2 Musa 9
9
Mermatèen pinakan
1Nina Jahowa nola mo taba si Musa, “Lako mo ko mengadep raja i, janah bagahken bana, Jahowa, Dèbata kalak Heber, mendokken, ‘Duè mo laus bangsangKu asa iuèi kalak i Aku. 2Mula oda uè ko paluahken kalak idi, 3Kupemasa mo bondil mahantu mi karina pinakanmu, kuda, kalodè, unta, lembu, biri-biri dekket kambing. 4Lot ngo kalihna Kubaing mi pinakan kalak Israel dekket pinakan kalak Mesir. Ukum ibas pinakan kalak Israel nai kennah singkabuah poda lot matè. 5Aku, Jahowa menettapken, baremben masa mono bagidi.’ ”
6Barembenkenna i ibakin Jahowa mo bagè sienggo nidokkenNa idi kin. Mermatèen mo karina pinakan kalak Mesir, tapi ukum pinakan kalak Israel sada poda lot matè. 7Nai ikusoken raja i mo kadè sienggo masa i, nai isukutken dèba mo tabasa ukum pinakan kalak Israel sada poda lot matè. Tapi tong ngo mpihir perukuren raja i janah oda nggèut padiatken bangsa i laus.
Sakit baroh
8Nai nina Jahowa nola mo taba si Musa dekket si Aron, “Buat mo barang piga-piga nggellem cirabun i ketaring nai. Kennah i hamburken si Musa mo cirabun i mi babo i lebbè raja i. 9Nai merkabangen mo cirabun idi mi suberri tanoh Mesir. Mi gennep jelma dekket pinakan sikenna abu idi gabè baroh mo i merpustaken gabè ugah mernanah.” 10#Alm. 16:2 Nai ibuat si Musa dekket si Aron mo abu, janah laus mengadep dempak raja. Ihamburken si Musa mo abu i mi dates. Nai mertubuhen mo baroh mi gennep jelma dekket pinakan merpustaken gabè ugah mernanah. 11Karina persibalik mata oda ndorok laus mengadep dempak si Musa kerna karina daging kalak i sap baroh bagè kalak Mesir sidèbanna i. 12Tapi tong ngo mpihir ukur raja i ibakin Jahowa, janah bagè sienggo nidokken Jahowa kin, oda isuihken raja i rana si Musa dekket si Aron.
Udan baho
13Nina Jahowa mo taba si Musa, “Laus mo kono baremben siceggen njengkas kalohon mengadep mendahi raja, janah bagahken tabasa Jahowa, Dèbata kalak Heber enggo mendokken: ‘Paluah mo bangsangKu asa laus kalak idi mersembah taba Aku. 14Ukum ibas sikali èn Kupemasa mo bala, oda pellin taba èkuten dekket ginemgem i sambing, tapi bagi ma taba kono pè, asa bettohenmu oda lot simengelebihi Aku i suberri dunia èn. 15Mula uè kin Aku menghukum ko dekket ginemgemmu merkitè sakit, kennah enggo dung kènè karina. 16#Rm. 9:17 Tapi Kubelli deng ngo kènè nggelluh asa ndorok Aku petuduhken kegegohenKu taba kènè, asa termurmur gerarKu i suberri dunia èn. 17Bagidi pè keppeken, tong dèng ma ngo ndates ukurmu, janah oda ipadiat kono bangsangKu laus. 18Asa baremben ceggen dèng, perohenKu mo udan baho mertuhu-tuhu, siso nung dèng masa bagi i Mesir arnia nai soh mi bagèndari. 19Asa perèntahken mo asa karina pinakan dekket karina silot bamu silotna i ruar iembah mi bekkas silot percelenggemenna. Karina jelma dekket pinakan sini ruar janah siso ndorok mercilèndung kennah matè itinggang udan baho i.’ ” 20Nai lot mo barang piga-piga kalak ibas pugabè raja i nai si mbiar mendengkoh kata Jahowa idi. Iembah kalak i mo hamba bak pinakanna mi bages lako culèndung. 21Tapi sidèbankenna i oda isarihken sèngèt-sèngèt idi janah ibelli mo bagi hamba-hamba dekket pinakan kalak idi i jampalen i.
22Nai mongkam nola mo Jahowa taba si Musa, “Pekustang mo tanganmu mi dates, asa roh udan mi karina tanoh Mesir. Itinggangi udan i mo jelma, pinakan dekket suan-suanen sinijuma.” 23Ipekèkè si Musa mo tongketna i mi babo, nai masa mo ibaing Jahowa renggur, dekket udan baho, dekket saksik pelian. Roh mo ibaing Jahowa 24#Alm. 8:7, 16:21 baho mertuhu-tuhu merdengan perkas mencaliti. Ideng mo masa baho simertuhu-tuhuna ipas sijarah kalak Mesir. 25Asa kumernaken baho idi radas mo karina silot i juma, imo jelma dekket binatang. Mercèdaen mo karina suan-suanen i juma janah mercuaken mo mbuè kayu. 26Asa pellin nagerri Gosyen, bekkas kalak Israel mo kessa oda kenna tipa udan baho simertuhu-tuhu i.
27Nai idilo raja i mo si Musa dekket si Aron, janah idokken: “Enggo merdosa aku. Jahowa ngo situhuna, enggo salah sikubahan dekket sinibahan ginemgemku. 28Mersodip mo ko taba Jahowa; enggo ndersasu kuakap kami kerna renggur dekket baho èn. Kupadiat pe kene berkat. Ulang mo isèn nèngè kènè merian.”
29Nina si Musa mo taba raja i, “Enggo kessa soh aku nahan mi ruar kuta èn, kutarèken pè tanganku mi babo lako mersodip mendahi Jahowa. Kennah mentadi mo renggur dekket baho idi, asa bettohen raja i Jahowa ngo sidasa karina sini dunia èn. 30Tapi kubettoh ngo ukum raja i dekket suruhen raja i tong dèng oda mbiar midah Jahowa Dèbata.”
31Asa ncèda mo karina kapas dekket pagè, kerna tupung ngo sidang merbunga deket bibi. 32Tapi ukum cingkerru dekket suan-suanen merbatu buahna oda ngo pella ncèda kerna tupung oda dèng dapet mosinna.
33Nai itadingken si Musa mo raja i janah laus mi ruar kuta idi; i si mo ia memakin tanganna mi dates lako mersodip taba Jahowa. Kejapkenna i mènter sintempu mo kom renggur idi, bagi baho dekket udan i. 34Kessa idah raja i simasa idi iolihi nola mo balik merdosa. Tong ngo mpihir ukur raja i dekket pugabèna karina. 35Bagè sienggo nidokken Jahowa merkitè si Musa, oda iduè raja i kalak Israel laus.
Currently Selected:
2 Musa 9: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
