2 Musa 10
10
Balang Gaya-guyu
1Nai idokken Jahowa nola mo taba si Musa, “Laus mo ko mengadep raja i. Enggo Kubakin mpihir perukurenna bagi dekket perukuren karina pugabèna, asa ndorok Kuhanaken kelengangen i tengah-tengah kalak i, 2janah asa ndorok isukutken kono taba pemparenmu bakunè carana Aku menusahi bangsa Mesir merkitè kelengangen-kelengangen i. Nai karina mo kènè memettoh Aku ngo Jahowa.”
3Nai laus mo si Musa dekket si Aron menghadep raja i janah idokken mo tabasa, “Bagèen ngo pendokken Jahowa, Dèbata bangsa Heber, ‘Soh ndigan kono oda nggèut tunduk taba Aku? Paduè mo laus bangsangKu idi, asa ndorok kalak i mersembah taba Aku. 4Mula dak itulak kono deng ngo, baremben roh mo Kubaing balang mi nagerrimen. 5Isangkemmi mo karina tanoh èn kerna buè balang si roh i. Karina suan-suanen soh mi kayu-kayu siso icèdaken udan baho ikerriken balang idi ngo. 6Dom balang mo bagesmu, bages pugabèmu dekket bages ginemgemmu. Mahantuen dèng ngo olpek sinaing masa èn daripada kadè sienggo nung iakapi empung ndènè.’ ” Nai kumessing mo si Musa janah laus.
7Nai idokken pugabè-pugabè raja i mo taba raja i, “Soh ndigan kalak i dak menusahi kita? Belli mo laus kalak Israel idi karina lako mersembah taba Jahowa, Dèbata kalak i. Tengngen mo karina nagerrinta ènda enggo ncèda.” 8Nai idilo nola mo si Musa dekket si Aron menghadep raja i. Nina raja i mo taba kalak i, “Boi mo kènè laus lako mersembah taba Jahowa Dèbata ndènè i. Tapi isè ngo kènè sinaing lako berkat i?”
9Ialoi si Musa mo, “Karinana kami, simatah daging dekket situa-tua. Kuembah kami mo karina dukak-dukak nami, karina lembu, biri-biri, dekket kambing nami, kerna kennah ngo kami memahan sada pèsta mbellen lako pesangapken Jahowa.”
10Nina raja i mo, “Oda tuhu nèngè idi mula kuduè nola kènè merembah daberru-daberru dekket dukak-dukak ndènè! Sinipido ndènè dos ngo idi dekket mengharapken asa kupidoken ipasu-pasu Jahowa kènè. Asa mula bagi enggo tangkas kubettoh taki jahat ngo taki ndènè. 11Mada! Pellin anak laki ngo kessa boi laus, mersembah taba Jahowa mula pellin naing mersembah sambing ngo kènè.” Merkitè rana bagi mo si Musa dekket si Aron ipelaus i istana raja i nai.
12Nai nina Jahowa mo taba si Musa, “Pekustang mo tanganmu mi babo tanoh Mesir. Asa merrohen nasa balang lako kipangani karina suan-suanen, silotna dèng tading kessa udan baho i.” 13Ipekèkè si Musa mo tongketna mi babo, janah ibakin Jahowa mo mengembus angin kebincaren mi nagerri i sidekkah mahar dekket bernginna i. Mayak siceggen iembah angin i mo balang ruar biasa buèna, 14#Alm. 9:2-3 gabè sap mo karina nagerri idi. Oda nung dèng idah jelma bagidi buèna balang, janah ipodinkenna nola pè oda nung masa nèngè bagi. 15Karina tanoh i isangkemmi balang, sanga mbèrèng idahen. Ipangani mo karinana siso icèdaken baho i, bagi dekket buah kayu, asa oda lot nèngè bulung meratah i suberri tanoh Mesir tading ibas kayu dekket suan-suanen.
16Nai rada-rudu mo raja i mendiloi si Musa dekket si Aron ninganna mendokken, “Enggo merdosa aku taba Jahowa Dèbata ndènè i dekket meradepken kènè. 17Ampuni kènè mo dosangku sikali en, janah mersodip mo kènè taba Jahowa Dèbata ndènè, asa ipesisi bangku nai hukumen mpiah èn.” 18Itadingken si Musa mo raja i janah mersodip taba Jahowa. 19Nai ikellih Jahowa mo perdalan angin idi gabè angin kesunduten nderras kalohon. Ikabangken angin i mo karina balang idi janah iembah mi Laut Gelagah. Singkabuah poda lot nèngè tading i suberri tanoh Mesir. 20Tapi ibakin Jahowa mo mpihir ukur raja i, janah oda ipaduè kalak Israel laus.
Gellap bulita karina tanoh Mesir
21Nina Jahowa mo taba si Musa, “Pekustang mo tanganmu mi babo, asa isangkemmi gellap tuiten karina tanoh Mesir.” 22#Ps. 105:28; Alm. 16:10 Ipekustang si Musa mo tanganna mi babo, janah sidekkah tellu ari isangkemmi gellap tuiten mo karina tanoh Mesir. 23Oda nè mo lot kadè idah kalak Mesir, janah sidekkah bagidi sada kalak poda lot barang mikè. Tapi i gennep sapo kalak Israel tong ngo nterrang.
24Nai itenggoi raja i nola mo si Musa janah nina, “Ndorok mo kènè laus mersembah taba Jahowa ndènè i. Nasa daberru dekket anak-anak pè ndorok mo dekket. Tapi ukum lembu, biri-biri dekket kambing ndènè oda ndorok iembah.”
25Ialoi si Musa mo, “Mula bagidi ngo kennah berrènken raja i mo pinakan sinaing pèlèenken nami dekket mahan pèlèen situtungen bai Jahowa, Dèbata nami. 26Karina pinakan nami kennah ngo kuembah kami; sada poda tadingenken nami. Ibas pinakan idi nai pilihen nami ngo barang apaina sinaing pèlènken nami bai Jahowa Dèbata nami. Isidi pè nahan asa kubettoh kami pinakan apaina sinaing pèlènken nami.”
27Ipepihir Jahowa ngo ukur raja i gabè oda nè mo iduè bangsa Israel laus. 28Nina raja i mo mbang si Musa, “Laus mo ko i lebbèngku nai. Ulang kuidah nèngè kono. Mula kuidah dèng abemu, matè mo ko kubaing.”
29“Bagè sinidokken raja i mo tuhu,” nina si Musa, “Oda nè pè idahen raja i aku.”
Currently Selected:
2 Musa 10: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
