata ngo kènè janah mengarak kènè karuar i nagerri èn nai, mi nagerri sienggo iperbagah kin merdengan bulaban taba si Abraham, si Isak dekket si Jakob.” 25#2 Ms. 13:19; Jos. 24:32; Heb. 11:22 Nai idokken si Josep mo taba karina kadè-kadèna i asa isumpahken, nina mo, “Jandiken kènè mo taba aku, mula iarak Dèbata kènè mi nagerri i, kennah embahen ndènè ma ngo tulan-tulanku.” 26Nai matè mo si Josep i Mesir tikan merumur seratus sipuluh tahun. Nai irempah-rempahi kalak i mo bangkèna janah ipemasuk mi palongen.
Currently Selected:
1 Musa 50: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
